ބޮޑީބޯޑިން އަށް ޝައުގުވެރިވާ ޒުވާން ބޮޑީބޯޑަރުން އުފެއްދުމުގެ މަގުސަދުގައި މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ) އިން މުޅިން އަލަށް ކުރިއަށްގެންދާ ޕްރޮގްރާމް "ހުދު ފޮނު" ދުނިޔޭގެ ޗެމްޕިއަންކަން ހޯދާފައިވާ ބޮޑީބޯޑަރުންނާއިއެކު ކުރިއަށްގެންދާ ގޮތަށް ނިންމައިފި އެވެ.
ރާއްޖޭގެ ހުރިހާ ހިސާބަކަށް އަމާޒުކޮށް އެމްބީބީއޭ އިން މިއަހަރު ކުރިއަށްގެންދަން ނިންމި ޔޫތު ޑިވެލޮޕްމަންޓް ޕްރޮގްރާމް "ހުދު ފޮނު" ޕްރޮގްރާމްގައި 16 އަހަރުން ދަށުގެ އަންހެން އަދި ފިރިހެން ކުދިންނަށް ބައިވެރިވުމަށް މިހާރުވަނީ ހުޅުވާލާފަ އެވެ.
މި ޕްރޮގްރާމްގައި އަންހެން ކުދިންނަށް ވައިޑީޕީ ކްލިނިކް ހިންގައިދޭނީ ދުނިޔޭގެ ޗެމްޕިއަންކަން ފަސް ފަހަރު ހޯދާފައިވާ ބްރެޒިލްގެ ނޭމަރާ ކަވާލިއޯ އެވެ. އަދި ފިރިހެން ކުދިންނަށް ކްލިނިކް ހިންގައިދޭނީ ދުނިޔޭގެ ޗެމްޕިއަންކަން ދެ ފަހަރު ހޯދާފައިވާ ފްރާންސްގެ އަމައުރީ ލެވާން އެވެ.
2022ގެ ވިޒިޓް މޯލްޑިވްސް ޕްރޯގެ ތެރެއިން އަމައުރީ ކުރިއަށްދިޔަ ކޯޗިން ކްލިނިކްގެ ތެރެއިން - ފޮޓޯ: މިރާޝް ނާޝިމް/އަދަދު
ނޭމަރާ އާއި އަމައުރީ އަކީ އަންނަ މަހުގެ ތިން ވަނަ ދުވަހު މާލޭގައި ފަށާ އައިބީސީ ވޯލްޑް ޓުއާގެ ވިޒިޓް މޯލްޑިވްސް ޕްރޯގައި ވާދަކުރާ ދެ ބޮޑީބޯޑަރުންނެވެ. މީގެ ތެރެއިން އަމައުރީ އަކީ މިދިޔަ އަހަރުގެ މޯލްޑިވްސް ޕްރޯގެ އޯޕަން ބަޔާއި ޑްރޮޕް ނީ ބައިގެ ފައިނަލުގައިވެސް ވާދަކުރި ބޮޑީބޯޑަރެކެވެ.
ނޭމަރާ ވަނީ މިދިޔަ އަހަރުގެ މޯލްޑިވްސް ޕްރޯގެ އަންހެން ބައިގެ ސެމީ ފައިނަލުގައި ވާދަކޮށްފަ އެވެ.
އަމައުރީ އާއި ނޭމަރާ ވަނީ މިދިޔަ އަހަރުވެސް ވައިޑީޕީ ކްލިނިކެއް ހިންގާފަ އެވެ. މާލޭގައި ކުރިއަށްދިޔަ މި ކްލިނިކްތަކުގައި ގިނަ ކުދިންތަކެއް ބައިވެރިވި އެވެ. މި ދެ ބޮޑީބޯޑަރުންގެ އިތުރުން ދުނިޔޭގެ ޑްރޮޕް ނީ ޗެމްޕިއަން ޑޭވިޑް ހަބާޑްވެސް ވަނީ މިދިޔަ އަހަރު ގައުމީ ޖޫނިއާ ޓީމަށް ކޯޗިން ކްލިނިކެއް ކުރިއަށްގެންގޮސްފަ އެވެ.
