މަސްވެރިކަން ތަރައްގީ ކުރުމުގެ ބަދަލުގައި ކުރީގެ ސަރުކާރުތަކުން ދެއްކީ ހަމައެކަނި ވާހަކަ ކަމަށާއި އެކަށީގެންވާ މަސައްކަތެއް ނުކުރާ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިރޭ ވިދާޅުވެއްޖެ އެވެ.
ރާއްޖޭގައި އެންމެ ބޮޑަށް މަސްވެރިކަން ކުރާ އެއް ރަށް ކަމަށްވާ ހއ. އިހަވަންދޫގައި ބޭއްވި ކެމްޕެއިން ޖަލްސާއެއްގައި ވާހަކަ ދައްކަވަމުން ރައީސް ވިދާޅުވީ، މަސައްކަތް ކުރުމުގެ ބަދަލުގައި ކުރީގެ ސަރުކާރުތަކުން ދެއްކީ ބޮޑެތި ޕްރޮޖެކްޓުތައް ހިންގައި، މޮޅެތި ކަންތައް ކުރާނެ ވާހަކަ ކަމަށެވެ.
"މިއަދާ ހިސާބަށް އައިރުގައި އެ ދަތިތައް މަސްވެރިންނަށް ކުރިމަތިވެފައި ހުރީ ވެއެތުވެދިޔަ ސަރުކާރުތަކުން އަޅުގަނޑު ދަންނަވާނީ އެ އިންޑަސްޓްރީއާ ދޭތެރޭގައި އަޅާލާންޖެހޭ މިންވަރަށް އަޅާނުލާ އޮތީމަ. ދެކެވުނީ ވާހަކަތަކެއް. މާ ބޮޑެތި މަޝްރޫއުތަކެއް ހިންގައިގެން، މާ މޮޅެތި ކަންތައްތަކެއް ކޮށްގެން މުޅި އިންޑަސްޓްރީ ފުޅާކޮށް ކުރިއަށްގެންދާ ވާހަކަ،" ރައީސް ވިދާޅުވި އެވެ.
މިރޭގެ ޖަލްސާގައި ވާހަކަ ދައްކަވަމުން ރައީސް ވިދާޅުވީ މަސްވެރިކަން ތަރައްގީ ކުރުމުގެ މަސައްކަތް ޕްރައިވެޓް ސެކްޓާއަށް އެކަނި ދޫކޮށްނުލައްވާނެ ކަމަށެވެ.
"އަޅުގަނޑު ދަންނަވާނީ މަސްވެރިކަމަކީ ތަރައްގީ ކުރުމުގައި އަދި ސަރުކާރުން އަތް ދޫކޮށްލައިގެން ނުވާނެ. ޕްރައިވެޓް ސެކްޓާއަށް އެކީ ދޫކޮށްލައިގެން އެކަން ކުރުމަކީ އެންމެ ފައިދާ ހުރި ގޮތެއް ކަމަށް އަޅުގަނޑު ނުދެކެން،" އެމަނިކުފާނު ވިދާޅުވި އެވެ.
އޭގެ އިތުރުން ރައީސް ސޯލިހު ވަނީ ދެ ވަނަ ދައުރަކަށް އެމަނިކުފާނު އިންތިހާބުވެއްޖެ ނަމަ އިހަވަންދޫއަށް ކޮށްދެއްވާނެ ކަންތައްތަކުގެ ލިސްޓެއް ވިދާޅުވެފަ އެވެ. ރައީސް ވިދާޅުވީ އިހަވަންދޫއަށް ސަރުކާރުން ކޮށްދޭނެ ކަންތައްތަކުގެ "ބޮޑު ވައުދު ލިސްޓެއް" އެބަ އޮތް ކަމަށެވެ. އޭގެ ތެރޭގައި އެމަނިކުފާނު ފާހަގަ ކުރެއްވީ:
- މަސް ގަންނަ ބަނދަރެއް ހެދުން
- ދިގުފަރުގައި އިންޓަގްރޭޓެޑް ޓުއަރިޒަމް ޕްރޮޖެކްޓެއް ފެށުން
- ހައުސިން މަޝްރޫއެއް ހިންގުން
- ވެލިއު އެޑް ކުރެވޭ މަސް ޕްރޮސެސް ކުރެވޭނެ ގޮތެއް ހެދުން
- މަސްވެރިންނާއި ރައްޔިތުން އެދޭ ގޮތަށް ނެރު ބަދަލު ކުރުން
- ރަށުގެ ހުރިހާ މަގުތަކެއް ހެދުން
ސެޕްޓެމްބަރު 9، ގައި ރިޔާސީ އިންތިހާބު ބާއްވާައިރު ކެންޑިޑޭޓުް ފޯމު ހުށަހެޅުން އަންނަ އާދީއްތަ ދުވަހު ހުޅުވާލާނެ އެވެ. މިހާތަނަށް ކުރިމަތިލައްވާނެ ކަމަށް އިއުލާނު ކުރައްވާފައި ވަނީ ރައީސް ސޯލިހުގެ އިތުރުން ޖުމްހޫރީ ޕާޓީގެ ގާސިމް އިބްރާހިމާއި މޯލްޑިވްސް ނެޝަނަލް ޕާޓީގެ މުހައްމަދު ނާޒިމެވެ.
ނަމަވެސް އިދިކޮޅު ތިން ޕާޓީއަކުން މަޝްވަރާ ކުރުމަށްފަހު އެއް ކެންޑިޑޭޓަކު ނެރެން މަސައްކަތް ކުރާ ކަމަށް ވަނީ ބުނެފަ އެވެ. ނަމަވެސް އެކަން ކުރެވޭނީ އެންމެ ބޮޑު އިދިކޮޅު ޕާޓީ ޕްރޮގްރެސިވް ޕާޓީ އޮފް މޯލްޑިވްސް އިން އެއްބަސްވާ ނަމަ ކަމަށް ޕާޓީތަކުން ބުނެ އެވެ.
ޕީޕީއެމުން ބުނަނީ އެ ޕާޓީގެ ކެންޑިޑޭޓަކީ ކޮރަޕްޝަންގެ މައްސަލައެއްގައި 11 އަހަރުގެ ޖަލު ހުކުމެއް ތަންފީޒު ކުރައްވަމުންދާ ކުރީގެ ރައީސް އަބްދުﷲ ޔާމީން ކަމަށެވެ. އަދި އެއް ކެންޑިޑޭޓުގެ ވާހަކަ މިއަދު ޕާޓީތަކުން ދެއްކުމުން ވެސް ޕީޕީއެމުން އެދުނީ އެ ކެންޑިޑޭޓަކީ ޔާމީން ކަމަށް ހެދުމަށެވެ،
