ކޯޓުތަކުން މައުލޫމާތު ސާފުވިހާ އަވަހަކަށް އިދިކޮޅު ޕީޕީއެމްގެ ރިޔާސީ ކެންޑިޑޭޓް އަބްދުالله ޔާމީންގެ ކެންޑިޑެސީ ފޯމު އިލެކްޝަންސް ކޮމިޝަނަށް ހުށަހަޅާނެ ކަމަށް އެ ޕާޓީން ބުނެފި އެވެ.
ޕީޕީއެމްގެ ސެކެޓްރީ ޖެނެރަލް މުހައްމަދު ތޮލާލް މިއަދު 'އަދަދު' އަށް ވިދާޅުވީ, ރައީސް ޔާމީންގެ ކެންޑިޑެސީ ފޯމުގައި ދެން ފުރިހަމަ ނުވެ އޮތީ ހަމައެކަނި ޑިޕާޓްމަންޓް އޮފް ޖުޑިޝަލް އެޑިމިނިސްޓްރޭޝަނުން ސާފުކޮށްދޭން ޖެހޭ މައުލޫމާތު އެކަނި ކަމަށެވެ.
ކޯޓުތަކުން އެ މައުލޫމާތުތައް ސާފުވުމާއެކު ޔާމީންގެ ކެންޑިޑެސީ ފޯމު އިލެކްޝަންސް ކޮމިޝަނަށް ހުށަހަޅުއްވާނެ ކަމަށް ތޮލާލް ވިދާޅުވި އެވެ.
"ވީ އެންމެ އަވަހަކަށް [ފޯމު] ހުށަހަޅާނަން. މާދަމާ ވެސް, އަނެއް ދުވަހު ވެސް [ފޯމު] ހުށަހަޅާފާނެ. ބުދަ ދުވަހަކަށް އަޅުގަނޑުމެން މަޑެއް ނުކުރާނަން" ބުދަ ދުވަހު ކެންޑިޑެސީ ފޯމު ހުށަހަޅާނެ ކަމަށް ބުނެ ބައެއް މީޑިއާތަކުން ކޮށްފައިވަނީ ސައްހަ ރިޕޯޓެއް ނޫންކަން ފާހަގަކުރައްވާ ތޮލާލް ވިދާޅުވި އެވެ.
ޔާމީންގެ ރިޔާސީ އެޖެންޓުކަން ވެސް ކުރައްވާ ތޮލާލް ވިދާޅުވި ގޮތުގައި, ކެންޑިޑެސީ ފޯމުގެ ހުރިހާ ބައެެއް ފުރިހަމަވުމުން, ފޯމު ހުށަހަޅާނެ ތާރީހެއް އިއުލާނު ކުރާނެ ކަމަށެވެ. އަދި, އެ ތާރީހު މީޑިއާތަކަށް ވެސް އަންގާނެ ކަމަށް އޭނާ ވިދާޅުވި އެވެ.
ޔާމީންގެ ކެންޑިޑެސީ ފޯމު ހުށަހަޅަން ތައްޔާރުވަމުން އަންނައިރު, މިއަދު ޕީޕީއެމުން ވަނީ ޔާމީންގެ ރަނިންމޭޓު އިއުލާންކޮށްފަ އެވެ. ޔާމީންގެ ރަނިންމޭޓުގެ ގޮތުގައި ހަމަޖެއްސީ އެމަނިކުފާނުގެ އިސް ވަކީލު އަދި 2013 ވަނަ އަހަރުގެ ރިޔާސީ އިންތިހާބުގައި ރަނިން މޭޓަކަށް ހުންނެވި ޑރ. މުހައްމަދު ޖަމީލު އަހުމަދެވެ.
ރިޔާސީ އިންތިހާބަށް 40 ދުވަހަށް ވެފައިވާއިރު, ޕީޕީއެމްގެ ޓިކެޓުގައި ވާދަކުރާނެ ކަމަށް އިއުލާން ކޮށްފައިވާ ރައީސް ޔާމީން ގެންދަވަނީ 11 އަހަރުގެ ޖަލު ހުކުމެއް މާފުށީ ޖަލުގައި ތަންފީޒު ކުރައްވަމުންނެވެ.
ޔާމީންގެ މައްޗަށް 11 އަހަރުގެ ޖަލު ހުކުމެއް ކްރިމިނަލް ކޯޓުން އިއްވީ ވ. އާރަށް ކުއްޔަށް ދިނުމުގެ މުއާމަލާތުގައި ޔޫސުފް ނައީމްގެ އަތުން ޔާމީން ރިޝްވަތުގެ ގޮތުގައި 1.1 މިލިއަން ޑޮލަރު ނަންގަވައި އެ ފައިސާ ލޯންޑަ ކުރެއްވި ކަމަށް ސާބިތުވުުމުންނެވެ.
އޭގެ އިތުރަށް ރ. ފުއްގިރި ކުއްޔަށް ދިނުމުގެ މުއާމަލާތުގައި އަހުމަދު ކްރިކް ރިޒާ މެދުވެރިވެގެން އެ ރަށް ކުއްޔަށް ދިން ކުންފުނިން ޔާމީން ރިޝްވަތުގެ ގޮތުގައި 1.1 މިލިއަން ޑޮލަރު ނަންގައި، ސަންގެ ދެ ކުންފުންޏެއް މެދުވެރިކޮށް އެ ފައިސާ ލޯންޑަކުރި ކަމަށް ތުހުމަތުކޮށް ވެސް ދައުވާކޮށްފައިވެ އެވެ.
ޔާމީންގެ މައްޗަށް އިއްވާފައިވާ ޖަލު ހުކުމް ދެމިއޮތްހާ ހިނދަކު، އެމަނިކުފާނުގެ ކެންޑިޑެސީ ފޯމު ބަލައިނުގަނެވޭނެ ކަމަށް އިލެކްޝަންސް ކޮމިޝަން (އީސީ) ގެ ރައީސް ފުއާދު ތައުފީގު ވަނީ ވިދާޅުވެފަ އެވެ.
ގާނޫނީ އަސާސީގައި ބަޔާންކޮށްފައިވާ ރައީސުލްޖުމްހޫރިއްޔާއަށް ވުމުގެ އެއް ޝަރުތަކީ، ޖިނާއީ ކުށެއްކުރިކަން ސާބިތުވެގެން 12 މަސް ދުވަހަށް ވުރެ ދިގު މުއްދަތެއްގެ ހުކުމެއް އޮތް ނަަމަ، އެ ހުކުމް ތަންފީޒުކޮށް ނިމުނުތާ ނުވަތަ ކަނޑައެޅުނު އަދަބު މައާފު ކުރެވުނުތާ ތިން އަހަރު ވެފައިވާ މީހަކަށް ވުމެވެ.
