ސަރުކާރު ހިންގާ އެމްޑީޕީން މޯލްޑިވްސް ޑިވޮލޮޕްމެންޓް އެލަޔަންސް (އެމްޑީއޭ)އާ ގުޅިގެން މަސައްކަތް ކުރަން ފެށީ އިއްޔެއަކު ނޫން ކަމަށާއި 2018 ވަނަ އަހަރުން ފެށިގެން އެ ޕާޓީއާއެކު މަސައްކަތް ކުރަމުންދާ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ރިޔާސީ އިންތިހާބަށް ކެމްޕޭނުގެ ތެރެއިން މ.މުލަކުގައި އެމްޑީޕީއާއި އެޕާޓީއާ ގުޅިފައިވާ ޕާޓީތަކުން މިދިޔަ ހޮނިހިރު ދުވަހު ބޭއްވި ޖަލްސާގައި އެމްޑީއޭގެ ފަރާތުން ވާހަކަދައްކަވަމުން އެ ޕާޓީގެ ނައިބު ލީޑަރު އަލީ މައުރޫފު ވިދާޅުވީ އެމްޑީއޭގެ ލީޑަރު އަދި ރައްޔިތުންގެ މަޖިލީހުގެ މީދޫ ދާއިރާގެ މެމްބަރު އަހުމަދު ޝިޔާމާއި އޭނާ، 2018 ވަނަ އަހަރު (އޭރުގެ ރިޔާސީ ކެންޑިޑޭޓް) އިބްރާހީމް މުހައްމަދު ސޯލިހާ ސިންގަޕޫރުގައި ބައްދަލުކުރެއްވި ކަމަށެވެ. އަދި އޭރު ވެސް "ސިއްރު ކޯލިޝަނެއް" އޮތް ކަމަށް ވިދާޅުވި އެވެ.
މައުރޫފުގެ ވާހަކަތަކަށް، މިއަދު ހަވީރު ވ. ފުލިދޫގައި ބޭއްވި ކެމްޕެއިން ޖަލްސާގައި ރައީސް ވަނީ ބާރު ދެއްވި އެވެ. އެމަނިކުފާނު ވިދާޅުވީ، އެމްޑީއޭއާ ރަސްމީކޮށް ކޯލިޝަން ހެދީ ވަރަށް ފަހުން ކަމަށް ވިޔަސް، ސިންގަޕޫރުގައި 2018 ވަަނަ އަހަރު ބޭއްވި ބައްދަލުވުމަށްފަހު އެ ޕާޓީއާއެކު ދިޔައީ މަސައްކަތް ކުރަމުން ކަމަށެވެ.
"މައުރޫފް ވިދާޅުވާހެން އަޅުގަނޑުމެންނާ އެމްޑީއޭއާ ގުޅުނީ އިއްޔެއަކު ނޫން. 2018 ވަނަ އަހަރުގެ ކެމްޕެއިން ތެރޭގައި އަޅުގަނޑަށް މައުރޫފްއާއި އެމްޑީއޭގެ ރައީސްއާ ސިންގަޕޫރުން ބައްދަލުވި. އެ ދުވަހު ވެސް އެ ބޭފުޅުން ވިދާޅުވި މި ތިބީ އެމްޑީޕީގެ ކޯލިޝަނާއެކީގައޭ،" ރައީސް ވިދާޅުވި އެވެ.
އެކަމަކު، އޭރު އެމްޑީޕީން އޮތީ ކޯލިޝަން ހަދާނެ ޕާޓީތައް ނިންމައި، ރަސްމީކޮށް އެކަން އިއުލާނުކޮށްފައި ކަމަށް ރައީސް ވިދާޅުވި އެވެ. އެހެންވެ، އެމްޑީއޭއާއެކު ކޯލިޝަން ހެދިކަން ރަސްމީކޮށް އިއުލާނު ނުކުރެވުނަސް، މިހާ ހިސާބަށް އާދެވުނީ އެ ދުވަހު ވެވުނު އެއްބަސްވުމާ ހެދި ކަމަށް އެމަނިކުފާނު ވިދާޅުވި އެވެ.
"އެހެންނަމަވެސް، އެ ދުވަހު އަޅުގަނޑުމެން އެ ވީ އެއްބަސްވުމާއެކުގައި އަޅުގަނޑުމެންނަށް މިހާ ހިސާބަށް އާދެވިފައި މިތިބީ،" ރައީސް ވިދާޅުވި އެވެ.
ރައީސް ވިދާޅުވީ، ކޯލިޝަން ހަދާފައިވާ އެމްޑީއޭ އާއި އަދާލަތު ޕާޓީއަކީ ވެސް އެމްޑީޕީގެ ވިސްނުމާ ގުޅޭ ރައްޔިތުންނަށް ތަރައްގީ ގެެނެސްދޭން އެދޭ ދެ ޕާޓީ ކަމަށެވެ.
މަޝްހޫރު ވިޔަފާވެރިޔާ އަދި މީދޫ ދާއިރާގެ މެމްބަރު ސިޔާމް އިސްކޮށް ހުންނަވާ އެމްޑީއޭ އިން 2013 ވަނަ އަހަރުގެ ރިޔާސީ އިންތިހާބުގައި ކޯލިޝަން ހެދީ އެ އިންތިހާބު ކާމިޔާބު ކުރި ޕީޕީއެމްއާ އެކީގަ އެވެ. މިދިޔަ ރިޔާސީ އިންތިހާބު ކައިރިވި އިރު އެމްޑީއޭ އޮތީ އޭރުގެ ސަރުކާރު ހިންގަން ތިބި ޕީޕީއެމްއާ ކޯލިޝަން ހަދައިގެންނެވެ. އެކަމަކު، ވަކި ހިސާބަކުން އެ ކޯލިޝަން ރޫޅާލައި އެމްޑީއޭއިން އިންތިހާބުގައި އޮތީ ހިމޭންކޮށެވެ.
ކުރީގެ ރައީސް އަބްދުﷲ ޔާމީނުގެ ކެމްޕޭނުގައި އެޕާޓީން ބައިވެރި ނުވި އިރު އެމަނިކުފާނާ ދެކޮޅަކަށް ވެސް ފާޅުގައި މަސައްކަތެއް ނުކުރެ އެވެ. އަދި އެމްޑީޕީން ހެދި ކޯލިޝަނުގެ ކެމްޕެއިނުގައި ވެސް ބައިވެރިއެއް ނުވެ އެވެ.
