ރައީސް އިބްރާހީމް މުހައްމަދު ސޯލިހަށް ލަފާ ދެއްވާ 'އެޑްވައިޒާ ޓު ދަ ޕްރެޒިޑެންޓް' ގެ މަގާމުގައި ހުންނެވި ކުރީގެ ހޯމް މިނިސްޓަރު މުހައްމަދު ޝިހާބް އެމަގާމުން މިއަދު އިސްތިއުފާދެއްވައިފި އެވެ.
ޝިހާބް އިސްތިއުފާ ދެއްވިކަން ރައީސް އޮފީހުން ކަށަވަރުކޮށްދިން ނަމަވެސް އެކަމާ ބެހޭ އިތުރު ތަފްސީލެއް ނުދެ އެވެ. އޭނާގެ ބަހެއް ލިބޭތޯ "އަދަދު" އިން ގުޅި ނަމަވެސް ފޯނު ނުނަންގަވާތީ ބަހެއް ލިބޭގޮތެއް ނުވި އެވެ.
މުހައްމަދު ޝިހާބަކީ ރައްޔިތުންގެ މަޖިލީހުގެ މެންބަރުކަން ގިނަ ދުވަސްތަކެއްވަންދެން ކުރެއްވި އަދި ރައްޔިތުންގެ މަޖިލީހުގެ ރައީސްކަމާއި ދެ ވުޒާރާއެއްގެ ވަޒީރުކަމާއި މާލެ ސިޓީގެ މޭޔަރުކަމުގެ އިތުރުން ސަރުކާރުގެ އެކިއެކި އިދާރާތަކުގެ އިސް މަގާމުތައް އަދާކުރައްވާފައިވާ ބޭފުޅެކެވެ. އޭނާ މަތީ ތައުލީމު ހާސިލުކުރެއްވީ އޮސްޓްރޭލިޔާގެ ޖޭމްސް ކުކް ޔުނިވަރސިޓީންނެވެ.
އޭނާއަކީ ވެރިކަންކުރާ ކޯލިޝަނުގެ މައިޕާޓީ އެމްޑީޕީގައި ވެސް އިސްދައުރެއް އަދާކުރެއްވި ބޭފުޅެކެވެ.
