ޕީޕީއެމްގެ ފަރާތުން ރިޔާސީ އިންތިހާބަށް ރައީސް ޔާމީން އަބްދުލްގައްޔޫމް ނޫން ބޭފުޅަކު ނެރެން ސޯޝަލް މީޑިއާގައި ކެމްޕޭން ކުރަމުންދަނީ ސަރުކާރުގެ "ފޭކް" އެކައުންޓުތަކުން ކަމަށް ޕީޕީއެމްގެ ލީޑާޝިޕުން ބުނެފި އެވެ.
އިލްކެޝަން ކޮމިޝަން ބޭރުގައި ޕީޕީއެމުން މިއަދު ބޭއްވި ނޫސްވެރިންގެ ބައްދަލުވުމުގައި ޕީއެންސީގެ ރައީސް އަބްދުއްރަހީމް އަބްދުالله ވިދާޅުވީ, ސަރުކާރުގެ ބޮޓު އެކައުންޓުތަކުން, ޕީޕީއެމްގެ ލީޑާޝިޕުގައި ހިމެނިވަޑައިގަންނަވާ ބޭފުޅުންގެ ނަމުގައި ސޯޝަލް މީޑިއާގައި ކެމްޕޭން ހިންގަމުންދާ ކަމަށެވެ. އަދިި އެއީ, ޕީޕީއެމްގެ ތެރޭގައި ބައިބައިވުން އުފައްދަން ކުރާ ކަމެއްގެ ގޮތުގައި އޭނާ ސިފަ ކުރެއްވި އެވެ.
ޕީޕީއެމްގެ ލީޑާޝިޕުގައި ހިމެނިވަޑައިގަންނަވާ މާލެ ސިޓީ ކައުންސިލުގެ މޭޔަރު ޑރ. މުހައްމަދު މުއިއްޒު, 2023 ވަނަ އަހަރުގެ ރައީސް ކަމަށް ހޮވުމަށް ސޯޝަލް މީޑިއާގައި ދަނީ ކެމްޕޭން ކުރަމުންނެވެ. އެކަމާ ގުޅޭގޮތުން ސީދާ މުއިއްޒުއާ ސުވާލުކުރުމުން އޭނާ ވިދާޅުވީ "އެންމެން ވެސް މިތިބީ ރައީސް ޔާމީނާއެކު އެކަތިގަނޑެއް ގޮތުގައި" ކަމަށެވެ. އެހެން ވިދާޅުވެ, އިތުރަށް އެ ސުވާލަށް ޖަވާބު ދެއްވުމަށް މުއިއްޒު ދެކޮޅު ހެއްދެވި އެވެ.
"އަޅުގަނޑުމެން ބައިބައި ކުރުމަށްޓަކައި ސަރުކާރުން ކުރެވެން ހުރި ހުރިހާ މަސައްކަތެއް އެބަކުރޭ. އޭގެ ތެރެއިން އަޅުގަނޑާ ބެހޭ ޕޯސްޓުތައް ވެސް އަންނާނެ. މުއިއްޒުއާ ބެހޭވެސް, ޝިޔާމް, ސައީދު ވެސް" އަދުރޭ ވިދާޅުވި ގޮތުގައި ލީޑާޝިޕްގެ ބޭފުޅުންނަށް ކެމްޕޭން ކުރުމަކީ އާ ކަމެއް ނޫން ކަމަށެވެ.
ޕީޕީއެމުން ތަކުރާރުކޮށް, ޔަމީން ނޫން ކެންޑިޑޭޓެއް ނުނެރޭނެ ކަމަށް ތަކުރާރުކޮށް ބުނި ނަމަވެސް, އެ ޕާޓީގެ ބައެއް ސަޕޯޓަރުން އަންނަނީ އިތުރު ކެންޑިޑޭޓަކަށް ތާއިދު ކުރުމުގެ ވިސްނުން ފާޅުކުރަމުންނެވެ.
"ގްރާސްރޫޓް ލެވެލްގައި ތަފާތު ވާހަކަ ދައްކާނެ. އެއިން އެއްވެސް ބޭފުޅަކު ބޭނުމެއް ނުވާނެ ރައީސް ޔާމީން ނޫން އެހެން ބޭފުޅަކު ވެރިކަމަށް އަންނާކަށް" ސޯޝަލ މީޑިއާގަައި ދައުރުކުރާ އެ ވާހަކަ ތަކާ ބެހޭ ގޮތުން އަދުރޭ ވިދާޅުވި އެވެ.
އޭނާ ވިދާޅުވި ގޮތުގައި އެ ޕާޓީގެ ސަޕޯޓަރުން އެހެން ކެންޑިޑޭޓުންގެ ވާހަކަދެއްކި ނަމަވެސް, އެއީ އެ ސަޕޯޓަރުން ބޭނުންވާނެ ގޮތެއް ނޫނެވެ.
އޭނާ ވިދާޅުވީ ޕީޕީއެމްގެ ފަރާތުން ރަނިން މޭޓުގެ ގޮތުގައި ނިކުންނާނެ ބޭފުޅެއް ވެސް ކަނޑައަޅާނީ ރައީސް ޔާމީން ކަމަށެވެ. އަދި, އިންތިހާބާ ބެހޭ މިފަދަ ކަންކަމުގައި, ޔާމީންގެ ވިސްނުން ނޫން އެހެން އެއްވެސް ބެކަޕް ޕްލޭނެއް ވެސް ނުގެންގުޅޭ ކަމަށް ތަކުރާރުކޮށް އަދުރޭ ވިދާޅުވި އެވެ.
