ހއ. އުލިގަމުގައި ސިޓީ ހޮޓަލެއް ހަދަން އުޅުނު ބިން ކައުންސިލާ ހަވާލުކޮށް, ލޯކަލް ޓޫރިޒަމަށް ބޭނުން ކުރަން ފަށައިފި އެވެ.
ރިޔާސީ އިންތިހާބުގެ ކެމްޕޭނުގައި އުލިގަމަށް ވަޑައިގެން ރައީސް ސޯލިހު ވިދާޅުވީ, އެމްޑީޕީގެ ކުރީގެ ވެރިކަމުގައި އުލިގަމުގައި ސިޓީ ހޮޓަލެއްގެ މަސައްކަތް ކުރި ކަމަށެވެ. ނަމަވެސް އޭގެ ފަހުން އައި ސަރުކާރުން ކަން ކުރި ގޮތުން އެ މަސައްކަތް ހުއްޓި, އެ ބިން ހޯދުމުގައި ސަރުކާރަށް ދަތިތަކެއް ކުރިމަތިވި ކަމަށެވެ.
"އެ މަސައްކަތް ކުރަން [ސިޓީ ހޮޓާ ބިން ކައުންސިލާ ހަވާލުކުރަން] އުނދަގޫތަކެއް ކުރިމަތިވި. ސަބަބަކީ ދެން ވެރިކަމަށް އައި ސަރުކާރުން ކަން ކޮށްފައި އޮތް ގޮތުން. ބޭރު ބަޔަކާ އެކީ ގުޅި އާމަރީއެއް ހަދާ, މިތަނުން ދަތުރު ކުރެވޭ އުޅަނދު ފަހަރަށް އޭގެ އެހީތެރިކަން ފޯރުކޮށްދިނުމުގެ ގޮތުގައި ކޮށްފައި އޮތް "އަޑި ނެނގޭ" އެއްބަސްވުމެކޭ ދަންނަވަން ކެރިދާނެ." ރައީސް ވިދާޅުވި އެވެ.
ރައީސް ވިދާޅުވީ, އެ އެއްބަސްވުމުން ނިކުންނަން ވަރަށް ދަތި, އުނދަގުލަކަށް ވި ކަމަށެވެ. އަދި މިއަދު އެކަން ހައްލު ކުރެވިފައިވީ ނަމަވެސް މިއަދުވެސް އެ އެއްބަސްވުމުގެ ބަދަލު ހޯދަން އެ މަސައްކަތް ހަވާލުކުރި ކުންފުނިން ތިބީ ސަރުކާރު ގޮވައިން ކޯޓަށް ދާ ހިސާބުގައި ކަމަށް އެމަނިކުފާނު ވިދާޅުވި އެވެ.
"ހަގީގަތުގައި އަޅުގަނޑުމެން ބެލިއިރު އެ ބުނާ އެގްރީމަންޓެއް ފެންނާކަށް ނެތް. ސަރުކާރުގެ ތަނެއް ގައެއް ނެތް. ނަމަވެސް އެ ކުންފުނީގައި އެބައޮތް އެ އެގްރީމަންޓް. އެންމެ ފަހުން ޕޮލިހަށް ގޮސް އެ ބެލި އިރުގައި އޭގައި ސޮއިކޮށްފައި އޮތީ އަސްލު މީހާ ކަމަށް އެބަ ޔަގީންކުރެވޭ." އެއްބަސްވުމުގެ ސައްހަކަން ޔަގީންވީ ނަމަވެސް އެއްބަސްވުން ބާތިލުކުރަން ނިންމިކަން ފާހަގަކުރައްވައި ރައީސް ވިދާޅުވި އެވެ.
ރައީސް ވިދާޅުވި ގޮތުގައި އެއްބަސްވުން ބާތިލުކުރީ, ކައުންސިލާއި ރައްޔިތުން އެދޭ ގޮތަށް, ޓޫރިޒަމްގެ މަސައްކަތަށް އެތަން ދޫކުުރުމަށް ކަމަށެވެ. އެގޮތުން މިހާރު އެ ބިން ކައުންސިލާ ހަވާލުކުރުމުން, އޭގެ ތެރެއިން ދެ ތަނެއް ކުއްޔަށްދީގެން ކައުންސިލަށް އަންނަނީ އޭގެއިން އާމްދަނީ ލިބެން ފަށާފަ އެވެ.
ރައީސް ވިދާޅުވީ, އުލިގަމަކީ ކުރިން ވެސް ޓޫރިޒަމަށް ފައްކާ ވެފައި އޮތް ރަށެއް ކަމަށާއި, ރީތި ބަނދަރާއި, ފަސޭހައިން ރާއްޖެ އެތެރެވެވޭނެ މަގު އޮތް ތަނެއް ކަމަށެވެ. އަދި އެ ވިސްނުމުގައި 2008 ވަނަ އަހަރު އޭރުގެ ސަރުކާރުން އުލިގަމުގައި ހޮޓަލެއް އެޅުމުގެ މަސައްކަތް ކުރިކަން ފާހަގަކުރައްވާ އެމަނިކުފާނު ވިދާޅުވީ, ހޮޓާ އެޅުމުގެ ކުރިން ކުރަން ޖެހޭ ކަންކަން އޭރު ހުރީ ނުކޮށް ކަމަށެވެ.
"ފެނާއި ނަރުދަމާ މިއީ ބޭނުންވާ އެއްޗެއް, ކަރަންޓު ބޭނުންވޭ, ބަނދަރު ބޭނުންވޭ. މިއާއެކީ ނޫނިއްޔާ ރަށެއްގައި ޓޫރިޒަމެއް ފައްކާވެގެން ނުދާނެ. މިއަދު މިއޮތީ މި ރަށް ލޯކަލް ޓޫރިޒަމަށް ފައްކާވެ ނިމިފައި." އުލިގަން ލޯކަލް ޓޫރިޒަމަށް ފައްކާވުމާއެކު އިންވެސްޓްމަންޓް އަންނާނެ ކަމަށް ރައީސް ވިދާޅުވި އެވެ.
