އިންޓަނޭޝަނަލް ބޯޑީބޯޑިން ކޯޕަރޭޝަން (އައިބީސީ) ވޯލްޑް ޓުއާގައި ހިމެނޭ "ވިޒިޓް މޯލްޑިވްސް ޕްރޯ 2023" ރަސްމީކޮށް ލޯންޗުކޮށްފި އެވެ.
އޮގަސްޓް 3-12 އަށް މާލޭގެ ވަރުނުލާ ރާޅުގަނޑު ސަރަހައްދުގައި ބޭއްވުމަށް ހަމަޖެހިފައިވާ ބައިނަލްއަގްވާމީ ބޮޑީބޯޑިން އިވެންޓު ރަސްމީކޮށް ލޯންޗްކޮށްދެއްވީ މިނިސްޓަރު އޮފް ޔޫތު ސްޕޯޓްސް އެންޑް ކޮމިއުނިޓީ އެމްޕަވާމަންޓް އަހުމަދު މަހުލޫފު އެވެ.
އައިބީސީ ވޯލްޑް ޓުއާގެ ދެވަނަ އަށް އެންމެ އަގުބޮޑު މުބާރާތް އެންމެ ފުރަތަމަ ބޭއްވީ މިދިޔަ އަހަރުގަ އެވެ. މިދިޔަ އަހަރުގެ ޖުލައި 29 އިން އޮގަސްޓް 7 މާލޭގައި ކުރިއަށްދިޔަ "މޯލްޑިވްސް ޕްރޯ"ގައި ދުނިޔޭގެ 15 ގައުމަކުން ގިނަ ބޮޑީބޯޑަރުންތަކެއް ބައިވެރިވި އެވެ. އޭގެ ތެރޭގައި ދުނިޔޭގެ ޗެމްޕިއަންކަން ހޯދާފައިވާ ބޮޑިބޯޑަރުންވެސް ގިނަ އަދަދަކަށް ހިމެނެ އެވެ.
މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ) އިން ލަފާ ކުރާ ގޮތުގައި މިއަހަރު ދުނިޔޭގެ 20 ގައުމަކުން 100 އަށްވުރެ ގިނަ ބޮޑިބޯޑަރުން ބައިވެރިވާނެ އެވެ. އޭގެ ތެރޭގައި ދުނިޔޭގެ ކުރީގެ ޗެމްޕިއަނުންނާއި މިހާރުގެ ޗެމްޕިއަނުންގެ އިތުރުން ކުރިއަރަމުން އަންނަ ޒުވާން ގިނަ އެތުލީޓުން ހިމެނެ އެވެ.
މިދިޔަ އަހަރާ ހިލާފަށް މި އަހަރުގެ މުބާރާތުގެ ފިރިހެން އޯޕަން ބައިގެ އެއް ވަނަ އަށް 3000 ޕޮއިންޓް ލިބޭނެ އެވެ. މިއީވެސް މިއަހަރު ރާއްޖޭގައި ބާއްވާ މުބާރާތަށް ދުނިޔޭގެ މަތީ ފަންތީގެ ގިނަ ބޮޑީބޯޑަރުންތަކެއް އަންނާނެކަމަށް އެމްބީބީއޭ އިން ލަފާ ކުރާ އެއް ސަަބަބެވެ.
ވިޒިޓް މޯލްޑިވްސް ޕްރޯގެ ލޯންޗިން އިވެންޓުގައި އެމްބީބީއޭގެ ފަރާތުން ރަޝް ވާހަކަދައްކަނީ - ފޮޓޯ: އިސްމާއިލް އަޒްމީން/އަދަދު
"މިފަހަރު އޮސްޓްރޭލިއާގެ މޮޅެތި ބޮޑީބޯޑަރުން އަންނާނެ، ދެން މެލޭޝިއާއިންވެސް މިފަހަރު އަންނާނެ. ކުރީގެ އެންމެ މަތީ ފަންތީގެ ބޯޑަރުންނާ މިހާރުގެ މަޝްހޫރު ޗެމްޕިއަނުން އަންނާނެ. އަސްލު މި މުބާރާތުގެ ޕޮއިންޓްސް އަށް ބަލާއިރު ވޯލްޑް ޗެމްޕިއަންކަން ލިބެން އަންނަނީ ރާއްޖޭގެ މުބާރާތުގައި އަޅައިގެން. އެހެންވީމަ މިދިޔަ އަހަރަށް މާ ބޮޑަށްވެސް ޕާޓިސިޕޭޝަން އިތުރުވާނެ" އެމްބީބީއޭގެ ޖެނެރަލް ސެކްރެޓަރީ ހަސަން ރަޝީދު (ރަޝް) ވިދާޅުވި އެވެ.
އައިބީސީ ވޯލްޑް ޓުއާގެ "މޯލްޑިވްސް ޕްރޯ" އާ ގުޅޭގޮތުން މިނިސްޓަރު މަހުލޫފު ވިދާޅުވީ، މިއަހަރަކީ ބައިނަލްއަގްވާމީ ގިނަ އިވެންޓްތަކެއް ބާއްވާ އަހަރަކަށްވެފައި ގިނަ ކާމިޔާބީތަކެއް ކުޅިވަރުތަކުން ހޯދާއިރު މިއީވެސް ކާމިޔާބު މުބާރާތަކަށްވާނެކަމަށް އުއްމީދު ކުރައްވާ ކަމަށެވެ. އޭނާ ބުނީ ކުޅިވަރުގެ ތެރެއިން ރާއްޖެ އިސްތިހާރު ކުރަން ކުރާ މަސައްކަތުގައި މި މުބާރާތަކީވެސް ފާހަގަކޮށްލެވޭ މުބާރާތެއްކަމަށެވެ.
ވިޒިޓް މޯލްޑިވްސް ޕްރޯގެ ލޯންޗިން އިވެންޓުގައި ޔޫތު މިނިސްޓަރު އަހުމަދު މަހުލޫފު ވާހަކަދައްކަވަނީ - ފޮޓޯ: އިސްމާއިލް އަޒްމީން/އަދަދު
ރާއްޖޭގައި މިއަހަރުވެސް "މޯލްޑިވްސް ޕްރޯ" ބޭއްވުމަށް ދިވެހި ސަރުކާރުންނާއި ޔޫތު މިނިސްޓްރީން ވެދެއްވާ އެހީތެރިކަން އެމްބީބީއޭ އިން ފާހަގަކުރި އެވެ.
މިދިޔަ އަހަރުގެ "މޯލްޑިވްސް ޕްރޯ" ދިވެހި އެތުލީޓުން ރަނގަޅު ނަތީޖާތަކެއް ނެރުނެވެ. މިގޮތުން ޖޫނިއާ ބައިގެ ފައިނަލްގައި އާމިން އުމަރު މޫސާ ވާދަކުރިއިރު، ޑްރޮޕް ނީ ބައިގެ ސެމީ ފައިނަލުގައި އަލީ ހުޝްރުވާން އަހުމަދު (ކުޑަ އައްޔަ) ވާދަކުރި އެވެ. މި ނަތީޖާތަކާ އެކު ދުނިޔޭގެ ރޭންކިންގައި ވެސް މި ދެ ކުޅުންތެރިން ހިމެނުނެވެ. އަހަރު ނިންމާލިއިރު، ކުޑަ އައްޔަ އޮތީ ޑްރޮޕް-ނީ ބައިގެ 12 ވަނައިގަ އެވެ.
