އިތުރު ދައުރެއް ލިބިވަޑައިގެންފި ނަމަ ސަރުކާރުން މިހާރު ނަގަމުންދާ ލޯނުތައް އެ ދައުރުގައި ދައްކަވައި ނިންމަވާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިރޭ ވިދާޅުވެއްޖެ އެވެ.
ރިޔާސީ ކެމްޕެއިނަށް ށ. މިލަންދޫއަށް ވަޑައިގެން އެ ރަށުގައި ބޭއްވި ޖަލްސާއެއްގައި ވާހަކަ ދައްކަވަމުން ރައީސް ވިދާޅުވީ، މީގެ ތިން އަހަރު ފަހުން ދައުލަތުގައި ފައިސާ ހުންނާނެ ކަމަށާއި ދެ ވަނަ ދައުރެއް ލިބިވަޑައިގެންފި ނަމަ 2028 ގައި އަންނަ ވެރިޔަކަށް ލޯނު ދައްކަން މަތިނުކުރައްވާނެ ކަމަށެވެ.
"2026 ވަނަ އަހަރުގެ ފަހުން ދިވެހި ދައުލަތުގައި ހުންނާނެ ފައިސާ ލޯނު ދައްކާނެ ވަރަށް. އަޅުގަނޑުގެ ދެ ވަނަ ދައުރުގައި އިރާދަކުރެއްވިއްޔާ ނިމިގެންދާނީ މި ދެންނެވި ލޯނު ދައްކަން ދެން އަންނަ ސަރުކާރަކަށް ނުޖައްސައި. އެކަން ވެސް ހަމައަކަށް އަޅުވާނަން،" ރައީސް ވިދާޅުވި އެވެ.
އޭގެ އިތުރުން މިރޭގެ ޖަލްސާގައި ވާހަކަ ދައްކަވަމުން ރައީސް ވިދާޅުވީ، އެމަނިކުފާނުގެ ސަރުކާރުން ބެލީ ސިޔާސީ ހަލަބޮލިކަމުން ދުރުވެ ގައުމަށް ތަރައްގީ ގެނައުމަށް ކަމަށެވެ.
"އެންމެ މުހިންމު ކަމަކީ ހަމަޖެހުމާއި ސުލްހަވެރިކަން. ސިޔާސީ ހަމަނުޖެހުމުން އެއްކިބާވެ ތިބެ، ރާއްޖޭގެ ތަރައްގީއަށް މަސައްކަތްކުރަން ފުރުސަތު ލިބުން. ރައްޔިތުން ބޭނުންވެފައި ތިބި އަސާސީ ހައްގުތައް ފޯރުކޮށްދިނުމަށްޓަކައި ގިނަ މަސައްކަތްތަކެއް އަޅުގަނޑުމެންނަށް އޭގެ ސަބަބުން ކުރެވެމުން މިދަނީ،" ރައީސް ސޯލިހު ވިދާޅުވި އެވެ.
އަންނަ ސެޕްޓެމްބަރު 9، ގައި ބާއްވާ ރިޔާސީ އިންތިހާބުގައި ރައީސް ސޯލިހުގެ އިތުރުން ވާދަ ކުރައްވަނީ ޖުމްހޫރީ ޕާޓީގެ ގާސިމް އިބްރާހިމާއި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އުފެއްދެވި ދަ ޑިމޮކްރެޓްސްގެ ރިޔާސީ ކެންޑިޑޭޓް މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބާއި މޯލްޑިވްސް ނެޝަނަލް ޕާޓީގެ މުހައްމަދު ނާޒިމެވެ.
އެންމެ ބޮޑު އިދިކޮޅު ޕާޓީ ޕްރޮގްރެސިވް ޕާޓީ އޮފް މޯލްޑިވްސް އިން ބުނަނީ އެ ޕާޓީގެ ކެންޑިޑޭޓަކީ ކޮރަޕްޝަންގެ މައްސަލައެއްގައި 11 އަހަރުގެ ޖަލު ހުކުމެއް ތަންފީޒު ކުރައްވަމުންދާ ކުރީ ރައީސް ޔާމީން ކަމަށެވެ.
