ރައްޔިތުންގެ މަޖިލީހުގެ ރައީސް މުހައްމަދު ނަޝީދު އުފެއްދެވި ދަ ޑިމޮކްރެޓްސްއިން ކުރިއަށް އޮތް ރިޔާސީ އިންތިހާބުގައި ޕީޕީއެމް ގެ ފަހަތަށް ނާރާނެ ކަމަށް އެ ޕާޓީގެ ރިޔާސީ ޓިކެޓަށް ކުރިމަތިލައްވާފައިވާ، ހުޅުދޫ ދާއިރާގެ މެންބަރު އިލްޔާސް ލަބީބު ވިދާޅުވެއްޖެ އެވެ.
"އަދަދު"ގެ 'އެތެރެފުށް' ޕްރޮގްރާމްގައި އިލްޔާސް ވިދާޅުވީ ސެޕްޓެމްބަރު 9 ގައި ބާއްވާ ރިޔާސީ އިންތިހާބުގައި ޑިމޮކްރެޓުން ޕީޕީއެމްގެ ފަހަތަކަށް ނާރާނެ ކަމަށެވެ. އަދި މަޝްވަރާ ކުރަނީ އެންމެން އެކުގައި މަސައްކަތް ކުރެވޭނެ ކެންޑިޑޭޓަކު ހޯދުމަށް ކަމަށް ވެސް، ޕީޕީއެމްގެ ވެރިކަމުގައި އޭރުގެ ރައީސް އަބްދުﷲ ޔާމީނަށް އެންމެ ބޮޑަށް ފާޑުވިދާޅުވި އެއް މެންބަރު އިލްޔާސް ވިދާޅުވި އެވެ.
"[ރިޔާސީ އިންތިހާބުގައި] ޕީޕީއެމްގެ ފަހަތަކަށް އަޅުގަނޑުމެން ނާރާނަން، އަޅުގަނޑުމެން ޕާޓީން ނިންމާނީ، އަޅުގަނޑުމެންނާ ޖޭޕީ އަދި އެމްއެންޕީ ކޮމަން ކެންޑިޑޭޓަކު ނެރެގެން އޭނައާ އެކީ އެ ކެންޑިޑޭޓަކާ އެކީ [ހުރިހާ ޕާޓީތަކަށްވެސް މަސައްކަތް ކުރަން]" އޭނާ ވިދާޅުވި އެވެ.
ޕާޓީތަކަށް އެއްބަސްވެވޭ ކެންޑިޑޭޓަކީ ޕީޕީއެމްގެ ކެންޑިޑޭޓަކަށް ވެއްޖެނަމަ ކަންތައް ކުރައްވާނީ ކިހިނެއްތޯ އެހުމުން އިލްޔާސް ވިދާޅުވީ، މަޝްވަރާ ކުރަމުންދަނީ އެއްވެސް ޕާޓީއެއްގެ "ހާޑްކޯ" މީހަކު ނުނެރެ، އެންމެން އެއްބަސްވެވޭ އަދި ރައްޔިތުން ބަލައިގަންނަ ކެންޑިޑޭޓަކު ހޯދިއްޖެ ހާލަތުގައި ފަހަތަށް ޖެހެން ކަމަށެވެ.
ނަމަވެސް ޕީޕީއެމް ކެންޑިޑޭޓެއްގެ ރަނިން މޭޓަކަށް ޑިމޮކްރެޓްސްގެ މެންބަރަކު ނެރުމުގެ ވިސްނުން ނެތް ކަމަށާއި އެކަމާމެދު މަޝްވަރާ ވެސް ނުކުރާ ކަމަށް އިލްޔާސް ވިދާޅުވި އެވެ.
ރިޔާސީ އިންތިހާބުގައި 'ކޮމަން' ކެންޑިޑޭޓަކު ނެރުމުގެ ހިޔާލު ފުރަތަމަ ހުށަހެޅުއްވީވެސް ދަ ޑިމޮކްރެޓްސްގެ ނަޝީދެވެ. އެއަށްފަހު މި މަހު 19 ގައި އެމަނިކުފާނާއި، ޖޭޕީގެ ލީޑަރު ގާސިމް އިބްރާހިމާއި އެމްއެންޕީގެ ރައީސް މުހައްމަދު ނާޒިމް ބައްދަލުކުރައްވާ، ޕީޕީއެމް ރުހޭނަމަ، އިދިކޮޅު ހުރިހާ ސިޔާސީ ޕާޓީއަކުން އެއް ކެންޑިޑޭޓަކު ނެރެން އެއްބަސްވި އެވެ.
"އަޅުގަނޑުމެން އަދި ޕީޕީއެމާއި އެމްއާރުއެމް ވެސް ވާހަކަ ދައްކާނަން، މި ކަމަށް އެއްބަސްވެވޭތޯ، އަޅުގަނޑުމެން ތިން ޕާޓީން ބޭނުންވަނީ އެއް ކެންޑިޑޭޓަކު ނެރެން މި ރިޔާސީ އިންތިހާބަށް،" ރައްޔިތުންގެ މަޖިލިހުގެ މާމިގިލި ދާއިރާގެ މެންބަރު ގާސިމް ވިދާޅުވި އެވެ.
ޕީޕީއެމް ނުރުހޭ ހާލަތެއްގައި، އެއް ކެންޑިޑޭޓަކަށް އެއްބަސްވެވޭ ތިން ޕާޓީ ގުޅިގެން އެއް ކެންޑިޑޭޓަކު ނެރޭނެތޯ "އަދަދު" އިން ސުވާލު ކުރުމުން ގާސިމް އޭރު ވިދާޅުވީ އެ ބައްދަލުވުމުގައި އެއްބަސްވެވުނު ކަމަކީ ހުރިހާ ޕާޓީއަކަށް ވެސް އެއްބަސްވެވޭ އެއް ކެންޑިޑޭޓަކު ހޯދުން ކަމަށެވެ.
ނަމަވެސް ޕީޕީއެމުން އެ ޕާޓީތަކަށް ރައްދުދީ ބުނީ، އެ ޕާޓީގެ ކެންޑިޑޭޓަކީ ޖަލުގައި ހުންނެވި ކުރީގެ ރައީސް އަބްދުﷲ ޔާމީން ކަމަށެވެ. މީޑިއާތަކަށް މައުލޫމާތު ދިނުމަށް އޮންނަ އެ ޕާޓީގެ ވަޓްސްއެޕް ގްރޫޕަށް ޕާޓީގެ ސެކްރެޓަރީ ޖެނެރަލް މުހައްމަދު ތޮލާލް ފޮނުއްވި މެސެޖުގައި ވިދާޅުވީ އެ ޕާޓީން އެދެނީ އެއްބަސްވެވޭ އެއް ކެންޑިޑޭޓަކީ ޔާމީން ކަމަށް ކަނޑައެޅުމަށެވެ.
އެއް ކެންޑިޑޭޓެއްގެ ވާހަކަ ދައްކާއިރު، ޑިމޮކްރަޓްސް، ޖޭޕީ އަދި އެމްއެންޕީއިން ވެސް ދަނީ ޕާޓީގެ ކެންޑިޑޭޓު ނެރުމަށް ތައްޔާރު ވަމުންނެވެ.
