މޫދު ކުޅިވަރުގެ ބައިނަލްއަގްވާމީ މުބާރާތްތަކުގައި ވާދަކުރާ ގައުމީ ޓީމުތަކަށް ހިތްވަރުދީ ސަޕޯޓްކުރުމުގެ ގޮތުން "ރާޅު ރާއްޖެ" ނަމުގައި ހާއްސަ ކެމްޕެއިނެއް މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ) އިން ފަށައިފި އެވެ.
އަންނަ މަހު ވަރުނުލާ ރާޅުގަނޑުގައި ފަށާ ވިޒިޓް މޯލްޑިވްސް ޕްރޯ 2023 އާ ދިމާކޮށް އެމްބީބީއޭއިން ފެށި "ރާޅު ރާއްޖެ" ކެމްޕެއިން ރަސްމީކޮށް ފައްޓައިދިނީ ރާއްޖޭގެ އެންމެ ކާމިޔާބު ސާފަރު ހުސައިން އަރީފް (އިބޫ) އެވެ.
"ރާޅު ރާއްޖެ" ކެމްޕެއިނު ތެރޭގައި މޫދު ކުޅިވަރު އެތުލީޓުންނަށް ސަޕޯޓްކުރުމަށް ހާއްސަ ޓީޝާޓާއި، ސްޓިކާ ޕެކްސް އަދި ގައުމީ ދިދަ އާއި އެހެނިހެން ސާމާނު ހިމެނެ އެވެ. މި ގޮތުން މިއަދު ދައްކާލި ޓީޝާޓުގައި ރަތް ކުލައާއި ހުދު ކުލަ ހިމެނޭއިރު "ރާޅު ރާއްޖެ" މި ކެމްޕެއިންގެ ރަސްމީ ލޯގޯ އަދި ބްރޭންޑިން ހިމަނާފައިވެ އެވެ.
މި ބްރޭންޑިން ހެދުމުގައި ރާއްޖޭގެ ރާޅާ އަޅާ ސަރަހައްދުތަކުގެ ނަންތައް ހިމަނާފައިވެ އެވެ. "ރާޅު ރާއްޖެ" ކެމްޕެއިނަށް ހާއްސަ ޖާޒީ އަންނަ ބުރާސްފަތި ދުވަހުން ފެށިގެން ޕްރީ އޯޑަކުރެވޭނެ އެވެ.
މިއަދު ބޭއްވި އިވެންޓްގެ ތެރެއިން އިބޫ: ރާއްޖޭގެ މޫދު ކުޅިވަރު ޕްރޮމޯޓް ކުރުމުގައި ގިނަ އަހަރުތަކެއް ހޭދަކޮށްފައިވޭ.--- ފޮޓޯ: މުހައްމަދު ޝާބިން/ އަދަދު
މި އިވެންޓުގައި ވާހަކަ ދައްކަމުން ހުސައިން އަރީފް (އިބޫ) ބުނީ މި ހަރަކާތަކީ ޤައުމީ ޓީމުގެ އެތުލީޓުންނަށް ލިބިގެންދާނެ ވަރަށް ބޮޑު ހިތްވަރަކަށްވާނެ ކަަމަށާއި، ބައިނަލްއަގްވާމީ މުބާރާތްތަކަށްދާއިރު ސަޕޯޓަރުންގެ ސަޕޯޓް ވަރަށް މުހިންމު ވާނެކަމަށެވެ.
މިއަދު ބޯޅަގޭގައި އޮތް ރަސްމިއްޔާތުގައިވަނީ އަންނަ މަހު އޮންނަ އައިބީސީ ވޯލްޑް ޓުއާގެ ވިޒިޓް މޯލްޑިވްސް ޕްރޯގައި ވާދަކުރާ އެތުލީޓުން އިއުލާންކޮށްފަ އެވެ. އެ ގޮތުން ފްރީ ޕާސް ލިބޭ އެތުލީޓުންނާއި ވައިލްޑް ކާޑް އެންޓްރީގެ ގޮތުގައި ޖާގަ ލިބޭ އެތުލީޓުން ވަނީ އިއުލާންކޮށްފަ އެވެ.
ރާއްޖެއިން ވައިލްޑް ކާޑް ލިބުނު ދެ އެތުލީޓުންނަކީ ފިރިހެން ބައިން އަލީ ޚުޝްރުވާން އަހުމަދު (ކުޑަ އައްޔަ) އާއި ޖޫނިއާ ބައިން އާމިން އުމަރު މޫސާ އަށެވެ. މި ދެ އެތުލީޓުން ވެސް ވާދަކުރާނީ ސީޑްކޮށްފައިވާ ބޮޑީބޯޑަރުންނާއިއެކު ގަދަ 32އާ ހިސާބުންނެވެ.
މީގެ އިތުރުން ކޮންމެ ކެޓަގަރީއަކުން ހަތަރު އެތުލީޓަކަށް އެމްބީބީއޭ އިން ވަނީ ފްރީ ޕާސް ދީފަ އެވެ. ފިރިހެން ބައިން ފްރީ ޕާސް ލިބުނީ ކުޑަ އައްޔަ، އާމިން، އަޝްރަފް ހަސަން، އަދި އަލީ ޖާވިދު އަށެވެ.
ޖޫނިއާ ބައިން ފްރީ ޕާސް ލިބުނީ އާމިން، އިޔާން އަހުމަދު، މުހައްމަދު ޖަރީޝް ޖިހާދު އަދި މުހައްމަދު ކައިފް އަށެވެ. ފްރީ ޕާސް ދިނުމުގައި ބަލާފައިވަނީ އެންމެ ފަހުން ނިމުނު ބުރުނު ޝިކާރު ޗެލެންޖުގެ ނަތީޖާތަކާއި ގައުމީ ޓީމުގެ ރޭންކިން އަށެވެ.
މި އެތުލީޓުންގެ އިތުރުން ވެސް ރާއްޖޭގެ އިތުރު ބޮޑީބޯޑަރުންވަނީ މިހާތަނަށް މުބާރާތުގައި ރަޖިސްޓްރީވެފަ އެވެ. އެމްބީބީއޭ އިން މައުލޫމާތު ދޭ ގޮތުގައި ރާއްޖޭގެ 14 ބޮޑީބޯޑަރަކު މިފަހަރުގެ މުބާރާތުން ފެންނާނެ އެވެ.
