އަންނަ ސެޕްޓެމްބަރުމަހު ރާއްޖޭގައި ބާއްވާ ރިޔާސީ އިންތިހާބުގައި ވާދަކުރައްވަން ޕާޓީއަކުން ދިން އެންމެ ފުރަތަމަ ޓިކެޓަކީ އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓް އަދި ރާއްޖޭގެ ކުރީގެ ރައީސް އަބްދުﷲ ޔާމީން އަބްދުލް ގައްޔޫމަށް އެ ދެޕާޓީން އެރުވި ޓިކެޓެވެ. އެ މަނިކުފާނަށް ކެމްޕޭން ކުރަން ވެސް އެ ދެޕާޓީން މިހާރު ވަނީ ފަށައިފަ އެވެ.
އެހެން ނަމަވެސް އެމްއެމްޕީއާރްސީގެ ބޮޑު ހިޔާނާތުގެ ތެރޭގައި ހިމެނޭ ވ.އާރަށުގެ މައްސަލާގައި އެމަނިކުފާނު 11 އަހަރަށް ޖަލަށް ލާން ކްރިމިނަލް ކޯޓުން ކޮށްފައިވާ ހުކުމެއް އެބަ އޮތެވެ. އެކަން އެހެން އޮތަސް ޕީޕީއެމް/ޕީއެެންސީން ތަކުރާރުކޮށް ބުނަމުން ގެންދަނީ އެކޯލިޝަންގެ ރިޔާސީ ކެންޑިޑޭޓަކީ ޔާމީނު ކަމަށާއި އެކަމުގައި އެހެން ގޮތެއް ނެތް ކަމަށެވެ.
އެހެން ނަަމަވެސް އެކަން ވާން އޮތީ ހައިކޯޓުގައި މިހާރު ކުރިއަށްދާ އިސްތިއުނާފު ޔާމީނަށް ކާމިޔާބުކުރެއްވިގެންނެވެ.
"އަދަދު"ގެ "އެތެރެފުށް" ޝޯގައި އިލެކްޝަންސް ކޮމިޝަން (އީސީ)ގެ ރައީސް ފުއާދު ތައުފީގާ އެ ސުވާލުކުރުމުން އޭނާ ވިދާޅުވީ ޖަލުހުކުމް ދެމިއޮތްހާ ހިނދަކު ޔާމީނުގެ ކެންޑިޑޭސީ އެކޮމިޝަނުން ބަލައިނުގަންނާނެ ކަމަށެވެ.
"[ޖަލުހުކުމް] ބާތިލުނުކުރާހާ ހިނދަގު ވާދައެއް ނުކުރެއްވޭނެ. ކެންޑިޑޭސީ ބަލައެެއް ނުގަންނާނެ. [ފޯމު] ސަބްމިޓް ކުރެއްވިދާނެ އެކަމަކު އަޅުގަނޑުމެން [އެ ކެންޑިޑޭސީ] ބަލައެއް ނުގަންނާނެ،" ފުުއާދު ވިދާޅުވި އެވެ.
ފުއާދު ވިދާޅުވި ގޮތުގަައި ރިޔާސީ އިންތިހާބަށް ކުރިމަތިލާން ހުޅުވައިލާފައި އޮންނަ މުއްދަތުގެ ތެރޭގައި ޔާމީނުގެ ހުކުމް ބާތިލުކޮށްފި ނަމަ އެމަނިކުފާނުގެ ކެންޑިޑޭސީ ކޮމިޝަނުން ވަގުތުން ބަލައިގަންނާނެ އެވެ.
"ހުކުމް ބާތިލުކޮށްފިއްޔާ ހަމަ ޖެހިގެން އަންނަ ދުވަހު ވެސް އަޅުގަނޑުމެންނަށް [ކެންޑިޑޭސީ] ބަލައިގަނެވޭނެ،" ފުއާދު ވިދާޅުވި އެވެ.
ޕީޕީއެމް/ޕީއެެންސީން ބުނަމުން އަންނަނީ ޔާމީނުގެ ކެންޑިޑޭސީ އީސީން ބަލައިނުގަނެފި ނަމަ ކޯޓަށް ދާނެ ކަމަށެވެ. ފުއާދު ވިދާޅުވި ގޮތުގައި އަދި ގާނޫނުގައި ވެސް އޮތް ގޮތުން، އެގޮތަށް ކޯޓަށް ދިއުމުން ކޯޓުން އަންގައިފި ނަމަ އީސީއަށް ޖެހޭނީ ޔާމީނުގެ ކެންޑިޑޭސީ ބަލައިގަންނާށެެވެ.
"[ހުކުމް ދެމި އޮތީތީ] ކެންޑިޑޭސީ ބަލައި ނުގަތުން ނުވާނެ ބާތިލު ނިންމުމަކަށް. އެހެން ނަމަވެސް އެ ނިންމުން ބަދަލުކުރަން ސުޕްރީމްކޯޓުން އަންގަވައިފިއްޔާ ދެން އަޅުގަނޑުމެން ޖެހޭނެ [ކެންޑިޑޭސީ ބަލައިގަންނަން،" ފުއާދު ވިދާޅުވި އެވެ.
ޕީޕީއެމް/ޕީއެންސީގެ ލީޑަޝިޕުން ގަބޫލުކުރާ ގޮތުގައި ރައީސް ޔާމީނަށް އިއްވާފައިވާ ޖަލުހުކުމް ހައިކޯޓުން ބާތިލުކުރާނެ އެވެ. ރިޔާސީ އިންތިހާބަށް ކުރިމަތިލެވޭހާ މޫސުމުގައި އިސްތިއުނާފުގެ ޝަރީއަތް ނިމޭނެ ކަމަށް ވެސް އެ ބޭފުޅުން ގަބޫލުކުރައްވަ އެވެ.
