ރިޔާސީ އިންތިހާބުގައި ވާދަކުރާ ކެންޑިޑޭޓުންނަށް ކެންޑިޑެސީ ފޯމު ހުށަހަޅަން ހުޅުވާލާ ތާރީހަށް ދެ ދުވަސް ވުމުން، އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓު އަދި ކުރީގެ ރައީސް އަބްދުﷲ ޔާމީނަށް ވާދަކުރުމުގެ ޖާގަ ނުލިބޭތީ އެ އިއްތިހާދުގެ ލީޑަރުން ޖުމްހޫރީ މައިދާނުގައި އިށީނދެ ތިބެއްޖެ އެވެ.
ޖުމްހޫރީ މައިދާނުގައި މި ވަގުތުކޮޅު އިށީނދެލައިގެން ތިއްބެވީ ޕީޕީއެމްގެ ނައިބު ރައީސް އަދި މަޖިލިހުގެ ނައިފަރު ދާއިރާގެ މެންބަރު އަހުމަދު ޝިޔާމް، މަހިބަދޫ ދާއިރާގެ ޕީޕީއެމްގެ މެންބަރު އަހުމަދު ތޯރިގު، ހުޅުމާލެ ދާއިރާގެ ކައުންސިލަރު އިބްރާހިމް ޝުޖާއު، ޕީއެންސީގެ ދެ ނައިބުން ކަމަށްވާ މަޑުއްވަރީ ދާއިރާގެ މެންބަރު އާދަމް ޝަރީފާއި މާވަށު ދާއިރާގެ މެންބަރު މުހައްމަދު ސައީދެވެ.
ޕީޕީއެމްގެ ނައިބު ޝިޔާމް އެތަނުގައި އިންނަވައި"އަދަދު" ނޫހަށް ވިދާޅުވީ އެ މީހުން ޖުމްހޫރީ މައިދާނުގައި އިށީނދެ ތިއްބެވީ ޔާމީންގެ އިސްތިއުނާފު ހައި ކޯޓުގައި "ގަސްތުގައި" މަޑުޖައްސާލާފައި އޮތުމުން އިހުތިޖާޖު ކުރުމުގެ ގޮތުން ކަމަށެވެ.
އެ ތަނުގައި މަޑުކުރައްވައިގެން ތިއްބަވާނީ ކިހާ އިރެއް ވަން ދެން ކަމެއް އެ ބޭފުޅުން ވިދާޅެއް ނުވެ އެވެ. ވީހާވެސް ގިނަ އިރަކު ތިއްބަވާނެ ކަމަށް އެ ބޭފުޅުން ވިދާޅުވެ އެވެ.
ގާނޫނީ އަސާސީގައި ބަޔާންކޮށްފައިވާ ރައީސުލްޖުމްހޫރިއްޔާއަށް ވުމުގެ އެއް ޝަރުތަކީ، ޖިނާއީ ކުށެއްކުރިކަން ސާބިތުވެގެން 12 މަސް ދުވަހަށް ވުރެ ދިގު މުއްދަތެއްގެ ހުކުމެއް އޮތް ނަަމަ، އެ ހުކުމް ތަންފީޒުކޮށް ނިމުނުތާ ނުވަތަ ކަނޑައެޅުނު އަދަބު މައާފު ކުރެވުނުތާ ތިން އަހަރު ވެފައިވާ މީހަކަށް ވުމެވެ.
އެހެންވެ ވ. އާރަށް ކުއްޔަށް ދޫކުރުމުގައި ހިންގި ކަމަށް ބުނާ ހިޔާނާތުގެ މައްސަލާގައި ޔާމީންގެ މައްޗަށް އިއްވާފައިވާ 11 އަހަރުގެ ޖަލު ހުކުމު ދެމިއޮތްހާ ހިނދަކު އެމަނިކުފާނުގެ ކެންޑިޑެސީ ބަލައިނުގަންނާނެ ކަމަށް އިލެކްޝަންސް ކޮމިޝަން (އީސީ) ގެ ރައީސް ފުއާދު ތައުފީގު ވިދާޅުވެފައިވެ އެވެ.
ހުކުމުގެ އިސްތިއުނާފު މި ވަގުތު މަޑުޖެހިފައިވަނީ މައްސަލަ ބައްލަވާ ބެންޗުގެ ފަނޑިޔާރަކު ޗުއްޓީގައި ހުންނެވުމުންނެވެ. އެ މައްސަލާގައި ހަތަރު އަޑުއެހުމެއް ބޭއްވުމަށް ފަހު ދެން އަޑުއެހުމެއް ބާއްވާފައެއް ނުވެ އެވެ.
އޭގެ އިތުރަށް ރ. ފުއްގިރި ކުއްޔަށް ދޫކުރި ކަމަށް ބުނާ މައްސަލާގައި ޔާމީނާއި ސަންގެ ދެ ކުންފުންޏެއްގެ މައްޗަށް ކޮށްފައިވާ ދައުވާގެ ޝަރީއަތްތައް ދަށު ކޯޓުގައި ކުރިއަށް އެބަ ދެ އެވެ. އެ މައްސަލާގައި ކައިރި ކައިރީ ގިނަ އަޑުއެހުންތަކެއް ދަނީ ތާވަލުކުރަމުންނެވެ.
އިދިކޮޅުން މިއަދު ޖުމްހޫރީ މައިދާނުގައި ސިޔާސީ ހަރަކާތެއް ހިންގާ އިރު، ޕީޕީއެމްގެ ސަރުކާރުގައި އޭރުގެ އިދިކޮޅުފަރާތްތަކުން އެތަނަށް އެއްވުމުގެ ފުރުސަތެއް ނުދެ އެވެ.
