އެމްޑީޕީގެ ރިޔާސީ ކެންޑިޑޭޓު ރައީސް އިބްރާހިމް މުހައްމަދު ސޯލިހު ރަށްރަށަށް ކުރައްވާ ދަތުރުފުޅުގައި އާންމުކޮށް ފެންނަނީ އެމްޑީޕީ އާއި އެ ޕާޓީއާ ކޯލިޝަން ހަދާފައިވާ ޕާޓީތަކުގެ ކުލަ ކަމަށާއި ދެން ވަރަށް މަދުން އިދިކޮޅު ޕީޕީއެމްގެ ފިޔާތޮށި ކުލަ ފެންނަ ކަމަށް އެމަނިކުފާނު މިއަދު ވިދާޅުވެއްޖެ އެވެ.
ށ. އަތޮޅުގެ ރަށްރަށަށް އެމަނިކުފާނު ކުރައްވަމުން ގެންދަވާ ދަތުރުފުޅުގެ ތެރެއިން މިއަދު މެންދުރުފަހު މާއުނގުދޫއަށް ވަޑައިގެން ވިދާޅުވީ އެއީ ސިޔާސީ ހަރަކާތްތައް ވަރުގަދަ ރަށެއް ކަން ރަށުގެ ބަނދަރަށް ވަޑައިގަތުމުން ވެސް ސާފުވެގެން ދިޔަ ކަމަށެވެ.
މާއުނގޫދޫގައި ޕީޕީއެމްގެ ސަޕޯޓަރުން ވަނީ އެ މީހުންގެ ޝުއޫރުތައް ލިޔެ ފިޔާތޮށި ކުލައިގެ ބެނާތަކެއް ދަމައިފަ އެވެ. އެ ބެނާތަކުގައި ލިޔެފައިވާ ވާހަތަކަށް ރައްދު ދީ، އެމްޑީޕީގެ ސަޕޯޓަރުން ވަނީ ރަންރީނދޫ ކުލައިގެ ބެނާތަކެއް ވެސް ދަމައިފަ އެވެ. ރައީސް އިޝާރާތް ކުރެއްވީ އެ ވާހަކައަށެވެ.
ރައީސް ދެން ވިދާޅުވީ ސިޔާސީ ޕާޓީތަކުގެ އެކި ކުލަ އެ ރަށުން ފެނުނު ކަމަށެވެ. އޭގެ ތެރެއިން ފިޔާތޮށި ކުލައަކީ މިހާރު ރަށްރަށުން ވަރަށް މަދުން ފެންނަ ކުލައެއް ކަމަށް ވެސް ވިދާޅުވި އެވެ.
"ތަފާތު ހުރި ކުލައެއް މި ރަށުން އެބަ ފެނޭ، ފެހި ކުލަ [އަދާލަތު ޕާޓީ]، ރީނދޫ ކުލަ [އެމްޑީޕީ]، އޮރެންޖު ކުލަ [އެމްޑީއޭ]، އަދި މަދުން ނަމަވެސް ބައެއް ރަށްރަށުން މިހާރު ފެންނަ ފިޔާތޮށި ކުލަ [ޕީޕީއެމް] ވެސް މި ރަށުން އެބަ ފެނޭ،" ރައީސް ވިދާޅުވި އެވެ.
ރިޔާސީ އިންތިހާބެއްގެ ކެމްޕެއިން އަންނަ އިރު ރަނގަޅު ކެމްޕެއިނެއް ކުރަން ޖެހޭނެ ކަމަށް ރައީސް ވިދާޅުވި އެވެ. ވާދަވެރި ސިޔާސީ ހަރަކާތް ނެތް ނަމަ، ކެމްޕެއިން ކުރުމުގެ ޖޯޝެއް ނުވެސް ހުންނާނެ ކަމަށް އެމަނިކުފާނު ވިދާޅުވި އެވެ.
"އަޅުގަނޑު ވަރަށް ވެސް ހިތްހަމަޖެހޭ، ޕީޕީއެމްގެ މި ރަށުގެ އެ މެންބަރުންނަށް، އެ ކުރައްވާ މަސައްކަތަށް، ކުރިއަށް ވަޑައިގަންނަވަންވީ، އަޅުގަނޑުމެން މި ތިބީ ވާދަކުރަން ނުކުމެ،" ރައީސް ވިދާޅުވި އެވެ.
ރައީސް އެހެން ވިދާޅުވިއިރު، އެމަނިކުފާނު ވަޑައިގަންނަވާ ކޮންމެ ރަށަކުހެން ޕީޕީއެމް/ޕީއެންސީގެ ރިޔާސީ ކެންޑިޑޭޓު އަދި ކުރީގެ ރައީސް އަބްދުﷲ ޔާމީން މިނިވަން ކުރުމަށް ގޮވާލައި އެމަނިކުފާނުގެ ސަޕޯޓަރުން ނުކުމެ ތިބެ އެވެ. އެކަމަކު، ސަލާމަތީ ސަބަބުތަކަށް ޓަކައި ކަމަށް ބުނެ ޕީޕީއެމް ސަޕޯޓަރުން ބަނދަރު ނޫނީ އެއާޕޯޓް ސަރަހައްދާ ދުރަށް ފުލުހުން ޖައްސަ އެވެ.
ރައީސް ސޯލިހު އިއްޔެ ފުވައްމުލައް ސިޓީއަށް ވަޑައިގަތް ވަގުތު ވެސް އެއާޕޯޓް ސަރަހައްދު ކައިރީ ގިނަ މަގުތައް ބަންދުކޮށް، ޕީޕީއެމްގެ ސަޕޯޓަރުންނަށް ނުވަދެވޭ ގޮތަށް ހެދި އެވެ. މާ ދުރުގައި ތިބި ޕީޕީއެމްގެ ސަޕޯޓަރުން އަޑު އުފުލަމުން ދަނިކޮށް، އެ ކަމަށް ބޭނުން ކުރި ޕިކަޕު ވެސް ފުލުހުންގެ ބެލުމުގެ ދަށަށް އެ ވަގުތު ގެންދިޔަ އެވެ.
ޕީޕީއެމްގެ ސަޕޯޓަރުން އަޑުއުފުލަން ފުރުސަތު ނުދޭ ކަމަށް ބުނެ ގިނަ ފާޑުކިޔުންތަކެއް ވެސް އަމާޒުވެފައިވާއިރު، އެ ޕާޓީގެ ކެންޑިޑޭޓު ޔާމީނަށް އިންތިހާބުގައި ވާދަކުރެވޭނެ ކަމަށް ނުބެލެވެ އެވެ.
ޔާމީނަށް 11 އަހަރުގެ ޖަލު ހުކުމެއް އިއްވާފައިވާއިރު އެ ޕާޓީން ގެންދަނީ އެމަނިކުފާނުގެ ކެންޑިޑެސީ ފޯމު ހުށަހެޅުމުގެ މަސައްކަތް ކުރަމުންނެވެ. އަދި ވާދަނުކުރެވޭނަމަ ޕީއެންސީން ވަކި ކެންޑިޑޭޓެއް ނެރެން އެބަ މަޝްވަރާ ކުރެ އެވެ.
އަންނަ ސެޕްޓެމްބަރު 9، ގައި ބާއްވާ ރިޔާސީ އިންތިހާބުގައި ވާދަ ކުރައްވަނީ ރައީސް ސޯލިހާއި ޖުމްހޫރީ ޕާޓީގެ ގާސިމް އިބްރާހިމާއި މޯލްޑިވްސް ނެޝަނަލް ޕާޓީގެ މުހައްމަދު ނާޒިމް ކުރިމަތިލައްވަ އެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު އުފެއްދެވި ދަ ޑިމޮކްރެޓްސްގެ ރިޔާސީ ކެންޑިޑޭޓަކީ މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބެވެ.
އެންމެ ބޮޑު އިދިކޮޅު ޕާޓީ ޕްރޮގްރެސިވް ޕާޓީ އޮފް މޯލްޑިވްސް އިން ބުނަނީ އެ ޕާޓީގެ ކެންޑިޑޭޓަކީ ކޮރަޕްޝަންގެ މައްސަލައެއްގައި 11 އަހަރުގެ ޖަލު ހުކުމެއް ތަންފީޒު ކުރައްވަމުންދާ ކުރީ ރައީސް ޔާމީން ކަމަށެވެ.
