މި އަހަރުގެ ރިޔާސީ އިންތިހާބުގައި ވާދަކުރައްވާ އެމްއެންޕީގެ ލީޑަރު އަދި ރިޔާސީ ކެންޑިޑޭޓު މުހައްމަދު ނާޒިމް، ޖުމްހުރީ ޕާޓީގެ ރިޔާސީ ކެންޑިޑޭޓު އަދި ލީޑަރު ގާސިމް އިބްރާހިމާ ބައްދަލުކުރައްވައިފި އެވެ.
ދަނގެތީ ދާއިރާގެ މެމްބަރު ނާޒިމްގެ އިތުރުން އެމްއެންޕީގެ ވަފުދުގައި ދެން ހިމެނެނީ އެ ޕާޓީގެ ދެ ނައިބު ރައީސުން ކަމަށްވާ ވިލިމާލެ ދާއިރާގެ މެންބަރު އަހުމަދު އުޝާމު އަދި ތިމަރަފުށީ ދާއިރާގެ މެންބަރު އަބްދުﷲ ރިޔާޒެވެ.
ގާސިމްގެ އެޑްވައިޒަރުގެ މަގާމުގައި ހުންނެވި ވިލިމާލެ ދާއިރާގެ ކުރީގެ މެންބަރު އަހުމަދު ނިހާން ހުސެއިން މަނިކު ކުރެއްވި ޓުވީޓެއްގައި ވިދާޅުވެފައިވަނީ މި ބައްދަލުވުން ކުރިއަށް ގޮސްފައިވަނީ މާމިގިލީ ދާއިރާގެ މެމްބަރުކަން ވެސް ކުރައްވާ ގާސިމްގެ އަމިއްލަ ރިސޯޓެއް ކަމަށްވާ ވިލާ ޕާކު - ސަން އައިލެންޑުގައި ކަމަށެވެ.
މި ބައްދަލުވުމުގައި މަޝްވަރާ ކުރެވުނު ކަންކަމުގެ ތަފުސީލު ހޯދުމަށް ކުރި މަސައްކަތުން މިހާތަނަށް ދެ ޕާޓީންވެސް ރަސްމީ ބަހެއް ބުނެފައެއް ނުވެ އެވެ. ނަމަވެސް, ނިހާނުގެ ޓުވީޓުގައި ވިދާޅުވެފައިވަނީ މިއީ ވަރަށް ހާއްސަ ބައްދަލުވުމެއް ކަމަށެވެ.
ބެލެވޭ ގޮތުގައި މިއަދުގެ މަޝްވަރާތައް ބިނާވާނީ 50 ދުވަހުގެ ތެރޭގައި ބޭއްވޭ ރިޔާސީ އިންތިހާބަށެވެ. މިހާރުގެ ހާލަތު އޮތް ގޮތުން މި ދެ ޕާޓީން އެކުގައި މަސައްކަތް ކުރުމުގެ ފުރުސަތު އޮތީ ރިޔާސީ އިންތިހާބުގެ ދެވަނަ ބުރުގަ އެވެ.
އެމްއެންޕީ އުފެއްދުމުގެ ކުރިން ނާޒިމް ހަރަކާތްތެރިވީ ގާސިމްގެ ޖޭޕީގަ އެވެ. ޖުމްހޫރީ ޕާޓީން ވަކިވެ, އާ ޕާޓީއެއް އުފައްދަން ޖެހުނީ ޖުމްހޫރީ ޕާޓީއަކީ ނިދާފައި އޮތް ޕާޓީއަކަށްވެފައި, އެ ޕާޓީން ކުރިއެރުމެއް ނުލިބޭނެތީ ކަމަށް ނާޒިމް މީގެކުރިން ވިދާޅުވެފައިވެ އެވެ.
މިހާރުގެ ސަރުކާރު ކޯލިޝަނުގައިވެސް އޮތް ޖޭޕީއިން އެމްޑީޕީއާ އެކު ކޯލިޝަން ހަދައިގެން 2023 ގައި ވާދަކުރުމުގެ ދައުވަތު ވެސް ރައީސް އިބްރާހިމް މުހައްމަދު ސޯލިހު ގާސިމަށް ދެއްވި އެވެ. އެކަމަކު ޖޭޕީގެ ކޮންގްރެސްއިން ނިންމީ އިންތިހާބުގައި ވަކިން ވާދަކުރާށެވެ. ޖޭޕީގެ ރިޔާސީ ޓިކެޓާއި ހަވާލުވެވަޑައިގެން ގާސިމް ވެސް ވަނީ ކެމްޕެއިން ފައްޓަވާފަ އެވެ.
ގާސިމް ވަނީ 2008 އަދި 2013 ގައި އިންތިހާބުގައި ވާދަކުރައްވާފަ އެވެ. އެ ދެ ފަހަރު ވެސް ފުރަތަމަ ބުރުން ނާކާމިޔާބުވެވަޑައިގެން ގާސިމް ގުޅިވަޑައިގަތީ ވެރިކަމަށް އައި ކޯލިޝަންތަކާއެކު އެވެ. އެކަމަކު, ހިޔާލު ތަފާތުވުންތައް ގިނަވެ އެ ދެ ފަހަރު ވެސް ކޯލިޝަނުން ޖޭޕީ ވަކިވީ އެވެ. މިއީ ރާއްޖޭގެ ސިޔާސީ ތާރީހުގައި އެއް ކޯލިޝަނެއްގައި ޖޭޕީން މިހާ ގިނަ ދުވަހު މަޑުކުރި ފުރަތަމަ ފަހަރެވެ.
