ޕީޕީއެމް/ޕީއެންސީގެ ރިޔާސީ ކެންޑިޑޭޓު އަދި ކުރީގެ ރައީސް އަބްދުﷲ ޔާމީންގެ އިންތިހާބީ ހައްގުތައް ކަށަވަރުކޮށްދިނުމަށް އެދި ސުޕްރީމް ކޯޓަށް ހުށަހެޅި އާ މައްސަލަ ބޭރުކޮށްލި ނަމަވެސް އަދިވެސް ޔާމީނުގެ ކެންޑިޑެސީއާމެދު އުންމީދު ނުގެއްލޭ ކަމަށް ޕީޕީއެމުން ބުނެފި އެވެ.
މިކަމާ ގުޅިގެން ޕީޕީއެމްގެ ނައިބު ރައީސް އަހުމަދު ޝިޔާމް ވަނީ އެ ޕާޓީގެ ލީޑަޝިޕުން ޔާމީނުގެ ކެންޑިޑެސީއާ ގުޅޭގޮތުން ދެއްވާ ޖަވާބު ތަކުރާރުކުރައްވާފަ އެވެ. އެގޮތުން ޝިޔާމް ވިދާޅުވީ އެ ޕާޓީގެ ކެންޑިޑޭޓަކީ ޔާމީނު ކަމަށާއި އިންތިހާބުގައި ވާދަކުރުމަށް ފޯމު ލުމުގެ މުއްދަތު އަދިވެސް ހުޅުވިފައިވާ ކަމަށެވެ.
"ފޯމު ލުމުގެ ވަގުތު ކައިރިވަނީ އެކަމަކު އަދިވެސް ވަގުތު އެބައޮތް، ރައީސް ކަމަށް ކުރިމަތިލުމުގެ މުއްދަތު ބަންދުވީކީވެސް ނޫން ދެއްތޯ، ހަގީގަތުގައި ރައީސް ޔާމީނުގެ ކެންޑިޑެސީއެއްވެސް ނޫން ދެއްތޯ ސުޕްރީމް ކޯޓުން އެ ރިޖެކްޓުކުރަނީ، ވެދާނެ ނޫންތޯ އަޅުގަނޑުމެން ރަނގަޅު މަސައްކަތްތަކެއް ކަމަށް މި ކުރަނީ" ޝިޔާމް ވިދާޅުވި އެވެ.
ޝިޔާމު ތަކުރާރުކުރެއްވީ ޔާމީނުގެ އިންތިހާބީ ހައްގު ނުގެއްލޭ ކަމެވެ.
"އަޅުގަނޑުމެން ކަނޑައަޅާފައިވާ ކެންޑިޑޭޓުގެ ހައްލު ނުގެއްލޭ އިރެއްގައި އަދި ގެއްލޭނެކަމަށް އަޅުގަނޑުމެން ގަބޫލުނުކުރާއިރު ކީއްކުރަންތޯ އެހެން [ކެންޑިޑޭޓެއްގެ] ވާހަކަ ކީއްވެގެންތޯ ދައްކަންވީ" ޝިޔާމު ވިދާޅުވި އެވެ.
ޕީޕީއެމް/ޕީއެންސީން ޔާމީނަށް ރިޔާސީ ޓިކެޓު ދިން ނަމަވެސް އިއްވާފައިވާ ޖަލު ހުކުމް ދެމިއޮތްހާ ހިނދަކު ޔާމީންގެ ކެންޑިޑެސީ ބަލައިނުގަންނާނެ ކަމަށް އިލެކްޝަންސް ކޮމިޝަން (އީސީ) ގެ ރައީސް ފުއާދު ތައުފީގު މީގެކުރިން ވިދާޅުވެފައިވެ އެވެ.
ޔާމީންގެ މައްޗަށް 11 އަހަރުގެ ޖަލު ހުކުމެއް ކްރިމިނަލް ކޯޓުން އިއްވީ ވ. އާރަށް ކުއްޔަށް ދިނުމުގެ މުއާމަލާތުގައި ޔޫސުފް ނައީމްގެ އަތުން ޔާމީން ރިޝްވަތުގެ ގޮތުގައި 1.1 މިލިއަން ޑޮލަރު ނަންގަވައި އެ ފައިސާ ލޯންޑަރ ކުރެއްވިކަން ސާބިތުވާ ކަމަށް އެ ކޯޓުން ކަނޑައެޅުމަށް ފަހުގަ އެވެ.
އެ ހުކުމުގެ އިސްތިއުނާފު ހައި ކޯޓުގައި މިދިޔަ މަހުގެ ތެރޭގައި ފެށި ނަމަވެސް، އީދު ބަންދަށް ފަހު ބާއްވާފައި ވަނީ އެންމެ އަޑުއެހުމެކެވެ. ބެންޗުގައި ހިމެނޭ ފަނޑިޔާރު ހުޒައިފާ މުހައްމަދު އާއިލީ ޒިންމާއެއްގައި ޗުއްޓީގައި ހުންނެވިއިރު، މިހާރު ފަނޑިޔާރު މުހައްމަދު ސަލީމް ހުންނެވީ ޗުއްޓީގަ އެވެ.
ޝިޔާމް ވިދާޅުވިހެން ޕީޕީއެމް އިން އަދިވެސް ބުނަނީ އެ ޕާޓީގެ ކެންޑިޑޭޓަކީ ޔާމީން ކަމަށެވެ. ޔާމީނަށް ވާދަނުކުރެވިއްޖެ ހާލަތެއްގައި އަމަލު ކުރާނެ ގޮތުގައި މަޝްވަރާ އެތެރޭގައި ކުރެވެމުން ދާއިރު، އެ ކަމުގައި ހިޔާލު ތަފާތުވުންތަކެއް ވެސް އެބަ އުޅެ އެވެ. އެ ވާހަކަ ފާޅުގައި ދައްކަން ލީޑާޝިޕުން އަންނަނީ ދެކޮޅު ހަދަމުންނެވެ.
