ރާއްޖޭގެ މަޝްހޫރު ކޮމީޑިއަން އަހުމަދު ޝާހިދު ހަލީމް މިއަދު ހެނދުނު އަވަހާރަވެއްޖެ އެވެ.
މުސްކުޅި ބަލީގައި ޝާހިދުގެ ހާލަތު ގޯސްވުމުން، އައިޖީއެމްއެޗް ގައި އޭނާ އަށް ފަރުވާ ދެމުން އަންނަތާ ދުވަސްކޮޅެއް ވަނީ ވެފަ އެވެ.
ދިވެހިންގެ ތެރޭގައި ޝާހިދު އެންމެ ފުރަތަމަ މަޝްހޫރުވީ ކުޅަދާނަ މުމައްސިލެއްގެ ގޮތުގަ އެވެ. އެގޮތުން ރާއްޖޭގެ ސްޓޭޖް ތަމްސީލުގެ ރަން ދުވަސްވަރު ކަމަށްވާ 1970ގެ ތެރޭގައި އޭނާ ވަނީ އެތައް ތަމްސީލެއް ކުޅުއްވައިފަ އެވެ. އެންމެ ފާހަގަކުރެވެނީ އިބްރާހިމް ނާސިރުގެ ރައީސްކަމުގައި މިނިވަން ދުވަސް ފާހަގަކުރުމަށް ލޮނުޒިޔާރަތްކޮޅުގައި ސްޓޭޖް ހަދައިގެން ކޮޕީ މުހައްމަދު ރަޝީދާއި، ޗިޅިޔާ މޫސާމަނިކުއާ އެކު ކުޅުއްވި 'ތިން އުނދަގޫ' ތަމްސީލެވެ. މީގެ އިތުރުން 'ކުއްލި ދިއްލުމެއްގައި ސާހިބުގެ ބުމަރު' މިއީ ވެސް ފާހަގަކުރެވޭ ތަމްސީލެކެވެ.
ޝާހިދު (މެދުބަރީގެ ވާތް ފަރާތުގައި)
ސަރުކާރުން ވަނީ ޝާހިދަށް ތަމްސީލުކުޅުމުގެ ރޮނގުން 1986 ވަނަ އަހަރު އާއްމުހިދުމަތުގެ ހިތްވަރު ދިނުމުގެ އިނާމު ދީފަ އެވެ.
"ތަމްސީލުގެ ދުނިޔޭގައި އެއީ ކުޑަކުޑަ ތުއްތު ތުއްތު ކުއްޖެކެވެ. މިދެންނެވި ފަންނުގައި އޭނާ ތުއްތު ވާހަކައެއް ނޫނެވެ. ނަމަވެސް އަދާކުރައްވާ ބައިގެގޮތުން ކިތަންމެ ކުޑަކުޑަ ކުއްޖެއްގެ ބައިވެސް އަހުމަދު ޝާހިދު ވަރަށް މޮޅަށް ކުޅުއްވަ އެވެ،" އިނާމު ފޮތުގައި ޝާހިދުގެ ތައާރަފުގައި ރައީސް އޮފީހުން ލިޔެފައިވެ އެވެ.
މިއަދުގެ ޖީލަށް ޝާހިދު އެނގެނީ ޓީވީ މޯލްޑިވްސް އިން 1980ގެ ފަހުކޮޅު އުފެއްދި 'ބަހަބަރު' ޝޯ ގައި ކުޅުއްވި ހެއްވާ މަޖާ ރޯލުންނެވެ. ފީބޯ އަހުމަދު މަނިކާއި، ކޮއްޔަ ހަސަން މަނިކާ އެކު، ޝާހިދު އެ ޝޯ ގައި އަދާކުރެއްވި ރޯލު އަދިވެސް ގިނަ ބައެއްގެ ހަނދާނުގައި ހަރުލާފައިވެ އެވެ.
ޝާހިދަކީ ޅެންވެރިއެއް ވެސް މެ އެވެ. ހާއްސަކޮށް ސަމާސާއަދަބުގެ ޅެން ހެއްދެވުމުގައި އޭނާ ފާހަގަކުރެވެ އެވެ. ގަލަމީ ނަމެއް ބޭނުންކުރައްވައިގެން ވަރަށް ގިނަ ޅެން ހެއްދެވި ޝާހިދުގެ ޅެންތައް 'އާބާރު' އާއި 'ފަތްތޫރަ' މަޖައްލާގައި ޝާއިއުކޮށްފައިވެ އެވެ.
ބައްޕަ މޫސާ ހަލީމް ހިންގެވި މަދަރުސަތުލް އަހްރާރުގައި މުދައްރިސްކަން ކުރެއްވި ޝާހިދު ގިނަ ދުވަހު ވަޒީފާ އަދާކުރެއްވީ އެޓޯލްސް މިނިސްޓްރީގަ އެވެ. އެންމެ ފަހުން މަސައްކަތްކުރެއްވީ މާފަންނު އަވަށު އޮފީހުގަ އެވެ.
ޝާހިދުގެ ކުދިންގެ ތެރެއިން މޫސާ ރިލްވާން އަކީ ޓީވީ މޯލްޑިވްސްގެ ކުޅަދާނަ ހުށަހެޅުންތެރިއެކެވެ. ޝާހިދުގެ ކޮއްކޮ މުހައްމަދު ޝާހިދު ހަލީމަކީ ރާއްޖޭގެ ފާހަގަކޮށްލެވޭ ޅެންވެރިއެކެވެ. އަދި އެއީ ކުރީގެ ކުޅިވަރު ތަރިއެއް ވެސް މެ އެވެ.
