ވެރިކަން ކުރާ ޕާޓީ, އެމްޑީޕީގެ ފަރާތުން ދެވަނަ ދައުރަކަށް ކުރިމަތިލައްވާފައިވާ ރައީސް އިބްރާހިމް މުހައްމަދު ސޯލިހުގެ އިންތިހާބީ އެޖެންޓަކަށް ރައްޔިތުން މަޖިލީހުގެ ކިނބިދޫ ދާއިރާގެ މެންބަރު މުހައްމަދު ނާޝިޒް ހަމަޖައްސައިފި އެވެ.
ރައީސް ސޯލިހުގެ އިންތިހާބީ އެޖެންޓުގެ ގޮތުގައި ނާޝިޒް ހަމަޖައްސާފައިވާކަން އެމްޑީޕީގެ ޗެއާޕާސަންގެ ނައިބު އިދާރީ އިބްރާހިމް ވަހީދު (އިބްރޭ) ވަނީ "އަދަދު" އަށް ކަށަވަރުކޮށްދެއްވާފަ އެވެ.
އިންތިހާބީ އެޖެންޓަށް ނާޝިޒު ހަމަޖައްސާފައިވާއިރު, 'އަދަދު'އަށް އެނގިފައިވާ ގޮތުގައި މިހާރު ކުރިއަށް ދަނީ ރައީސް ސޯލިހާއި, ނާޝިޒުގެ ކުށުގެ ރިކޯޑް ސާފުކުރުމުގެ މަސައްކަތެވެ.
މިފަހަރުގެ އިންތިހަބީ އެޖެންޓުގެ ގޮތުގައި ނާޝިޒް ހަމަޖެއްސިއިރު, މިދިޔަ ޖެނުއަރީ ގައި ބޭއްވި އެމްޑީޕީގެ ރިޔާސީ ޕްރައިމަރީގައި ވެސް ނާޝިޒް ވަނީ ރައީސް ސޯލިހުގެ ކެމްޕޭން މެނޭޖަރުކަން ކުރައްވާފަ އެވެ.
ރައީސް ސޯލިހުގެ ކެމްޕޭން ފަށައިގެން ކުރިއަށްދާއިރު, މިހާތަނަށް އެމަނިކުފާނު ވަނީ ފަސް އަތޮޅެއްގެ 30 ރަށަށް ޒިޔާރަތް ކުރައްވާފަ އެވެ. ކެމްޕޭން ކުރިއަށް ދިޔަ ނަމަވެސް, އަދި މިހާތަނަށް ރައީސް ސޯލިހުގެ ރަނިންމޭޓަކީ ކޮން ބޭފުޅަކު ހާމައެއް ނުކުރައްވަ އެވެ.
ރައީސް ވިދާޅުވެފައިވާ ގޮތުގައި, ރަނިންމޭޓު ހޮވުމަކީ އެމަނިކުފާނަށް މިވަގުތަށް އުނަދަގޫ ނިންމުމެކެވެ. މިހާތަނަށް އައިއިރު އެމަނިކުފާނުގެ ރަނިންމޭޓު ކަމަށް ފާޅުގައި ޝައުގުވެރިކަން ފާޅުކުރައްވާފައި ވަނީ, މިހާރުގެ ނައިބު ރައީސް ފައިސަލް ނަސީމެވެ. މީގެ އިތުރުން ވެސް ފޮރިން މިނިސްޓަރު އަބްދުالله ޝާހިދު ވަނީ ނުސީދާކޮށް އެކަމަށް ޝައުގު ހުރިކަން ފާޅުކުރައްވާފަ އެވެ.
އިންތިހާބަށް 47 ދުވަހަށް ވެފައިވާއިރު, އިލެކްޝަންސް ކޮމިޝަނުން މިހާރު ވަނީ ކެންޑިޑޭޓުން ކުރިމަތިލުމުގެ ފުރުސަތު ހުޅުވާލާފަ އެވެ. އަންނަ މަހު ހަތް ވަނަ ދުވަހަ ހަމައަށް އެ ފުރުސަތު ހުޅުވާލާފައި ވާއިރު, އަދި މިހާތަނަށް އެއްވެސް ކެންޑިޑޭޓަކު ފޯމު ހުށަހަޅާފައެއް ނުވެ އެވެ.
ރިޔާސީ އިންތިހާބު 2023، އަދާހަމަ
މި އަހަރުގެ ރިޔާސީ އިންތިހާބުގެ ފުރަތަމަ ބުރުގެ ވޯޓުލުން އޮންނާނީ ސެޕްޓެމްބަރު މަހުގެ 9 އެއްގަ އެވެ. ދެ ވަނަ ބުރަކަށް ގޮސްފި ނަމަ އެ އިންތިހާބު ބާއްވާނެ ތާރީހެއްގެ ގޮތުގައި ކަނޑައަޅާފައި ވަނީ ސެޕްޓެމްބަރު 30 އެވެ. އިންތިހާބުގައި ވޯޓުލުމުގެ ހައްގު ލިބިގެންވާ މީހުންގެ އަދަދު 280،000 އަށް އަރަ އެވެ.
ރިޔާސީ އިންތިހާބުގައި މިފަހަރު ޖުމްލަ 604 ވޯޓުފޮށި ބެހެއްޓުމަށް އީސީއިން ވަނީ ނިންމާފަ އެވެ. އޭގެތެރޭގައި ހިމެނެނީ، މާލެ ސަރަހައްދުގައި ބެހެއްޓޭ 187 ފޮއްޓާއި، އަތޮޅު ތެރޭގައި ބެހެއްޓޭ 319 ފޮށިީގެ އިތުރުން، ރިސޯޓުތަކުގައި 78 ފޮށި، ރާއްޖެއިން ބޭރުގައި 13 ފޮށި، އަދި ޖަލުތަކާއި ސިނާއި ރަށްރަށުގައި ހަތް ފޮއްޓެވެ. ނަމަވެސް، އިތުރު 23 ރިސޯޓުގައި ވޯޓުފޮށި ބެހެއްޓުމުގެ ފުރުސަތު ދިނުމަށް އީސީން ނިންމާފައިވާއިރު ޖުމްލަ ވޯޓު ފޮށީގެ އަދަދުތަކަށް ބަދަލު އައުން އެކަށީގެންވެ އެވެ.
އިލެކްޝަންސް ކޮމިޝަނުން މިހާރު ވަނީ ރީ-ރަޖިސްޓާވުމުގެ ފުރުސަތު ހުޅުވާލާފަ އެވެ. އެ ފުރުސަތު އޮގަސްޓް ފަހަކާ ހަމައަށް ހުޅުވާލާފައިވާއިރު, އޮންލައިިންކޮށް ރީ-ރަޖިސްޓާ ކުރެވޭނީ މިމަހުގެ ނިޔަލަށެވެ.
