މިހާރު ކުރިއަށްދާ ރިޔާސީ އިންތިހާބުގެ ކެމްޕޭނުގައި ރައީސް އިބްރާހިމް މުހައްމަދު ސޯލިހު އުތުރަށް ކުރައްވަމުން ގެންދަވާ ދަތުރުފުޅުގައި މިއަދު ށ. އަތޮޅުގެ ހަތް ރަށަކަށް ވަޑައިގަތެވެ.

ހެދުނު 8:00 ގައި ފެށި ރައީސްގެ މި ދަތުރުގައި އެމަނިކުފާނު ވަޑައިގެންނެވީ ދެވަނަ ދައުރެއް ޔަގީން ކުރެއްވުމުގެ އުންމީދާ ޖޯޝާ އެކު އެވެ. ކޮންމެ ރަށެއްގައި ވެސް ރައްޔިތުންނާއި ވާހަކަފުޅު ދައްކަވާ، ނިމިފައިވާ މަޝްރޫއުތައް އިފްތިތާހުކޮށްދެއްވި އެވެ.

ށ. މިލަންދޫ

ރައީސްގެ ދަތުރުފުޅު މިއަދު ފެއްޓެވީ ރޭ ހުންނެވި ށ. މިލަންދޫ އިންނެވެ. އެގޮތުން, އެ ރަށުގައި ނިމިފައިވާ ފެނަކަ އޮފީހާއި ފުޓްބޯޅަ ދަނޑު ރައީސް ހުޅުއްވައިދެއްވި އެވެ.

މިލަންދޫއަށް ވަޑައިގެން ދެއްކެވި ވާހަކަފުޅުގައި ރައީސް ވަނީ ދަތުރުފަތުރުގެ މުހިންމު ކަމާއި، ކުރިއަށް އޮތް އެއާޕޯޓު މަޝްރުއޫތަކުން އިގްތިސާދަށް އަންނާނެ ހެޔޮ ބަދަލަށް އަލި އަޅުވާލައި ވާހަކަފުޅު ދައްކަވާފަ އެވެ.

"އިގްތިސާދެއް ބިޔަވެ ފައްކާވެގެން މިދަނީ އެއްތަނުން އަނެއްތަނަށް މީހުން ދިއުމާ ތަކެތި އެއްތަނުން އަނެއްތަނަށް ގެންދެވިގެން. އަޅުޔގަނޑުމެން ފެށި އެއްކަމަކީ އެއީ. ދަތުރުފަތުރުގެ ނިޒާމުން މުޅި ރާއްޖެ ގުޅާލުން. އާރުޓީއެލް މެދުވެރިކޮށް އެރަށާ އަނެއްރަށް ކަނޑުމަގުން ގުޅާލުމާ، ވައިގެ މަގުން އެއާޕޯޓު މެދުވެރިކޮށް އެއްރަށް އަނެއް ގުޅާލެވިގެން" ރައީސް ވިދާޅުވީ މިއަދު ބޮޑުތިލަދުންމަތިން ފެނިގެދާ އާރުޓީއެލް އަކީ ދަތުރުފަތުރުން ގުޅާލުމުގެ ލާމަސީލު މިސާލެއް ކަމަށެވެ.

މިލަންދޫއަށް ރައީސް ވެވަޑައިގަތް ވައުދުތަކަކީ:

• މިލަންދޫގެ ހުރިހާ ޒަމާނީ ފެންވަރަށް ހެދުން
• ކުނި މެނޭޖުކުރާ ޒަމާނީ ވަސީލަތް ގާއިމްކުރުން
• އިތުރު ހައުސިން ޔުނިޓު އެޅުން
• މިލަންދޫގެ ބިން ހިއްކުން
• ރިވެޓުމެންޓުޖެހުން

އެއަށްފަހު ރައީސް ވަޑައިގަތީ ޖެހިގެންހެން އޮންނަ އާބާދީ ކުޑަ ނަރުދޫއަށެވެ.

ށ. ނަރުދޫ

ނަރުދޫއަށް ވަޑައިގެން ރައީސް ވަނީ އެމަނިކުފާނުގެ ވެރިކަމުގައި ކުރިއަށް ގެންދެވި ތިން މަޝްރޫއެއް އިފްތިތާހު ކޮށްދެއްވާފަ އެވެ. އޭގެ ތެރޭގައި ހިމެނެނީ، ސްކޫލުގައި އެޅި ތިން ބުރީގެ އާ އިމާރާތް، ސިއްހީ މަރުކަޒަށް އިތުރުކުރި އިމާރާތާއި ހިދުމަތްތައް، އަދި ނަރުދޫގެ އައު އިންޖީނުގެ އެވެ.

އޭގެ އިތުރުން މިހާރު ހުއްޓިފައިވާ ނަރުދޫގެ ނަރުދަމާގެ މަސައްކަތުގެ ކޮންޓްރެކްޓު ބާތިލްކޮށް އާ ބަޔަކާ ހަވާލުކުރައްވާނެ ކަމަށްވެސް ވިދާޅުވި އެވެ.

ށ. ނަރުދޫގައި އެމްޑީޕީއާ އަލަށް ގުޅިވަޑައިގެންނެވި ބައެއް ބޭފުޅުންނާ އެކު ރައީސް --- ފޮޓޯ: މުހައްމަދު ޝާބިން/އަދަދު

"އުންމީދުކުރި ގޮތާ ގާތަށްވެސް [ނަރުދަމާގެ] މަސައްކަތެއް ނެތް ކުރެވިފައެއް، އެހެންވެ އަޅުގަނޑުމެން ނިންމީ އެ ކޮންޓްރެކްޓު ބާތިލްކޮށް އެހެން ބަޔަކާ އެއް މަސައްކަތް ހަވާލުކުރަން، މިއަދު ޕްލޭނިން މިނިސްޓްރީއިން އެ މަސައްކަތް އެ ކުރައްވަނީ، އަޅުގަނޑު ހިތުން އެ ނޫން ގޮތެއް މިކަމުގައި ނެތް، ބޭނުންވާ ވަގުތު ދެވިއްޖެ، ބޭނުންވާ ފައިސާވެސް ދެވިއްޖެ" ރައީސް ވިދާޅުވި އެވެ.

ނަރުދޫއަށް ވެދެއްވި ރިޔާސީ ވައުދުތައް:

• ސިއްހީ މަރުކަޒު ތަރައްގީކުރުން
• ކައުންސިލް އިދާރާއަށް އާ އޮފީހެއް
• އިޖްތިމާއީ މަރުކަޒެއް
• ޓާފު ދަނޑެއް
• ސްކޫލަށް މަލްޓިޕާޕޯސް ހޯލެއް
• ގިރާ ސަރަހައްދަށް ހައްލެއް

ރައީސް ދެން ވަޑައިގަތީ އެ އަތޮޅު ފީވަކަށެވެ.

ށ. ފީވަށް

ފީވަކަށް ވަޑައިގެން ރައީސް ވަނީ އެ ރަށުގައި އަލަށް ގާއިމުކުރެވުނު ބަނދަރު ރަސްމީކޮށް ހުޅުއްވައިދެއްވާފަ އެވެ.

"ފީވަކަކީވެސް މީގެ ކުރީގެ ސަރުކާރުތަކުން އަޅާނުލާ ދޫކޮށްލެވިފައިވާ ރަށްތަކުގެ ތެރެއިން ރަށެއް، އެހެން ކުދި ރަށްތަކަށް އަޅާނުލާ ދޫކޮށްލަނީ އެބޭފުޅުންގެ ވިސްނުން ހަމައެކަނި ކުރިއަށް އޮންނަ ރިޔާސީ ވޯޓަށް ހުންނާތީ" ރައީސް ފީވަކުގައި ވިދާޅުވި އެވެ.

ށ. ފީވަށް ބަނދަރު ރައީސް އިފްތިތާހު ކޮށްދެއްވައިފި .--- ފޮޓޯ: މުހައްމަދު ޝާބިން/އަދަދު

ފީވަކަށް ވެދެއްވި ރިޔާސީ ވައުދުތައް:

• ބޮޑެތި މަގުތައް ޒަމާނީ ފެންވަރަށް ތަރައްގީކުރުން
• ރަށް ގިރުމުގެ މައްސަލަ ހައްލުކޮށްދިނުން
• އައުޓްޑޯ ޖިމެއް
• ވޮލީ ކޯޓެއް
• ސްކޫލް އިތުރަށް ތަރައްގީކުރުން

ރައީސް ދެން ވަޑައިގަތީ އެ އަތޮޅު ފޭދޫ އަށެވެ.

ށ. ފޭދޫ

ފޭދޫއަށް ވަޑައިގެން ރައީސް ވަނީ އެ ރަށުގައިވެސް ގާއިމުކުރި ބަނދަރު ރަސްމީކޮށް ހުޅުއްވައިދެއްވާފަ އެވެ.

ފޭދޫ ރައްޔިތުންނާ މުހާތަބުކުރައްވާ ވާހަކަފުޅު ދައްކަވަމުން ރައީސް ވަނީ އިއާދަކުރަނިވި ހަކަތައިން ކަރަންޓު އުފައްދައި ދައުލަތުގެ އާމްދަނީއިން ބޮޑު އަދަދެއް ސަލާމަތްކުރުމަށް އަންނަ ދައުރުގައި ކުރާނެ މަސައްކަތާ ގުޅޭގޮތުން މައުލޫމާތު ދެއްވާފަ އެވެ.

"މި ދައުރުގައި 32 މޭގަވޮޓަށް ވުރެ އިތުރަށް ސޯލާ އެނާޖީ ފޯރުކޮށްދެވިއްޖެ. އަޅުގަނޑުމެންގެ އަމާޒަކީ 2028 އަންނަ އިރު ދައުލަތުން ތެޔޮ އެތެރެކުރުމަށް މި ހަރަދުކުރާ 800 މިލިއަނަށްވުރެ ގިނަ ޑޮލަރު އޭގެ ދެބައިކުޅަ އެއްބަޔަށް އެޓްލީސްޓު ކުޑަކުރުން" ރައީސް ވިދާޅުވި އެވެ.

ފޭދޫ ރައްޔިތުންނާއި މުހާތަބު ކުރައްވައި ރައީސް ވާހަކަފުޅު ދައްކަވަނީ --- ފޮޓޯ: މުހައްމަދު ޝާބިން/އަދަދު

ރައީސް ވިދާޅުވީ އެ މަޝްރުއޫގެ އެންމެ ބޮޑު ބޭނުމަކީ ރައްޔިތުންގެ އަތުން ކަރަންޓަށް ކުރާ ހޭދަ ކުޑަކުރުމާއި، ރައްޔިތުންގެ ހިދުމަތްތަކަށް ފައިސާ އިތުރުކުރުން ކަމަށެވެ.

ފޭދޫއަށް ވެދެއްވި ރިޔާސީ ވައުދުތައް؛

• ބޮޑެތި މަގުތައް ޒަމާނީ ފެންވަރަށް ހެދުން
• އެޓީއެމްގެ ހިދުމަތް ތައާރަފްކުރުން
• ހޭންޑްބޯލް ކޯޓެއް އަޅައިދިނުން
• ވޮލީ ކޯޓެއް އަޅައިދިނުން
• ގިރާ ސަރަހައްދު ހިމާޔަތްކުރުން

ރައީސް ދެން ވަޑައިގަތީ އެއަތޮޅު ބިލެއްފައްސަށެވެ.

ށ. ބިލެއްފަހި

ބިލެއްފައްސަށް ވަޑައިގެން ރައީސް ސޯލިހު ދެއްކެވި ވާހަކަފުޅުގައި ފާހަގަކުރީ 2018 ވަނަ އަހަރާ ހަމައަށް ރާއްޖޭގައި އޮތް ހާލަތު ވަރަށް ބޮޑަށް ބަދަލުވެފައިވާ . ކަމަށެވެ. އެގޮތުން ސިޔާސީ ލީޑަރުންނާއި އެކްޓިވިސްޓުން އަދި ނޫސްވެރިން ހައްޔަރުކޮށް ޖަލުބަންދުގައި ނުވަތަ ބޭރުގެ ގައުމުތަކަށް އަރުވާލެވިފައި ތިބުން ނިމުކަމަށް އައިސްފައިވާކަން ފާހަގަކުރެއްވި އެވެ.

އަދި ނޫސްވެރިންނާއި ޓީވީ ޗެނަލްތަކަށް އޮތް މިނިވަންކަން އިތުރުވެފައިވާކަން ވެސް އެމަނިކުފާނު ފާހަގަކުރެއްވި އެވެ.

މިރަށުގައި ބޭއްވި ޖަލްސާގައި ވާހަކަފުޅު ދައްކަވަން ރައީސް ސްޓޭޖަށް ވަޑައިގަންނަވަނީ --- ފޮޓޯ: މުހައްމަދު ޝާބިން/އަދަދު

"އެކަމަކު ކޮންމެވެސް ވަރަކަށް ބަހުރުވަ އެބަ ޖެހޭ ބަދަލުކޮށްލަން. ގޭތެރޭގެ ސިޓިންރޫމުތަކުގައި އެތިބޭ އާއިލާތަކާއެކުގައި އެތިބޭ އިރު އަޑު އަހަން ކަމުނުދާ ކަހަލަ ވާހަކަ އެބަ ދައްކާ. ވާހަކަ ދައްކަންވީ، ފާޑު ކިޔަންވީ، އެހެން ނަމަވެސް އޭގެ ރީތި ބަހުރުވަ ބޭނުންކުރުން އެއީ މުޖްތަމައަށް އެންމެ ރަނގަޅު ގޮތް" ރައީސް ވިދާޅުވި އެވެ.

ފޭދޫއަށް ވި ރިޔާސީ ވައުދުތައް؛

• މަގުތައް ޒަމާނީ ފެންވަރަށް ހެދުން
• ސިއްހީ މަރުކަޒުގެ ހިދުމަތްތައް އިތުރުކުރުން
• ބިން ހިއްކުން
• އެއާޕޯޓު އެޅުން

ބިލެއްފައްސަށް ދެން ރައީސް ވަޑައިގަތީ އެއަތޮޅު ގޮއިދޫއަށެވެ.

ށ. ގޮއިދޫ

ގޮއިދޫއަށް ވަޑައިގެން އެރަށުގައި މިސަރުކާރުން ގާއިމްކުރި އިންޖީނުގެ އަދި ފެނަކަ އޮފީސް ރައީސް ސޯލިހު ހުޅުވައިދެއްވި އެވެ.

އެ ރަށުގެ ރައްޔިތުންނާ ބައްދަލުކޮށް ވާހަކަ ދައްކަވަމުން ރައީސް ވިދާޅުވީ، ގޮއިދޫއަކީ 2018 ވަނަ އަހަރުގެ ރިޔާސީ އިންތިހާބުގައި ބޮޑު އަގުލަބިއްޔަތެއްގެ ވޯޓު އެމަނިކުފާނަށް ލިބިވަޑައިގަތް ރަށެއް ކަމަށެވެ. އެ ނިންމުމުން ގޮއިދޫ އަދި މުޅި ރާއްޖެއަށް އަތުވެފައިވާ ކަމަށް ވިދާޅުވި އެވެ.

"މިއަދު އަޅުގަނޑުމެން އައިސް މިތިބީ އޭރު އެފެށި މަސައްކަތް ނިންމުމަށްޓަކާ. އެ ދުވަހު އެފެށި މަސައްކަތުން އާދެވިފައި މިއޮތް ހިސާބަކީ ރާއްޖޭގައި ސުލްހަވެރިކަން ގާއިމު ކުރެއްވިއްޖެ. ރައްޔިތުންނަށް ބޭނުންވާ އަސާސީ ހިދުމަތްތައް ފޯރުކޮށްދެވެން ފަށައިފި. ދަރިންނަށް މަތީ ތައުލީމު ދެވެން ފަށައިފި. ސިއްހީ ހިދުމަތް ރަށުގައި ތިބެގެން ލިބޭ ގޮތް ހެދިއްޖެ," ރައީސް ސޯލިހު ވިދާޅުވި އެވެ.

ރައީސް ވިދާޅުވީ ބޭނުމަކީ ލިބުނު ތަރައްގީއާ އެކީ އަދިވެސް ކުރިއަށް ދިއުން ކަމަށެވެ.

ގޮއިދޫއަށް ރައީސް ސޯލިހު ވެވަޑައިގަތް ވައުދުތަކަކީ:

• މަގުތައް ޒަމާނީ ފެންވަރަށް ހެދުން
• ގިރާ ސަރަހައްދު ހިމާޔަތްކުރުން
• ކަރަންޓު ކެޕޭސިޓީ އިތުރުކުރުން
• ސިއްހީ މަރުކަޒަށް އެމްބިއުލާންސެއް ހޯދައިދިނުން

ގޮއިދޫއަށް ފަހު ދެން ރައީސް ވަޑައިގަތީ އެ ދުވަހުގެ އެންމެ ފަހު ރަށް ކަނޑިތީމަށެވެ.

ށ. ކަނޑިތީމު

ކަނޑިތީމުގެ ރައްޔިތުންނާ ބައްދަލުކުރައްވައި ރައީސް ވިދާޅުވީ މުޅި ށ. އަތޮޅަަށް ނިމިދިޔަ ސަރުކާރުތަކުން ވަރަށް ބޮޑަށް އިހުމާލުވެފައިވާ ކަމަށެވެ. އެހެން ނަމަވެސް މި ސަރުކާރުގައި ގިނަ މަޝްރުއޫތަކެއް ހިންގާފައިވާކަން އެމަނިކުފާނު ފާހަގަކުރެއްވި އެވެ.

"ސަރުކާރަށް އައިސް އަޅުގަނޑުމެން މަސައްކަތް ފެށީ އޭގެ ކުރީ ސަރުކާރުތަކުން ތަރައްގީގެ މަޝްރުއޫތައް ނުހިންގާ ހުރި ސަރަހައްދުތަކަށް ތަރައްގީ ގެނެސްދިނުމަށް. އެގޮތުން ބަލާއިރު ށ. އަތޮޅުގެ ކަނޑިތީމު ވެސް ހިމެނޭ ގޮތަށް އަދި ބިލެއްފަހި ވެސް ހިމެނޭ ގޮތަށް ހުރިހާ ރަށެއްގައި ވެސް ކަން ހުރީ މިގޮތަށް," ރައީސް ވިދާޅުވި އެވެ.

ކަނޑިތީމުގެ ރައްޔިތުންނަށް ވި ރިޔާސީ ވައުދުތައް؛

• މަގުތައް ޒަމާނީ ފެންވަރަށް ހެދުން
• ހޭންޑުބޯލް ކޯޓެއް އެޅުން
• މޫދު ކުޅިވަރަށް ހާއްސަ ސަރަހައްދެއް ގާއިމްކުރުން
• ކަރަންޓު ވިއުގައަށް ދިމާވެފައި އޮތް ދަތިކަން ހައްލުކޮށްދިނުން
• ބަނދަރު ބޮޑުކުރުމާއި ގެންނަން ޖެހޭ ބަދަލުތައް ގެނައުން
• އަތޮޅު މަދަރުސާގެ ކުލާސްރޫމުތައް އިތުރުކުރުން

ށ. އަތޮޅަށް ކުރެއްވި ދަތުރު ނިންމަވާލެއްވުމަށްފަހު ރައީސް ދެން ވަޑައިގެންނެވީ ހދ. ހަނިމާދޫ އަށެވެ. މިރޭ އެ ރަށުގައި ރޭ ކުރައްވާއިރު މާދަމާ ރައީސް ހއ. އަތޮޅުގެ ބައެއް ރަށްތަކަށް ވަޑައިގަންނަވާނެ އެވެ. އަދި މާދަމާ ރޭ ހަނިމާދޫގައި ރައީސްގެ ކެމްޕޭން ޖަލްސާއެއް ބޭއްވުމަށް ވަނީ ހަމަޖެހިފަ އެވެ.