އިދިކޮޅު، ޕީޕީއެމް/ޕީއެންސީގެ ރިޔާސީ ކެންޑިޑޭޓަކަށް ކަނޑައަޅާފައިވާ، ޖަލު ހުކުމެއް މިހާރު ތަންފީޒު ކުރަމުން ގެންދަވާ ކުރީގެ ރައީސް އަބްދުﷲ ޔާމީނަށް "އިންސާފު ލިބެންދެން ރިޔާސީ އިންތިހާބު ފަސްކުރަން" ގޮވާލައިފި އެވެ.
ހިޔާނާތާއި މަނީލޯންޑަރިންގެ ކުށް ސާބިތުވެ 11 އަހަރުގެ ހުކުމެއް ޖަލުގައި ތަންފީޒުކުރަން ޖެހިފައި ވާއިރު، އަބްދުއްރަހީމް ވިދާޅުވީ ޔާމީން ޖަލުގައި ބާއްވާފައި ވަނީ ރައީސް ސޯލިހުގެ ނުފޫޒުން ކަމަށެވެ.
"ރައީސް ސޯލިހު ބާރާ ނުފޫޒުގެ ބޭނުންކޮށްގެން އިދިކޮޅު ލީޑަރު އަދި ދިވެހީންގެ ރިޔާސީ ކެނޑިޑޭޓް ރައީސް ޔާމީން ޖަލުގައި ބާއްވައިގެން ބާއްވާ ރިޔާސީ އިންތިޚާބެއް އިންސާފުވެރިއެއް ނުވާނެ. ރައީސް ޔާމީނަށް އިންޞާފު ލިބެންދެން ރިޔާސީ އިންތިހާބު ފަސްކުރުމަށް ގޮވާލަން،" އަބްދުއްރަހީމް ކުރެއްވި ޓިވީޓުގައި ވިދާޅުވެފައިވެ އެވެ.
ސެޕްޓެމްބަރު 9 ގައި ބާއްވާ ރިޔާސީ އިންތިހާބުގެ ކެންޑިޑެސީ އަންނަ އާދީއްތަ ދުވަހު ހުޅުވާލާއިރު، މިހާރު ތަންފީޒުކުރާ ހުކުމް ދެމިއޮތްވައި އެ މަނިކުފާނުގެ ކެންޑިޑެސީ ސައްހަ ކަމަށް ބަލައި ނުގަންނާނެ ކަމަށް އިލެކްޝަން ކޮމިޝަނުންގެ ރައީސް ފުއާދު ތައުފީގު ވަނީ ވިދާޅުވެފަ އެވެ.
އިންތިހާބަށް ނަން ހުށަހެޅުމުގެ ކުރިން ޔާމީން މިނިވަން ނުވެއްޖެ ނަމަ ޕާޓީގެ ޓިކެޓު ހޯދުމަށް އެ ކޯލިޝަންގެ އެތެރޭގެ ވާދަވެރިކަން އެބަ ހުއްޓެވެ.
ޔާމީނަށް ވާދަ ނުކުރެވޭ ހާލަތެއްގައި ޕާޓީގެ ރިޔާސީ ޓިކެޓު ހޯދަން މާލޭ ސިޓީ ކައުންސިލްގެ މޭޔަރު މުހައްމަދު މުއިއްޒު ގެންދަވަނީ މަސައްކަތް ކުރައްވަމުންނެވެ. ނަމަވެސް އެކަން އޭނާ ރަސްމީކޮށް ހާމަ ނުކުރައްވަ އެވެ.
ޕީޕީއެމް/ ޕީއެންސީ އިން ބުނަމުން ދަނީ އެ ކޯލިޝަންގެ ކެންޑިޑޭޓަކީ ޔާމީނު ކަމަށާއި އެ މަނިކުފާނަށް އިންތިހާބުގައި ވާދަ ކުރެވޭނެ ކަމަށެވެ.
