ޖަލު ހުކުމެއް ތަންފީޒު ކުރައްވަމުން ގެންދަވާ ޕީޕީއެމް/ޕީއެންސީގެ ރިޔާސީ ކެންޑިޑޭޓު އަދި ކުރީގެ ރައީސް އަބްދުﷲ ޔާމީންގެ ކެންޑިޑެސީ ފޯމު ފުރިހަމަ ކުރުމަށް ފަހު، ޕީޕީއެމްގެ ސެކްރެޓޭރިއަޓާ މޯލްޑިވްސް ކަރެކްޝަނަލް ސާވިސްއިން ދެންމެ ހަވާލުކޮށްފި އެވެ.
ރިޔާސީ އިންތިހާބަށް 47 ދުވަހަށް ވެފައިވާއިރު, ޕީޕީއެމްގެ ޓިކެޓުގައި ވާދަކުރާނެ ކަމަށް އިއުލާން ކޮށްފައިވާ ރައީސް ޔާމީން ގެންދަވަނީ 11 އަހަރުގެ ޖަލު ހުކުމެއް މާފުށީ ޖަލުގައި ތަންފީޒު ކުރައްވަމުންނެވެ.
އެެހެންވެގެން އިންތިހާބަށް ކުރިމަތިލުމަށް ހުށަހަޅަން ޖެހޭ ކެންޑިޑެސީ ފޯމު ޔާމީން ފުރުއްވުމުގެ ކަންކަމުގައި ޕީޕީއެމްގެ ފަރާތުން, ކަރެކްޝަންސްގެ އެހީތެރިކަމަށް ވަނީ އެދިފަ އެވެ. އަދި, އެކަމުގައި އެ ޕާޓީއަށް ބޭނުންވާ އެއްބާރުލުން ދޭނެ ކަމަށް އެ އިދާރާއިން ބުނެފައިވެ އެވެ.
"އަދަދު" ނޫހަށް އެނގިފައިވާ ގޮތުގައި މިއަދު މެންދުރު ފަހު ޕީޕީއެމްގެ ފަރާތުން އެ ފޯމު ވަނީ ކަރެކްޝަންސްއަށް ހަވާލުކޮށްފަ އެވެ. ކެންޑިޑެސީ ފޯމުގެ އިތުރުން ކުށުގެ ރެކޯޑު ވެސް ވަނީ އެ ހިދުމަތަށް ހަވާލުކޮށްފަ އެވެ.
އަދި, މީގެ ކުޑަ ވަގުތުކޮޅެއް ކުރިން އެމަނިކުފާނު ސޮއިކުރައްވާފައިވާ ފޯމު ކަރެކްޝަނުން ހަވާލުކޮށްފައިވާކަން ކޮމިޝަނާ އޮފް ޕްރިޒަންސް އަހުމަދު މުހައްމަދު ފުޅު ވަނީ "އަދަދު" ނޫހަށް ޔަގީންކޮށްދީފަ އެވެ. އޭގެ އިތުރުން, އެމަނިކުފާނުގެ ކުށުގެ ރެކޯޑު ސާފުކުރާ ފޯމުގައި ޖަހަން ޖެހޭ ކަރެކްޝަންސްގެ ތަތްގަނޑު ވެސް ޖަހާފައިވާ ކަމަށް އޭނާ ވިދާޅުވި އެވެ.
ޕީޕީއެމުން ވެސް ވަނީ އީސީއަށް ހުށަހަޅަން ޖެހޭ ލިޔެކިޔުންތަކުގައި ޔާމީން ސޮއިކުރައްވައި އެ ލިޔެކިޔުންތައް އެ ޕާޓީއާ ހަވާލުކޮށްފައިވާކަން ހާމަކޮށްފަ އެވެ.
ޔާމީންގެ މައްޗަށް 11 އަހަރުގެ ޖަލު ހުކުމެއް ކްރިމިނަލް ކޯޓުން އިއްވީ ވ. އާރަށް ކުއްޔަށް ދިނުމުގެ މުއާމަލާތުގައި ޔޫސުފް ނައީމްގެ އަތުން ޔާމީން ރިޝްވަތުގެ ގޮތުގައި 1.1 މިލިއަން ޑޮލަރު ނަންގަވައި އެ ފައިސާ ލޯންޑަ ކުރެއްވި ކަމަށް ސާބިތުވުުމުންނެވެ.
އެ ހުކުމުގެ އިސްތިއުނާފު ހައި ކޯޓުގައި މިދިޔަ މަހު ފެށި ނަމަވެސް، އީދު ބަންދަށް ފަހު އަޑުއެހުމެއް ބޭއްވިފައެއް ނުވެ އެވެ. ފުރަތަމަ ބެންޗުގައި ހިމެނޭ ފަނޑިޔާރު ހުޒައިފާ މުހައްމަދު އާއިލީ ޒިންމާއެއްގައި ޗުއްޓީގައި ހުންނެވިއިރު، މިހާރު ފަނޑިޔާރު މުހައްމަދު ސަލީމް ހުންނެވީ ޗުއްޓީގަ އެވެ.
އިސްތިއުނާފު މައްސަލަ ހައި ކޯޓުގައި ލަސްވާތީ އެމަނިކުފާނުގެ އިންތިހާބީ ހައްގެއް އުނިވެފައިވާ ކަމަށް ބުނެ ސުޕްރީމް ކޯޓަށް ދުސްތޫރީ މައްސަލަ، އެކޯޓުން ބަލައިނުގެން އިއްޔެ ވަނީ ބޭރުކޮށްލާފަ އެވެ. ނަމަވެސް ކަރެކްޝަންސްގެ އެހީތެރިކަމާއެކު ޔާމީނުގެ ކެންޑިޑެސީ ފޯމު ފުރުމަށް މިހާރު އޮތީ ފުރުސަތު ލިބިފަ އެވެ.
އޭގެ އިތުރަށް ރ. ފުއްގިރި ކުއްޔަށް ދިނުމުގެ މުއާމަލާތުގައި އަހުމަދު ކްރިކް ރިޒާ މެދުވެރިވެގެން އެ ރަށް ކުއްޔަށް ދިން ކުންފުނިން ޔާމީން ރިޝްވަތުގެ ގޮތުގައި 1.1 މިލިއަން ޑޮލަރު ނަންގައި، ސަންގެ ދެ ކުންފުންޏެއް މެދުވެރިކޮށް އެ ފައިސާ ލޯންޑަކުރި ކަމަށް ތުހުމަތުކޮށް ވެސް ދައުވާކޮށްފައިވެ އެވެ.
އެ މައްސަލައިގެ ޝަރީއަތް ކްރިމިނަލް ކޯޓުގައި ކުރިއަށް އެބަ ގެންދެ އެވެ. ކްރިކް ރިޒާގެ ބައި ގެންގޮސް، މިހާރު ކުރިއަށް ދަނީ ޔާމީނާއި ސަންގެ ދެ ކުންފުނީގެ މައްޗަށް ކޮށްފައިވާ ދައުވާތަކުގެ ބައެވެ. އެ މައްސަލައިގެ އަޑުއެހުންތައް ކައިރިކައިރީގައި ބާއްވަމުން އެބަ ގެންދެ އެވެ.
އިލެކްޝަންސް ކޮމިޝަނުން މިހާރު ވަނީ ކެންޑިޑޭޓުން ކުރިމަތިލުމުގެ ފުރުސަތު ހުޅުވާލާފަ އެވެ. އަންނަ މަހު ހަތް ވަނަ ދުވަހަ ހަމައަށް އެ ފުރުސަތު ހުޅުވާލާފައި ވާއިރު, އަދި މިހާތަނަށް އެއްވެސް ކެންޑިޑޭޓަކު ފޯމު ހުށަހަޅާފައެއް ނުވެ އެވެ.
ޔާމީންގެ މައްޗަށް އިއްވާފައިވާ ޖަލު ހުކުމް ދެމިއޮތްހާ ހިނދަކު، އެމަނިކުފާނުގެ ކެންޑިޑެސީ ފޯމު ބަލައިނުގަނެވޭނެ ކަމަށް އިލެކްޝަންސް ކޮމިޝަން (އީސީ) ގެ ރައީސް ފުއާދު ތައުފީގު ވަނީ ވިދާޅުވެފަ އެވެ.
ގާނޫނީ އަސާސީގައި ބަޔާންކޮށްފައިވާ ރައީސުލްޖުމްހޫރިއްޔާއަށް ވުމުގެ އެއް ޝަރުތަކީ، ޖިނާއީ ކުށެއްކުރިކަން ސާބިތުވެގެން 12 މަސް ދުވަހަށް ވުރެ ދިގު މުއްދަތެއްގެ ހުކުމެއް އޮތް ނަަމަ، އެ ހުކުމް ތަންފީޒުކޮށް ނިމުނުތާ ނުވަތަ ކަނޑައެޅުނު އަދަބު މައާފު ކުރެވުނުތާ ތިން އަހަރު ވެފައިވާ މީހަކަށް ވުމެވެ.
ޔާމީނަށް ވާދަނުކުރެވޭ ހާލަތުގައި ނެރޭނެ ކެންޑިޑޭޓަކާ ގުޅޭ ގޮތުން ފާޅުގައި ވާހަކަ ދައްކަން ޕީޕީއެމް/ޕީއެންސީގެ ލީޑާޝިޕުން އަންނަނީ ދެކޮޅު ހަދަމުންނެވެ. އެ ކަމުގެ މަޝްވަރާ އެތެރޭގައި ކުރެވެމުންދާއިރު، ކެންޑިޑޭޓާ މެދު އަދި ޕީޕީއެމުން އިންތިހާބުގައި ވާދަކުރުމާ މެދު ހިޔާލު ތަފާތުވުންތަކެއް އެބަ އުޅެ އެވެ.
