މާލޭގެ ބޮޑު ތަކުރުފާނު މަގުގައި ސިޓީ ކައުންސިލުން ހަރުކުރި ސްމާޓް ސްޓްރީޓް ލައިޓްތަކުގެ ސްޕީކަރުތަކުން އަޑުހަރުކޮށް ތަކުބީރު އިއްވަން ފަށައިފި އެވެ.
މާލެ ސިޓީ ކައުންސިލުން ބުނީ، ޗައިނާގެ އެހީގައި ހަރުކޮށްފައިވާ އެ މަގުބައްތިތަކުގެ ސްޕީކަރުތަކުން ތަކުބީރު އިއްވާނީ މިއަދު މެންދުރުފަހުން ފެށިގެން ފެށިގެން އީދު ނިމެންދެކަށެވެ.
ތަކުބީރު އިއްވާ ގަޑިތައް؛
- 27 ޖޫން (ހައްޖު ދުވަސް) :ހަވީރު 4:15 އިން އިރުއޮއްސި 6:00 އަށް އަދި ރޭގަނޑު 8:15 އިން ރޭގަނޑު 10:00 އަށް
- 28 ޖޫން (އީދު ދުވަސް): ހެނދުނު 6:00 އިން 7:25 އަށް، ހެނދުނު 8:15 އިން 11:30 އަށް، މެންދުރުފަހު 2:15 އިން އިރުއޮއްސި 6:00 އަށް، ރޭގަނޑު 8:15 އިން 10:00 އަށް
- 29 ޖޫން (އީދު ދެވަނަ ދުވަސް): މެންދުރުފަހު 1:00 އިން ހަވީރު 3:00 އަށް، އަދި ރޭގަނޑު 8:15 އިން ރޭގަނޑު 10:00 އަށް
ސިޓީ ކައުންސިލުން މާލޭގައި ޖަހަން ފަށާފައިވާ ސްމާޓް ސްޓްރީޓް ލައިޓްތަކުގައި ސްޕީކާ ސިސްޓަމުގެ އިތުރުން ފްރީ ވައިފައިއާއި ޑިޖިޓަލް ލެޑް ސްކްރީނާއި، ސީސީޓީވީ ކެމެރާގެ އިތުރުން މޫސުމަށް އަންނަ ބަދަލުތައް ދެނެގަތުމަށް ފަސޭހަ ވާނެހެން އެންވަޔަރަންމަންޓް ސެންސަރު ހަރު ކޮށްފައިވެ އެވެ.
މި އަހަރުގެ އަޟްޙާ ޢީދަށް މަރުހަބާ ކިޔުމުގެ ގޮތުން މާލޭގެ ބޮޑުތަކުރުފާނު މަގާއި، މަޖީދީ މަގު އަދި ސޯސަން މަގުގެ އިތުރުން ވިލިމާލޭގެ މަގުތަކެއް ހިމެނޭހެން ބައެއް ބޮޑެތި މަގުތައް ޒީނަތްތެރި ކުރުމަށް، ޖުމްލަ 22 ގިޑިގެ އާއެކު 2224 ބޮކި ހަރުކޮށް ދިއްލާލައިފަ އެވެ.
