ޕީޕީއެމްގެ ރިޔާސީ ކެންޑިޑޭޓް، ކުރީގެ ރައީސް އަބްދުﷲ ޔާމީނަށް ކެޕޭންކުރުމަށް ޓަކައި މާލެ ސަރަހައްދުގައި ދޮރުން ދޮރަށް ހިނގުމުގެ ހަރަކާތެއް ފަށަން އެ ޕާޓީން ތައްޔާރުވެއްޖެ އެވެ.
ޕީޕީއެމުން މިރޭ ބުނީ, ރައީސް ޔާމީން ކެމްޕޭނުގެ ތެރެއިން މާލޭ ސަރަހައްދުގެ ދޮރުން ދޮރަށް ހިނގާ ހަރަކާތެއް ފެށުމަށް ނިންމާފައިވާ ކަމަށެވެ.މާދަމާ މެންދުރު ފަހު 1:45 އެ ހަރަކާތް ފަށާނެ ކަމަށް ވެސް އެ ޕާޓީން ބުންޏެވެ.
ޔާމީނުގެ ކެމްޕޭން ހަރަކާތްތައް ފަށަން, ކެމްޕޭން ޓީމުން ތައްޔާރުވެފައިވީ ނަމަވެސް, އެމަނިކުފާނު ގެންދަވަނީ މާފުށީ ޖަލުގައި 11 އަހަރުގެ ހުކުމެއް ތަންފީޒު ކުރައްވަމުންނެވެ.
އެމްއެމްޕީއާރުސީ މެދުވެރިކޮށް ވ. އާރަށް ކުއްޔަށް ދޫކުރުމުގައި 1.1 މިލިއަން ޑޮލަރު ރިޝްވަތުގެ ގޮތުގައި ނަންގަވައި އެ ފައިސާ ލޯންޑަކުރެއްވި ކަމަށް ކްރިމިނަލް ކޯޓުގައި ސާބިތުވެ ޔާމީން ޖަލު ހުކުމް ތަންފީޒުކުރައްވަމުން ގެންދަވާއިރު, އެ މައްސަލަ ވަނީ ހައި ކޯޓުގައި އިސްތިއުނާފުކޮށްފަ އެވެ.
އެހެން ނަމަވެސް, އެމަނިކުފާނުގެ ކެމްޕޭން ޓީމުން ގަބޫލުކުރާ ގޮތުގައި, މިއަހަރުގެ ރިޔާސީ އިންތިހާބުގައި ވޯޓުލާ ކަރުދާހުގައި ޔާމީނުގެ ނަން އޮންނާނެ އެވެ. އަދި އިންތިހާބުގައި ވާދަކުރައްވާ, ކާމިޔާބު ކުރައްވާނެ ކަމަށް ވެސް ކެމްޕެއިން މެނޭޖަރު ކެޕްޓަން މުހައްމަދު އަމީން ވަނީ މީގެ ކުރިން ވިދާޅުވެފަ އެވެ.
ރ. ފުއްގިރި ކުއްޔަށް ދޫކުރުމުގައި ހިޔާނާތްތެރިވި ކަމަށް ބުނާ މައްސަލައެއް ވެސް ޔާމީނާ ދެކޮޅަސް ކްރިމިނަލް ކޯޓުގައި ކުރިއަށް އެބަ ދެއެވެ.
