ވޭތުވެދިޔަ ފަސް އަހަރު ދިވެހިރާއްޖެއަށް އޮތީ ފުރިހަމަ މާނައިގައި މިނިވަންކަން ލިބިފައި ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
މިއަދު ބޭއްވި މިނިވަން ދުވަހުގެ ރަސްމީ ޖަލްސާގައި ރައީސް ސޯލިހު ވިދާޅުވީ ކޮންމެ ދިމާލަކަށް ބަލާލި ނަމަވެސް އެންމެ ފުރިހަމަ މާނައިގައި ރާއްޖެއަށް އޮތީ މިނިވަންކަން ލިބިފައި ކަމަށެވެ. އެގޮތުން މިއީ ހާރިޖީ މިނިވަންކަން ވެސް "އެންމެ ވަރުގަދަ ފަސް އަހަރު" ކަމަށް ވެސް ރައީސް ވިދާޅުވި އެވެ.
"ދިވެހިރާއްޖޭގެ ސިޔާސީ މިނިވަންކަމުގެ ތާރީހަށް ބަލާއިރު، މިދިޔަ ފަސް އަހަރަކީ، ކޮންމެ ދިމާއަކަށް ނަޒަރު ހިންގިޔަސް، ފުރިހަމަ މާނައިގެ މިނިވަންކަން ގާއިމުވެފައި އޮތް ފަސް އަހަރު. ރާއްޖޭގެ ސިޔާސީ މިނިވަންކަން ފުރިހަމަށް ރައްކާތެރިކުރެވުނު ފަސް އަހަރު. ހާރިޖީ މިނިވަންކަން އެންމެ ވަރުގަދަ ފަސް އަހަރު. ދާޚިލީ މިނިވަންކަން އެންމެ ފުޅާ ގޮތެއްގައި ލިބިދެވުނު ފަސް އަހަރު. ފަރުދުންގެ ޒާތީ މިނިވަންކަން، އެއްވެސް ހިފެހެއްޓުމެއް ނެތި ކަށަވަރު ކޮށްދެވުނު ފަސް އަހަރު،" އެމަނިކުފާނު ވިދާޅުވި އެވެ.
ރައްޔިތުންގެ މެދުގައި އޮންނަ ސުލްހަ ގާއިމް ކުރުމާއި ދެމެހެއްޓުމުގެ މުހިންމުކަމުގެ މައްޗަށް ވެސް ރައީސް މިއަދު އަލިއަޅުވާލެއްވި އެވެ. އެގޮތުން ބޮޑުތަކުރުފާނާއި ދޮންބަންޑާރައިން ވެސް ދިވެހިންގެ އެއްބައިވަންތަކަމަށް ސަމާލުކަން ދެއްވި ކަމަށް ރައީސް ސޯލިހު ވިދާޅުވި އެވެ.
"ދެ ހާޖީންނާއި ދަންޑެހެލާ ގޮވައިގެން އުތީމުގެ ޒުވާން ތިން ބަތަލުން، މަލިކައްޑޫގައި ކުރެއްވި ގައުމީ ޖިހާދުގެ ކޮންމެ ދުވަހެއް އަދި ކޮންމެ ހިނދުކޮޅެއް، އެ ރަދުން ހޭދަކުރެއްވީ ދިވެހިން އެއްބައިވަންތަކޮށް އެކުވެރި ކުރެއްވުމަށް. ދޮންބަންޑާރައިންގެ ގައުމީ ޖިހާދުން ވެސް އަޅުގަނޑުމެންނަށް ފެންނަނީ، ސުލްހަޔާއި ހަމަޖެހުމާއި އަމާންކަން ދެމެހެއްޓެވުމަށް ކުރެއްވި މަސައްކަތް،" އެމަނިކުފާނު ވިދާޅުވި އެވެ.
މިނިވަންކަން ދެމެހެއްޓުމުގެ އެންމެ ވަރުގަދަ ބާރަކީ އެހެން ގައުމުތަކާއެކު ދިވެހިރާއްޖެއިން ބާއްވާ "ރަހުމަތްތެރި، ބަދަހި ގުޅުން" ކަމަށް ވެސް މިއަދުގެ ޖަލްސާގައި ވާހަކަ ދައްކަވަމުން ރައީސް ވިދާޅުވި އެވެ.
މިނިވަން ދުވަހުގެ ރަސްމީ ޖަލްސާގައި ރައީސް ސޯލިހުގެ ދެކަނބަލުންނާއި ދައުލަތުގެ ވެރިން. -- ފޮޓޯ: ރައީސް އޮފީސް
"މިއަދު އަޅުގަނޑުމެންގެ މިނިވަންކަން ރައްކާތެރިކަންމަތީ ދެމެހެއްޓުމުގެ އެންމެ ވަރުގަދަ ބާރަކީ، ރާއްޖެ އާއި ބައިނަލްއަގުވާމީ މުޖްތަމައާ ދެމެދުގައި އޮތް ރަޙްމަތްތެރި ބަދަހި ގުޅުން. އެ ގުޅުމުގެ ސަބަބުން ރާއްޖޭގެ އިގްތިސާދީ ތަރައްގީއަށް ދިރުން ލިބިއްޖެ. ދިވެހި ރައްޔިތުންގެ ފަރުދީ ފުދުންތެރިކަން އިތުރުވެ އާއިލީ ތަނަވަސްކަން އިތުރުވެއްޖެ،" ރައީސް ސޯލިހު ވިދާޅުވި އެވެ.
އޭގެ އިތުރުން ރައީސް ވިދާޅުވީ، ދިވެހިން ތަރައްގީ ބޭނުންވެފައި ތިބި ނަމަވެސް އެކަމުގެ ހުރަހަކަށްވެފައި އޮތީ މީގެ ކުރިން އުޅެންޖެހިފައިވާ ދަތި ހާލަތު ކަމަށެވެ.
"ދިވެހިން އެދިއެދި ތިބި މަންޒިލަކީ، 21 ވަނަ ގަރުނުގެ ތަރައްގީ. އެ މަންޒިލާ ދިވެހި ރައްޔިތުންނާ ދެމެދަށް ހުރަސްވެފައި އޮތީ، ދިވެހި ރައްޔިތުން އުޅެންޖެހިފައިވާ ހާލަތު. މާތް ﷲގެ ވާގިފުޅާއެކު މިދިޔަ ފަސް އަހަރުގެ ތެރޭގައި، އަޅުގަނޑުމެންގެ އަމާޒަކަށް ހެދީ، އެ ހާލަތު ބަދަލުކޮށް ތަރައްގީގެ ސަރާސަރު ރާސްތާއަށް ދިވެހިން ނެރެދިނުން،" ރައީސް ވިދާޅުވި އެވެ.
މިއަދު ދިވެހިރާއްޖެއިން ފާހަގަ ކުރަނީ 58 ވަނަ މިނިވަން ދުވަހެވެ. ރާއްޖެއަށް މިނިވަންކަމުގެ އެއްބަސްވުމުގައި ޖުލައި 26، 1965 ގައި އެއިރުގެ ރައީސް އިބްރާހިމް ނާސިރުގެ ވެރިކަމުގައި ސޮއި ކުރީ 77 އަހަރު އިނގިރޭސިވިލާތުގެ ހިމާޔަތް ދަށުގައި އޮވެފަ އެވެ.
