މިހާރު ކުރަމުންދާ ވިއްސާރައިގައި ރާއްޖޭގެ 13 ރަށަކުން 13 ގެއަކަށް ގެއްލުންތަކެއް ވެއްޖެ އެވެ.
ނެޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ) ގެ އެމާޖެންސީ އޮޕަރޭޝަންސް މެނޭޖަރު "އަދަދު"އަށް މައުލޫމާތު ދެއްވަމުން ވިދާޅުވީ، ވިއްސާރާގައި ގެއްލުންވި ރަށްތަކުގެ ކައުންސިލުތަކާއި ގުޅިގެން އެ ރަށްތަކަށް އެހީތެރިކަން ފޯރުކޮށްދެމުން އަންނަ ކަމަށެވެ.
މޫސުން ގޯސްވުމުގެ ސަބަބުން އެކި ވަރުގެ ގެއްލުންވި ރަށްތަކުގެ ތެރޭގައި ބ. މާޅޮސް، ޅ. ނައިފަރު، ހއ. އިހަވަންދޫ، ށ. ފުނަދޫ، ށ. ފީވައް، ށ. ކޮމަންޑޫ، ހދ. ކުޅުދުއްފުށި، ކ. މާފުށި، ކ. ތުލުސްދޫ، ކ. ދިއްފުށި، ކ. ހުރާ، ފ. ފީއަލި އަދި އއ. ފެރިދޫ ހިމެނެ އެވެ.
ވިއްސާރައިގެ ސަބަބުން ބ. މާޅޮހުން ތިން ގެޔަކަށް ފެންވަދެ، ފެން ހިންދުމުގެ މަސައްކަތް ކޮށްފައިވާއިރު ޅ. ނައިފަރުގެ ދެ ގެއެއްގެ ވަށާފާރު ވެއްޓި ގެއްލުންތަކެއް ވެފައިވާއިރު، އެއް ގެއެއްގެ ފުރާޅު ވަނީ އެއްލާލާފަ އެވެ
އަދި, ށ. ފުނަދޫގެ ބަނދަރުގެ ހުރި ހަޓެއް ވައިގެ ސަބަބުން ހަލާކުވެފައިވާއިރު، ފީވަކުން އެއް ގެއެއްގެ ފުރާޅު ވަނީ އެއްލާލާފަ އެވެ. އޭގެ އިތުރުން, ހަމަ އެ އަތޮޅު ކޮމަންޑޫއަށް ބޯކޮށް ވާރޭ ވެހުމުގެ ސަބަބުން ރަށު ތެރޭގައި ފެންބޮޑުވެ، އެއް ގެއަކަށް ފެންވަދެ ގެއްލުން ލިބިފައިވެ އެވެ.
ވައިގަދަ ވުމުގެ ސަބަބުން ހއ. އިހަވަންދޫގައި ގަހެއް ވެއްޓިފައި -- ފޮޓޯ: އިހަވަންދޫ ކައުންސިލް
ހއ. އިހަވަންދޫގެ އެއް ގެއެއްގެ ފުރާޅު އެއްލާލުމުގެ ސަބަބުން މީހުންނަށް ވެސް ކުދިކުދި އަނިޔާތައް ލިބިފައިވާއިރު، އެއް ގެއެއްގެ އިންފާރު ވެއްޓިފައިވާ ކަމަށް ވެސް އެންޑީއެމްއޭއިން މައުލޫމާތުދެ އެވެ. ވައިގަދަވުމުގެ ސަބަބުން ކ. ހުރާގެ ގެއަކުން ތިން ޓިނު ގަނޑު އެއްލާލާފައިވާއިރު، މާފުށި، ދިއްފުށި އަދި ތުލުސްދޫގައި ރުށްގަސް ވެއްޓުމުގެ ހާދިސާތައް ހިނގާފައިވެ އެވެ.
އޭގެ އިތުރުން, ފ. ފީއަލީ, އއ. ފެރިދޫ އަދި ހދ. ކުޅުދުއްފުއްޓަށް ވެސް އެކިވަރުގެ ގެއްލުންތައް ވަނީ ލިބިފަ އެވެ.
މޫސުން ގޯސްވެ ކަނޑު ގަދަވުމުގެ ސަބަބުން ކަނޑުމަތީގައި ނުރައްކާތެރި ހާދިސާތައް ވެސް ހިނގާފައިވާއިރު، ގައުމީ މޫސުމާއި ބެހޭ އިދާރާ (މެޓް) އިން ވަނީ ހުރިހާ ފަރާތްތަކުންވެސް އެކަމަށް ސަމާލުވުމަށް އިލްތިމާސްކޮށްފަ އެވެ.
