ޓްރާންސްފޯމަރެއް ބެހެއްޓުމަށްޓަކައި ވިލިމާލެ އިންޖީނުގެއާ ޖެހިގެން އޮތް ބިން ސްޓެލްކޯއަށް ނުދޭން މާލެ ސިޓީ ކައުންސިލުން ނިންމައިފި އެވެ.
މިގޮތަށް ނިންމީ މިއަދު އޮތް މާލޭ ސިޓީ ކައުންސިލްގެ ހަތަރު ވަނަ ދައުރުގެ 111 ވަނަ ރަސްމީ އާއްމު ޖަލްސާގަ އެވެ.
ސްޓެލްކޯއިން ވަނީ ވިލިމާލޭގެ ކަރަންޓު ހިދުމަތުގެ ފެންވަރު ރަނގަޅުކުރުމަށްޓަކައި ޓްރާންސްފޯމަރެއް ބެހެއްޓުމުގެ ގޮތުން އެ ރަށު އިންޖީނުގެއާ އިން ވެގެން އޮންނަ ބިމުން 30 ފޫޓު 30 ފޫޓުގެ ބިމެއް ބޭނުންވާކަމަށް ބުނެ ކައުންސިލަށް ސިޓީއެއް ފޮނުވާފަ އެވެ. އަދި އެ ކުންފުނިން ވަނީ އެ ބިން ދޫކުރުމަށް ކައުންސިލަށް އެދިފަ އެވެ.
މި މައްސަލައިގެ މަޝްވަރާގައި ވާހަކަ ދައްކަވަމުން ވިލިމާލެ ދާއިރާގެ ކައުންސިލަރު ނަހުލާ އަލީ ވިދާޅުވީ، އިންޖީނުގެ ހިންގުމަށްޓަކައި ބޮޑު ސަރަހައްދެއް މިހާރު ވެސް ސްޓެލްކޯއަށް ދޫކުރެވިފައިވާ ކަމަށެވެ. އަދި, ޓްރާންސްފޯމަރު ބެހެއްޓުމަށްޓަކައި ޖެހިގެން އޮތް ބިމަށް އެ ކުންފުނިން އެދެނީ ބިން ބޮޑުކުރުމުގެ މަގުސަދުގައި ކަމަށް ނަހުލާ ވަނީ ތުހުމަތު ކުރައްވާފަ އެވެ.
"ފުދޭ ވަރަކަށް ބޮޑު ސަރަހައްދެއް މިހާރު ވެސް އެބޭފުޅުންނަށް[ސްޓެލްކޯއަށް] ލިބިވަޑައިގަނެފަ އޮތީ. އެދިވަޑައިގަންނަވަނީ ވެސް ވަރަށް ބޮޑު ޖާގައަކަށް. އެވެސް ޖެހިގެން އޮތް ބިމުން. އަޅުގަނޑަށް ފެންނަނީ މިހާރު ލިބިފަ އޮތް ބިމުން ޖެހިގެން އޮތް ބިމަށް އިތުރު ބައެއް ބޮޑު ކޮށްލައިގެން ޖާގަ ބޮޑުކޮށްލަން މަސައްކަތް ކުރައްވާތަން،" ނަހުލާ ފާހަގަކުރެއްވި އެވެ.
ސްޓެލްކޯއަށް ލިބިފައިވާ ބިން އެ ސަރަހައްދުން ބޮޑުކޮށްދިނުމަކީ އެއްގޮތަކަށް ވެސް ތާއީދުކުރައްވާ ކަމެއް ނޫންކަމަށް ވިލިމާލެ ދާއިރާގެ ކައުންސިލަރު ނަހުލާ ވަނީ ވިދާޅިވެފަ އެވެ. އަދި, އިންޖީނުގެއާ ޖެހިގެން އޮތް ބިން ނޫން އެހެން ބިމެއްގައި ވެސް ޓްރާންސްފޯމަރު ބެހެއްޓިދާނެ ކަމަށް ވިދާޅުވި އެވެ.
މި މައްސަލައާ ގުޅިގެން ގަލޮޅު އުތުރު ދާއިރާގެ ކައުންސިލަރު މުހައްމަދު ސައިފް ފާތިހު ވަނީ ސްޓެލްކޯއިން މާލެ ސަރަހައްދުގެ އެކި ތަންތާގައި ޓްރާންސްފޯމަރު ބަހެއްޓުމަށްޓަކައި ބިމަށް އެދި ފޮނުވާ ސިޓީތަކަށް ވެސް ވަރަށް ބޮޑަށް ފާޑު ވިދާޅުވެފަ އެވެ. އެގޮތުން ޓްރާންސްފޯމަރު ބަހެއްޓުމާއި ހިދުމަތް ދިނުމުގައި އަމަލު ކުރާނެ ދިގު މުއްދަތުގެ ޕްލޭނެއް ސްޓެލްކޯ ފަދަ ކުންފުންޏަކުން ހަދާފައި ނެތީ ތޯ ސައިފް ސުވާލުކުރެއްވި އެވެ.
"މާލޭގެ ކަރަންޓުގެ ކަންތައް ކުރަންޖެހޭ ގޮތާ، މާލޭގެ ޕޮޕިއުލޭޝަން އިންކްރީސްވާ ވަރާ ކެޕޭސިޓީ އިތުރުކުރަންޖެހޭ ވަރުގެ ޕްލޭނެއް ނެތްތޯ؟ [ސްޓެލްކޯއަށް] ހަފްތާ ފެށޭއިރުތޯ އިނގެނީ ހަފްތާފަހުކޮޅު ޓްރާންސްފޯމަރު ނުބަހައްޓައިފިއްޔާ ކަރަންޓު ކެނޑޭނެކަން؟"ސައިފް ސުވާލު އުފެއްދެވި އެވެ.
ސްޓެލްކޯއިން މާވެޔޮމަގުގައި ބަހައްޓާފައި ހުރި ވަގުތީ ޓްރާންސްފޯމަރު ބަހައްޓާފައި ހުރީ އެންމެ ރައްކާތެރި ގޮތުގައި ނޫންކަން ވެސް ސައިފް ވަނީ ފާހަގަކުރައްވާފަ އެވެ.
އޭގެ އިތުރުން ސައިފް ވިދާޅުވީ ޓްރާންސްފޯމަރު ބެހެއްޓުމަށްޓަކައި މިހާރު ސިޓީ ކައުންސިލުން ސްޓެލްކޯއަށް ދޫކޮށްފައިވާ ބިންތައް އެހެނިހެން ކޮމާޝަލް ބޭނުންތަކަށް ބޭނުންކުރާ ކަމަށެވެ.
ސްޓެލްކޯގެ އެކިއެކި މަސައްކަތްތައް ކުރުމަށްޓަކައި ބޭނުންވާ ހުއްދަތައް ދިނުމުގައި ސިޓީ ކައުންސިލުން ފަސްޖެހޭތީ އެ ކުންފުނިން އަބަދުވެސް އަންނަނީ ކަންބޮޑުވުން ފާޅުކުރަމުންނެވެ. ނަމަވެސް, ސިޓީ ކައުންސިލުން ފާހަގަކުރާ ގޮތުގައި އެފަދަ ލަސްވުންތައް އަންނަނީ ސްޓެލްކޯއިން އަމަލުކުރާ ގޮތުގެ ސަބަބުންނެވެ.
