ރާއްޖޭގައި އިންޑިއާ ސިފައިން ތިބުމާ ދެކޮޅަށް ކުރިއަށް ގެންދާ ކަމަށް އެ ދެޕާޓީން ބުނާ "އިންޑިއާ އައުޓް" ކެމްޕޭނުގެ ތެރެއިން އިއްޔެ ބޭއްވި އެއްވުމުގައި އިންޑިއާގެ ބޮޑުވަޒީރު ނަރެންދުރާ މޯދީގެ މާލި ނެރެފައި ވަނީ ނަފްރަތާއި ރުޅިވެރިކަން އެ ކެމްޕޭނުގެ ތެރެއިން ފެތުރުމަށް ކަމަށް ބުނެ އެ އަމަލު ސަރުކާރުން ކުށްވެރިކޮށްފި އެވެ.
ސަރުކާރާ ދެކޮޅަށް އިދިކޮޅުން ތައްޔާރުކޮށްފައިވާ ލަވަތައް އަޑުގަދަކޮށް ޖަހަމުން، އެ ލަވަތަކުގެ މިއުޒިކާ އެއްގޮތަށް ހަރަކާތްތެރިވި މާލިތައް ތިބީ މުޅި ގައިގައި ހުދު ފޮތި އޮޅައި، ،މޯދީގެ އިތުރުން ރައީސް ސޯލިހުގެ ފޮޓޯތަކުން ތައްޔާރުކޮށްފައިވާ މާސްކްތައް އަޅައިގެންނެވެ.
އެކަމާ ގުޅިގެން ފޮރިން މިނިސްޓްރީން ނެރުނު ބަޔާނެއްގައި ވަނީ "އިންޑިއާ އައުޓް" ކެމްޕޭން ބޭނުންކޮށްގެން ހިންގި ހަރަކާތް ހަރުކަށި އިބާރާތުން ކުށްވެރިކޮށްފަ އެވެ. އަދި, އެއީ ބޭއިހުތިރާމް ކުރުން ކަމަށާއި އަދި, އެ ކެމްޕޭން މެދުވެރިކޮށް ފަތުރަމުން ދޮގު މައުލޫމާތުތަކެއް ކަމަށް ވެސް އެ ބަޔާނުގައި ބުނެފައިވެ އެވެ.
"ބޮޑު އީދު ފަދަ އުފަލާއި ހިތްހަމަޖެހުން ގެނުވައިދޭ މުނާސަބަތެއްގައި ހިންގި މިފަދަ ގަދަރު ކުޑަ އަމަލުތަކުން ހަމައެކަނި ހިތްވަރުދެވެނީ ނަފްރަތަކަށް ނޫން. މިއީ ރުޅިވެރިކަން ފަތުރައި ރާއްޖެ އާއި އިންޑިއާ އާ ދެމެދު އޮތް ގާތް ގުޅުން ނައްތާލުމަށް ކުރި ކަމެއް," އެ ބަޔާނުގައި ސަރުކާރުން ބުނެފައިވެ އެވެ.
އޭގެ އިތުރުން, އިންޑިއާ އަކީ އަބަދުވެސް ރާއްޖޭގެ އެންމެ ގާތް އެކުވެރިޔާ ކަމަށާއި އަބަދުވެސް "އިންޑިއާ ފަސްޓް" ސިޔާސަތު ދަމަހައްޓާނެ ކަމުގެ ޔަގީންކަން ވެސް ސަރުކާރުން ވަނީ ދީފަ އެވެ.
ޕީޕީއެމުން އިއްޔެ ބުނި ގޮތުގައި މިއަދު އެގޮތަށް މާލި ނެރުނީ މާލޭގެ ރައްޔިތުންނަށް ގޯތި ދޭން ސަރުކާރުން ނެރުނު ލިސްޓްގައި އިންޑިއާ މީހުން ހިމެނުމުން، އެކަމުގައި ރައްޔިތުންގެ ހުރި "އިހުސާސްތައް" ސަރުކާރަށް އަންގައިދޭށެވެ.
ސަރުކާރަށް ތާއީދުކުރާ ބައެެއް މީހުން ބުނާ ގޮތުގައި އިންޑިއާ އައުޓް ހަރަކާތް އިތުރަށް ވަރުގަދަކުރަން ޕީޕީއެމް/ޕީއެންސީއަަށް މިހާރު ވަނީ އިތުރު ހިތްވަރެއް ލިބިފަ އެވެ. އެއީ އަލަށް އުފައްދާ ދަ ޑިމޮކްރެޓްސް، އިން އެ ދެޕާޓީއާ ކުރާ މަޝްވަރާއަށް ހުރަސް އެޅޭ ކަމެއްގެ ގޮތުގައި އެ ހަރަކާތް އޮތް އޮތުން ނިމިފައި ވާތީ އެވެ.
ޑިމޮކްރެޓުން އެންމެ ފަހުން ބުނެފައި އޮތީ ޕީޕީއެމުން ކުރާ އެފަދަ ކަންތައްތަކަށް ދޫ ދީގެން ވެސް އެކުގައި މަސައްކަތް ކުރަން އެޕާޓީ އޮތީ ތައްޔާރަށެވެ. ރައީސް ސޯލިހުގެ ގަރާރަކުން އެ ކެމްޕޭން އޮތީ މަނާކޮށްފަ އެވެ. އެ ގަރާރު އޮތް ނަމަވެސް އިދިކޮޅުން އެ ކެމްޕޭން ހުއްޓާލާފައި ނުވެ އެވެ.
