މީގެ ހައެއްކަ އަހަރު ކުރިން ޓާމިނަލް ކެފޭގެ ތެރެއަށް މޫނު ނިވާކޮށްގެން ތިބި ބަޔަކު ވަދެ ތޫނު އެއްޗަކުން ހަމަލާދީ ނަދީމް އިބްރާހިމް މަރާލި މައްސަލާގައި ދައުވާކުރާ މީހުން ބަންދުކޮށްދިނުމަށް ދައުލަތުން ހައި ކޯޓުގައި މިއަދު އެދެފި އެވެ.
ހއ. ތަކަންދޫ އިބްރާހިމީހިޔާ، ނަދީމް (ނަޑޭ) މަރާލި މައްސަލާގައި ތޫނު އެއްޗަކުން ހަމަލާދީ މީހަކު މެރުމުގެ ދައުވާ އުފުލީ ގ. ޝާރާޒް، މުހައްމަދު މަފާޒު ހުސައިން ސަލީމްގެ މައްޗަށެވެ. އޭގެ އިތުރުން ތޫނު އެއްޗެއް ބޭނުންކޮށްގެން ގަސްތުގައި މީހަކު މަރާލުމުގައި ބައިވެރިވި ކަމުގެ ދައުވާ ރ. އިންނަމާދޫ، ސަމަންތާ، ހުސައިން ޝާމިން އާއި ގއ. ގެމަނަފުށި، ހަވާސް، މުހައްމަދު ކަރަމް ސުހައިލް އަދި ލ. ގަން، ވިދާތަރި، އަލީ ނިފާޒުގެ މައްޗަށް އުފުލި އެވެ.
ކްރިމނަލް ކޯޓުން ހުކުމް ކުރީ އެ ހަތަރު މީހުންގެ މައްޗަށް ވެސް ކުށް ސާބިތުނުވާ ކަމަށެވެ. ދައުލަތުން އެ ހުކުމް އިސްތިއުނާފުކޮށްފައިވާ މައްސަލާގައި ހައި ކޯޓުގައި މިއަދު ބޭއްވި އިޖުރާއީ އަޑުއެހުމަށް ހާޒިރުވީ ދައުވާކުރާ މީހުންގެ ތެރެއިން މަފާޒު އަދި ޝާމިން އެކަންޏެވެ.
ދައުލަތުގެ ވަކީލު އަހުމަދު ނައުފަލް ޝަރީއަތުގައި އެދިވަޑައިގަތީ އެ ދެ މީހުން ވެސް ބަންދުގައި ބަހައްޓައިދިނުމަށެވެ. ސަބަބެއްގެ ގޮތުގައި ފާހަގަ ކުރެއްވީ ދެ ބޭފުޅުންގެ ކުށުގެ ރެކޯޑު އޮތުމުން، މުޖުތަމައަށް ނުރައްކަލެއް އޮންނާނެ ކަން ބެލެވުމެވެ.
އޭގެ އިތުރަށް، ބަންދުގައި ހުރުމަށް ފަހު ކުށް ސާބިތުނުވާތީ މިނިވަންވި ފަހުން މާރާމާރީއެއް ހިންގަން އުޅުނު ކަމުގެ ތުހުމަތުގައި ތޫނު ހަތިޔާރުތަކެއް ހިފައިގެން އުޅެނިކޮށް މާލޭގެ މަގުމަތިން މަފާޒު ހައްޔަރުކޮށްފަ އެވެ. އެއީ ދައުލަތުގެ ނުކުތާއަށް ބާރު ލިބިދޭ ކަމެއް ގޮތުގައި ދައުލަތުގެ ވަކީލު ފާހަގަ ކުރެއްވި އެވެ.
މިއަދުގެ އަޑުއެހުމަށް މަފާޒު އަދި ޝާމިން ވެސް ހާޒިރުވީ ވަކީލަކާ ނުލަ އެވެ. ދެ މީހުން ވެސް އެދުނީ ވަކީލަކާއެކު، ދައުލަތުގެ ހުށަހެޅުމަށް ޖަވާބުދާރީވުމަށެވެ. މައްސަލަ ބައްލަވާ ފަނޑިޔާރުންގެ ބެންޗުން ނިންމެވީ ވަކީލަކު ހަމަޖައްސަން ތިން ދުވަހުގެ މުއްދަތެއް ދިނުމަށެވެ.
އެ ކެފޭ ތެރޭގައި ނަދީމް އިންދައި، މޫނު ނިވާކޮށްގެން ވަން ބަޔަކު އޭނާގެ ބޮލަށް ވަޅިން ހަމަލާދިނީ ޖުލައި 27، 2017 ވަނަ ދުވަހުގެ އިރުއޮއްސި 6:30 ހާއިރު އެވެ. އޭނާ މަރުވީ އޭގެ ދެ ދުވަސް ފަހުން އޭޑީކޭގެ އައިސީޔޫގައި ފަރުވާދެމުން ދަނިކޮށެވެ.
ކާކުކަން ނޭނގޭ ގޮތަށް މޫނު ނިވާކޮށްގެން ހިންގި ކުށަކަށް ވާއިރު، އެ މީހުންގެ މޫނު ފެނުނު ކަމަށް ހެކިބަސް ދިނީ ދައުލަތުން ހުށަހެޅި އެންމެ ދެ ހެކިންނެވެ. ސިއްރު ހެކިންގެ ގޮތުގައި ނެގި އެ ދެ ހެކިން ވަނީ ފަހުން އެ މީހުންގެ ހެކިބަސް އަނބުރާ ގެންދިޔުމަށް އެދި ޝަރީއަތަށް ސިޓީއެއް ފޮނުވައިފަ އެވެ.
ކްރިމިނަލް ކޯޓުގައި ހަތަރު މީހުންގެ މައްޗަށް ކުށް ސާބިތުނުވާ ކަމަށް ކަނޑައެޅީ އެ ކަމުގެ މައްޗަށް ބިނާކޮށްފަ އެވެ.
