ރާއްޖޭގައި އެވްރެޖްކޮށް އަންހެނަކު ކުދިން ހޯދާ ނިސްބަތް 1.7 އަށް ވެއްޓިއްޖެ އެވެ.
މިދިޔަ އަހަރު ހިންގި ބޯހިމެނުމުގެ ނަތީޖާއިން ދައްކާ ގޮތުގައި, 1990 ވަނަ އަހަރު އެވްރެޖްކޮށް, އަންހެނަކު އޭނާގެ ދަރިމައިވުމުގެ އުމުރުފުރާގައި 6.4 ދަރިން ހޯދަ އެވެ. އެ އަދަދު ދަށްވަމުން އައިސް, 2022 ވަނަ އަހަރާ ހަމައަށް އައިއިރު އަންހެނަކު އޭނާގެ ދަރިމައިވުމުގެ އުމުރުފުރާގައި ހޯދާ ދަރިންގެ އަދަދު ވަނީ 1.7 އަށް ވެއްޓިފަ އެވެ.
ބޯހިމެނުމުގެ ނަތީޖާ ރިޕޯޓުގައި ފާހަގަކޮށްފައިވާ ގޮތުގައި, ރާއްޖޭގެ ދަރިމައި ވުމުގެ ނިސްބަތް ވަނީ ބިލޯ ރިޕްލޭސްމަންޓް ލެވެލަށް ގޮސްފަ އެވެ.
ރާއްޖޭގައި ދަރިމައިވުމުގެ ނިސްބަތް ބަދަލުވަމުން އައި ގޮތް
ރާއްޖޭގައި ދަރިމައިވާ މީހުންގެ ނިސްބަތް ބޮޑުތަނުން ދަށަށް ގޮސްފައިވާއިރު, މޯލްޑިވްސް ސްޓެޓިސްޓިކަލް ބިއުރޯއިން މީގެ ކުރިން ވަނީ, 2054 ވަނަ އަހަރާ ހަމައަށް ދާއިރު ރާއްޖޭގައި އޮންނާނީ އުމުރުން ދުވަސްވީ މީހުން ގިނަ އާބާދީއެއް ކަމަށް ލަފާކޮށްފަ އެވެ.
ގައުމެއްގައި އުމުރުން ދުވަސްވީ މީހުންގެ އާބާދީ އިތުރުވުމުން އެ ގައުމެއްގެ މަސައްކަތް ކުރާ އުމުރުފުރާގެ މީހުން މަދުވާނެ އެވެ. އަދި އޭގެ ސަބަބުން އުފެއްދުންތެރިކަމަށް އަސަރު ކުރާނެ ކަމެކެވެ.
ލޭބާ ފޯސްގައި އަންހެނުންނާއި ފިރިހެނުންގެ ފަރަގު ބޮޑު
ރާއްޖޭގެ އާބާދީގައި ޖުމްލަ 515,132 މީހުން ހިމެނޭއިރު, އެއީ 382,639 ދިވެހިންނާއި 132,493 ބިދޭސީންނެވެ. އޭގެ ތެރެއިން, 411,219 މީހުން ނުވަތަ 80 ޕަސަންޓު މީހުން ޝާމިލުވަނީ މަސައްކަތް ކުރާ އުމުރުފުރާ އަށެވެ. އޭގެ ތެރެއިން, 37 ޕަސަންޓު މީހުންނަކީ އަންހެނުންނަށް ވާއިރު, ފިރިހެނުން ހިއްސާކުރަނީ 63 ޕަސަންޓު މީހުންނެވެ.
މަސައްކަތް ކުރާ އުމުރުފުރައިގެ ތެރެއިން, ލޭބާފޯސްްގައި ހިމެނޭ އަންހެނުންނާއި ފިރިހެނުންގެ ފަރަގު ބޮޑެވެ. އެގޮތުން, އެ އުމުރުފުރައިގެ ފިރިހެނުންގެ ތެރެއިން 80 ޕަސަންޓު މީހުން މަސައްކަތް ކުރާއިރު, މަސައްކަތް ކުރެވޭ އުމުރުފުރައިގެ އަންހެނުންގެ ތެރެއިން މަސައްކަތް ކުރަނީ ހަމައެކަނި 49 ޕަސަންޓު މީހުންނެވެ.
އަދި މަސައްކަތެއް ލިބިފައި ނުވާ އާބާދީ ފަސް ޕަސަންޓުގައި ހުރިއިރު, އޭގެ ތެރޭގައި ފިރިހެނުންނަށްވުރެ އަންހެނުން ގިނަ އެވެ. އެގޮތުން ފަސް ޕަސަންޓު ފިރިހެނުން މަސައްކަތް ނުލިބި ތިބިއިރު, މަސައްކަތް ނުލިބި ތިބި އަންހެނުންގެ އަދަދު ހަ ޕަސަންޓަށް އަރަ އެވެ.
69 ޕަސަންޓު މީހުން ތިބީ ކައިވެނިކޮށްގެން
ބޯހިމެނުމުގެ ރިޕޯޓުގައި ދައްކާ ގޮތުގައި ރާއްޖޭގައި ދިރިއުޅޭ ދިވެހި އާބާދީގެ ތެރެއިން, 69 ޕަސަންޓު މީހުންނަކީ މީހަކާ އިނދެގެން އޭޅޭ މީހުންނެވެ. އަދި, 19 ޕަސަންޓު މީހުން ދުވަހަކު ވެސް ކައިވެނި ނުކުރާއިރު, ވަރިވެފައި ވަނީ ހަމައެކަނި ނުވަ ޕަސަންޓު މީހުންނެވެ. އަދި ހުވަފަތްވެފައި ވަނީ ތިން ޕަސަންޓު މީހުންނެވެ.
ރާއްޖޭގައި އެވްރެޖްކޮށް ކައިވެނި ކުރާ އުމުރަކީ އަންހެނެއް ނަމަ 20 އަހަރެެވެ. އަދި ފިރިހެނެއް ނަމަ 24 އަހަރެވެ.
