މި އަހަރު ފެށުނީއްސުރެ ތައްޔާރުވަމުން އަންނަނީ ވިޒިޓް މޯލްޑިވްސް ޕްރޯ އަށް ކަމަށާއި، މި އަހަރުގެ މުބާރާތަކީ ވެސް ކާމިޔާބު މުބާރާތަކަށް ވާނެ ކަމަށް އުއްމީދުކުރާ ކަމަށް އެއް ވަނަ ބޮޑީބޯޑަރު އަލީ ޚުޝްރުވާން އަލީ (ކުޑަ އައްޔަ) ބުނެފި އެވެ.
އައިބީސީ ވޯލްޑް ޓުއާގައި ހިމެނޭ ވިޒިޓް މޯލްޑިވްސް ޕްރޯ 2023 އޮންނާނީ އަންނަ މަހުގެ 3-12 އަށް މާލޭގެ ވަރުނުލާ ރާޅުގަނޑު ސަރަހައްދުގަ އެވެ. މި މުބާރާތުގަައި ދުނިޔޭގެ 18 ގައުމެއްގެ އެންމެ މަތީ ފަންތީގެ ބޮޑީބޯޑަަރުން ބައިވެރިވާނެކަމަށް ބެލެވެ އެވެ.
ބޮޑީބޯޑިންގެ ދުނިޔޭގެ ފަންތީގެ އެންމެ މަތީ މުބާރާތުގައި މިދިޔަ އަހަރު ވާދަކޮށް ރާއްޖޭގެ ޗެމްޕިއަން ކުޑައައްޔަ ވަނީ އޯޕަން ބައިގެ ކުއާޓާ ފައިނަލުން ޖާގަ ހޯދި އެވެ. އަދި ޑްރޮޕް ނީ ބައިގެ ސެމީ ފައިނަލުންވެސް އޭނާ ޖާގަ ހޯދި އެވެ.
މި އަހަރުގެ ތައްޔާރީތަކާ ގުޅޭގޮތުން ކުޑައައްޔަ ބުނީ މި އަހަރު ފެށުނީއްސުރެ އަންނަނީ މުބާރާތަށް ތައްޔާރުވަމުން ކަމަށާއި، ރާއްޖޭގެ އެކި ސަރަހައްދުތަކުގައި ރާޅާ އަޅައި ފިޓްވަމުން އަންނަ ކަަމަށެވެ. މިދިޔަ ހަފްތާއިން ފެށިގެން މިހާރު އަމާޒު ހުރީ ވަޒީފާ ވެސް އެއް ކައިރިކޮށްލާފައި މުބާރާތުގެ ކުރިން މިއޮތް ދެ ހަފްތާ އެއްކޮށް މުބާރާތަށް ފޯކަސްކުރުން ކަމަށް އޭނާ ބުންޏެވެ.
"ވަރަށް ބޮޑަށް ހަމަ ފިޓުކޮށް މި ހުރީ. ދެން ކުރީބައިގައި ވަޒީފާ ކުޑަކޮށް އެއް ކައިރި ކޮށްލާފައި މިއައީ، މި މުބާރާތަށް ހަމަ ފިޓުވުމުގެ ގޮތުން. އެއީ ދިހަ ދުވަސް ކުރިން މި އައީ. ހަމަ އަޅުގަނޑު ޓްރެއިނިން ފަށާނަން މިކޮޅުގައި. ހީކުރަން މިފަހަރު ވެސް ރަނގަޅު ކާމިޔާބެއް ދިވެހިރާއްޖެ އަށް ލިބޭނެ ކަމަށް." ރާއްޖޭގެ އެންމެ ކާމިޔާބު ބޮޑީބޯޑަރު ބުންޏެވެ.
ރާއްޖޭގެ މޫދު ކުޅިވަރުގެ އެތުލީޓުންނަށް ސަޕޯޓްކުރުމަށް ހާއްސަކޮށް ތައާރަފްކުރި "ރާޅު ރާއްޖެ" ކެމްޕެއިން ލޯންޗު ކުރުމުގެ ހަފްލާގައި ވާހަކަދައްކަމުން އައްޔަ ބުނީ މިދިޔަ އަހަރުވެސް ސަޕޯޓަރުންގެ އެހީއާއިއެކު ރަނގަޅު ކާމިޔާބެއް ހޯދަން ހިތްވަރު ލިބުނު ކަމަށާއި، މިއަހަރުވެސް ވީހާވެސް ގިނަ ދިވެހިން ސަޕޯޓްކުރަން އަންނާނެކަމަށް އުއްމީދުކުރާކަމަށެވެ.
ވިޒިޓް މޯލްޑިވްސް ޕްރޯގެ މިދިޔަ އަހަރުގެ މުބާރާތުގެ ޖޫނިއާ ބައިގައި ވާދަކޮށް ރާއްޖޭގެ އާމިން އުމަރު މޫސާ ދެވަނަ ހޯދި އެވެ.
މިއަހަރުގެ މުބާރާތޓާ ގުޅޭގޮތުން އާމިން ބުނީ މިދިޔަ އަހަރަށްވުރެ ރަނގަޅު ޕާފޯމަންސެއް ދައްކަން މަސައްކަތްކުރާނެކަމަށާއި، ދުރާލާ ތައްޔާރުވަމުން އަންނަކަމަށެވެ.
ވައިލްޑް ކާޑް ދެ އެތުލީޓުންގެ ގޮތުގައި މިފަހަރު އާމިން އާއި ކުޑަ އައްޔައަށް އެޑްވާންޓޭޖެއް ލިބޭނެއެވެ. މިގޮތުން އޯޕަން ބައިގައި އައްޔަ ވާދަކުރަން ފަށާނީ ގަދަ 32 އާ ހިސާބުންނެވެ. އަދި ޖޫނިއާ ބައިގައިވެސް އާމިން ވާދަކުރާނީ ސީޑްކޮށްފައިވާ ބޮޑީބޯޑަރުންނާ ހިސާބުންނެވެ.
މީގެ އިތުރުން ކޮންމެ ކެޓަގަރީއަކުން ހަތަރު އެތުލީޓަކަށް އެމްބީބީއޭ އިން ވަނީ ފްރީ ޕާސް ދީފަ އެވެ. ފިރިހެން ބައިން ފްރީ ޕާސް ލިބުނީ ކުޑަ އައްޔަ، އާމިން، އަޝްރަފް ހަސަން، އަދި އަލީ ޖާވިދު އަށެވެ.
ޖޫނިއާ ބައިން ފްރީ ޕާސް ލިބުނީ އާމިން، އިޔާން އަހުމަދު، މުހައްމަދު ޖަރީޝް ޖިހާދު އަދި މުހައްމަދު ކައިފް އަށެވެ. ފްރީ ޕާސް ދިނުމުގައި ބަލާފައިވަނީ އެންމެ ފަހުން ނިމުނު ބުރުނު ޝިކާރު ޗެލެންޖުގެ ނަތީޖާތަކާއި ގައުމީ ޓީމުގެ ރޭންކިން އަށެވެ.
މި އެތުލީޓުންގެ އިތުރުން ވެސް ރާއްޖޭގެ އިތުރު ބޮޑީބޯޑަރުންވަނީ މިހާތަނަށް މުބާރާތުގައި ރަޖިސްޓްރީވެފަ އެވެ. އެމްބީބީއޭ އިން މައުލޫމާތު ދޭ ގޮތުގައި ރާއްޖޭގެ 14 ބޮޑީބޯޑަރަކު މިފަހަރުގެ މުބާރާތުން ފެންނާނެ އެވެ.
