ވެރިކަން ކުރާ މައި ޕާޓީ އެމްޑީޕީގެ މައި އޮފީސް އާ އިމާރާތަކަށް ބަދަލުކޮށްފި އެވެ.
އެމްޑީޕީއިން މިއަދު ކުރި ޓްވީޓެއްގައި ބުނެފައި ވަނީ އެޕާޓީގެ އޮފީސް ޕާކިސްތާނު އެމްބަސީ ކައިރީގައި ހުންނަ ގ. ނިއުޝާ އިމާރާތުގެ ދެވަނަ ފަންގިފިލާއަށް ބަދަލުކޮށްފައި ވާކަމަށެވެ. އެއީ ސަލްޓަން ޕާކްގެ ހުޅަނގުން ލިލީމަގުގައި ހުންނަ ގެ އެކެވެ.
މީގެ ކުރިން އެ އޮފީސް ހިންގަމުން އައީ ހ. ޝަރާސާގަ އެވެ. ޕާޓީގެ މައި އޮފީސް ބަދަލުކުރީ ހަރަކާތްތައް ފުޅާވެ ޖާގަ ތަނަވަސް އިމާރާތެއްގައި އޮފީސް ހިންގުމަށް ކަމަށް އެޕާޓީން ބުންޏެވެ.
އެމްޑީޕީ ދެބަޔަކަށް ބެހިގެން ގޮސް ރައީސް މުހައްމަދު ނަޝީދު އިސްވެ ހުންނަވައިގެން ދަ ޑިމޮކްރޭޓްސް އުފެއްދެވި ހިސާބުން ގިނަ ދުވަސްތަކެއް ހިންގަމުން ދިޔަ މައި ހަރުގެ ވެސް ދޫކޮށްލަން ޖެހުނެވެ. މިހާރު އެތަން ބޭނުންކުރަމުން އަންނަނީ ޑިމޮކްރޭޓްސްގެ ހަރުގެ އެވެ.
ޖެނުއަރީ 28، ގައި އޮތް އެމްޑީޕީގެ ރިޔާސީ ޕްރައިމަރީން ނަޝީދު ބަލިވި ފަހުން އެމަނިކުފާނަށް ތާއީދުކުރާ މެންބަރުން ގެންދިޔައީ "ފިކުރެއްގެ ދިރުން" ނަމުގައި ވަކި ފެކްޝަނެއް ގޮތަށް ހަރަކާތްތެރިވަމުންނެވެ. ހަރުގެ ހުސްކުރަން ނޯޓިސް ދިނީ ވެސް ޕްރައިމަރީއަށް ފަހުގަ އެވެ.
