ސެޕްޓެމްބަރު 9, ގައި އޮންނަ އިންތިހާބަށް އިދިކޮޅުން ކަނޑައަޅާފައިވާ ރިޔާސީ ކެންޑިޑޭޓު ކުރީގެ ރައީސް އަބްދުالله ޔާމީނަށް އިންތިހާބުގައި ވާދަކުރުމަށް އޮތް ހުރަސްތަކާއި މެދު ބައިނަލްއަގްވާމީ ދުނިޔޭން ބަސް ބުނަމުން ނުދާތީ އިދިކޮޅު ކޯލިޝަން ހިންގެވުމާ ހަވާލުވެ ހުންނެވި ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ރައީސް އަބްދުއްރަހީމް އަބްދުالله ނުރުހުން ފާޅުކުރައްވައިފި އެވެ.
ރިޝަވަތު ހިފުމާއި މަނީ ލޯންޑަރިންގެ ކުށް ސާބިތުވެ ޔާމީން ގެންދަވަނީ 11 އަހަރުގެ ޖަލު ހުކުމެއް މާފުށީ ޖަލުގައި ތަންފީޒު ކުރައްވަމުންނެވެ. ޕީޕީއެމް/ޕީއެންސީން ޔާމީނަށް ރިޔާސީ ޓިކެޓު ދިން ނަމަވެސް އިއްވާފައިވާ ޖަލު ހުކުމް ދެމިއޮތްހާ ހިނދަކު ޔާމީންގެ ކެންޑިޑެސީ ބަލައިނުގަންނާނެ ކަމަށް އިލެކްޝަންސް ކޮމިޝަން (އީސީ) އިން ވަނީ ބުނެފަ އެވެ.
"ރާއްޖޭގައި އޮތް އެންމެ ބޮޑު އިދިކޮޅު ޕާޓީން ނެރޭ ރިޔާސީ ކެންޑިޑޭޓަށް ކެމްޕޭން ކުރެވޭނެ ފުރުސަތު ނުދީ ޖަލުގައި ބާއްވައިގެން މިއަދުގެ ސަރުކާރުން ހެސްކިޔާފަ ކެމްޕޭން ކުރަމުންދާ މައްސަލާގައި އަޅުގަނޑު ގަބޫލު ކުރަނީ ބައިނަލްއަގްވާމީ އިދާރާތަކުން, ޖަމިއްޔާތަކުން ވެސް ކޮންމެވެސް އެއްޗެއް ވިދާޅުވާން ޖެހޭ ކަމަށް," އަދުރޭ ވިދާޅުވި އެވެ.
އެ ހުކުމުގެ އިސްތިއުނާފު ހައި ކޯޓުގައި މިދިޔަ މަހުގެ ތެރޭގައި ފެށި ނަމަވެސް، އީދު ބަންދަށް ފަހު ބާއްވާފައި ވަނީ އެންމެ އަޑުއެހުމެކެވެ. ބެންޗުގައި ހިމެނޭ ފަނޑިޔާރު ހުޒައިފާ މުހައްމަދު އާއިލީ ޒިންމާއެއްގައި ޗުއްޓީގައި ހުންނެވިއިރު، މިހާރު ފަނޑިޔާރު މުހައްމަދު ސަލީމް ހުންނެވީ ޗުއްޓީގަ އެވެ.
"އަޅުގަނޑަކަށް ހައި ކޯޓުގައި އޮތް މައްސަލަ ނިމޭނެ ކަމަށް ދަންނަވަން ނޭނގޭ. އަޅުގަނޑު ދެންނެވި ކަންބޮޑުވުމަކީ މިތަނަށް އައިސް ތިބި ހައެއްކަ މީހުންގެ ކަންބޮޑުވުމެއް ނޫނޭ," ހައި ކޯޓުގައި މައްސަލަ ކުރިއަށްދާނެ ކަމުގެ ޔަގީންކަން ނެތް ކަމަށް ވިދާޅުވެ އަދުރޭ ވިދާޅުވި އެވެ.
ރ. ފުއްގިރި ކުއްޔަށް ދިނުމުގެ މުއާމަލާތުގައި އަހުމަދު ކްރިކް ރިޒާ މެދުވެރިވެގެން އެ ރަށް ކުއްޔަށް ދިން ކުންފުނިން ޔާމީން ރިޝްވަތުގެ ގޮތުގައި 1.1 މިލިއަން ޑޮލަރު ނަންގައި، ސަންގެ ދެ ކުންފުންޏެއް މެދުވެރިކޮށް އެ ފައިސާ ލޯންޑަކުރި ކަމަށް ތުހުމަތުކޮށް ވެސް ދައުވާކޮށްފައިވެ އެވެ. އެ މައްސަލައިގެ ޝަރީއަތް ކްރިމިނަލް ކޯޓުގައި ކުރިއަށް އެބަ ގެންދެ އެވެ.
"ދިވެހި ރާއްޖޭގެ ރަށްރަށުގައި ތިބި ރައްޔިތުން އެ ތިބީ މާޔޫސްވެފައި. އެ މީހުންގެ ރިޔާސީ ކެންޑިޑޭޓަށް ކެމްޕޭން ނުކުރެވިގެން ހަދާނެެ ގޮތެއް ނެތިފަ. ބައިނަލްއަގްވާމީ ދުނިޔެ ވެސް އަޅުގަނޑު ގަބޫލުކުރަނީ މިކަމާ ކަންބޮޑުވާން ޖެހޭ ކަމަށް. މިކަމާ އެ ބޭފުޅުން އެއްޗެއް ވެސް ވިދާޅުވާން ޖެހޭ ކަމަށް," ޔާމީންގެ ޝަރީއަތްތަކާ ގުޅިގެން އަދުރޭ މިއަދު ވިދާޅުވި އެވެ.
ދެވަނަ ދައުރެއް ހޯދުމަށް ޔާމީން 2018 ގެ އިިންތިހާބުގައި ވާދަކުރިއިރު އޭރުގެ ހުރިހާ ސިޔާސީ ލީޑަރުން ތިއްބެވީ ޖަލު ހުކުމެއްގައި ނުވަތަ ގައުމުން ބޭރަށް އަރުވާލެވިގެންނެވެ. ދުނިޔޭގެ ބޮޑެތި ގައުމުތަކުންނާއި, ބައިނަލްއަގްވާމީ ޖަމިއްޔާ ޖަމާއަތްތަކުން ރާއްޖޭގެ ސިޔާސީ ލީޑަރުން މިނިވަން ކުރުމަށް އޭރު ގޮވާލި އެވެ.
ރިޔާސީ އިންތިހާބުގައި ވާދަކުރަން ފޯމު ހުށަހެޅުމުގެ ފުރުސަތު އަންނަ މަހު ހަތްވަނަ ދުވަހަށް ހަމަވާއިރު ޔާމީންގެ އިންތިހާބީ ހައްގުތައް ކަށަވަރުކޮށްދިނުމަށް އެދި ސުޕްރީމް ކޯޓަށް ހުށަހެޅި ދެ މައްސަލަވެސް އެ ކޯޓުން ވަނީ ބޭރުކޮށްލާފަ އެވެ. ނަމަވެސް ޕީޕީއެމުން އަދިވެސް ބުނަނީ ޔާމީނުގެ ކެންޑިޑެސީއާ މެދު އުންމީދު ނުގެއްލޭ ކަމަށެވެ.
