މިފަހަރުގެ ރިޔާސީ އިންތިހާބަށް އެމްޑީޕީން އެކުލަވާލާފައިވާ މެނިފެސްޓޯ އެއްކޮށް, އެއްފަހަރާ އާންމު ނުކުރާނެ ކަމަށް އެ ޕާޓީން ބުނެފި އެވެ.
ޗެއާޕާސަންގެ ނައިބު އިބްރާހިމް ވަހީދު (އިބްރޭ) މިއަދު "އަދަދު" އަށް ވިދާޅުވީ އެ ޕާޓީގެ މެނިފެސްޓޯ ފައިނަލްވެފައިވާ ކަމަށާއި, އެކަމަކު މެނިފެސްޓޯގައި ހިމެނޭ ހުރިހާ ކަމެއް އެއްފަހަރާ އިފްތިތާހު ނުކުރާނެ ކަމަށެވެ. އޭނާ ވިދާޅުވީ މެނިފެސްޓޯގައި ހިމެނޭ ކަންކަން އިފްތިތާހު ކުރާނީ, އެކަމާ ގުޅޭ އިވެންޓުތަކުގައި ވަކިވަކިން ކަމަށެވެ.
"މެނިފެސްޓޯ އެއްކޮށް އިފްތިތާހެއް ނުކުރާނެ. އެކި ކަންކަން އެކި ފަހަރު ކުރާނީ. މިސާލަކަށް އަންހެނުންނާ ގުޅޭ ސިޔާސަތު އާންމުކުރާނީ އެކަމާ ގުޅޭ އިވެންޓެއްގައި" އިބްރޭ ވިދާޅުވި އެވެ.
ރިޔާސީ އިންތިހާބުގެ ކެމްޕޭން އެމްޑީޕީން ފަށައިގެން, މިހާތަނަށް ފަސް އަތޮޅެއްގެ 30 ރަށަކަށް ދަތުރުކޮށްފި އެވެ. އެ ޕާޓީގެ ކެންޑިޑޭޓް ރައީސް އިބްރާހިމް މުހައްމަދު ސޯލިހު ގެންދަވަނީ ކޮންމެ ރަށަކަށް ވަޑައިގެން އެ ރަށަކަށް ކޮށްދެއްވާނެ ކަންކަމަށް ވައުދުވެ ވަޑައިގަންނަވަމުންނެވެ.
އެމްޑީޕީން މެނިފެސްޓޯ އެކުލަވާލާފައި ވަނީ, ރާއްޖޭގައި މީހުން ދިރިއުޅޭ ހުރިހާ ރަށަކަށް އެ ޕާޓީގެ އޮފިޝަލުން ދަތުރުކޮށް, މައުލޫމާތު އެއް ކުރުމަށްފަހު އެވެ.
2018 ވަނަ އަހަރުގެ ރިޔާސި އިންތިހާބަށް އެމްޑީޕީން މެނިފެސްޓޯ ނެރުނީ, އެއްފަހަރާ އެވެ. އއ. އުކުޅަހުގައި ބޭއްވި އެ ޕާޓީގެ ތިން ވަނަ ކޮންގްރެސްގައި އާންމުކުރި އެ މެނިފެސްޓޯގައި ހިމެނެނީ މައިގަނޑު ފަސް ބައެކެވެ. އެއީ, ޖަޒީރާ ރާއްޖެ, ނޫ އިގްތިސޯދު, ފަހުރުވެރި އާއިލާ, އޯގާތެރި ސަރުކާރު އަދި އިންސާފެވެ.
