ސާފް ބަންގުބަންދު ޗެމްޕިއަންޝިޕްގައި މިއަދު ކުޅުނު މެޗުން ނޭޕާލް އަތުން 1-0 އިން ބަލިވެ، މުބާރާތުގައި ގޯލެއް ވެސް ނުޖެހި ކަޓައިގެން އެނބުރި ދާން ޖެހުނު ކަމުގައި ވިޔަސް، މި ލިބުނު ތަޖުރިބާއިން މުސްތަގުބަލަށް ފިލާވަޅުތަކެއް ނަގައި، ކަންކަން ރަނގަޅުކުރެވޭނެ ކަމަށް ޕާކިސްތާން ކޯޗު ޝަހުޒާދު އަންވަރު ބުނެފި އެވެ.
އެއް މުބާރާތުގެ މެދުކެނޑުމަކަށް ފަހު ޕާކިސްތާނުން މި ފަހަރުގެ ސާފް ޗެމްޕިއަންޝިޕްގައި ކުޅުނުއިރު، އެ ޓީމު ކެޓީ ތިން މެޗުން ވެސް ބަލިވެ، ޕޮއިންޓެއް ވެސް ނުލިބި އެވެ. ފުރަތަަމަ މެޗުން އިންޑިއާ އަތުން 4-0 އިން ބަލިވިއިރު، ދެ ވަނަ މެޗުގައި ކުވެއިތު އަތުން ވެސް ބަލިވީ ހަމަ އެ ނަތީޖާ އިންނެވެ.
ސާފް ޗެމްޕިއަންޝިޕަށް ތައްޔާރުވާން މޮރިޝަސްގައި ކުޅުނު ފޯ ނޭޝަންސް ކަޕްގެ މެޗުތަކާއި ސާފް ޗެމްޕިއަންޝިޕްގައި ޕާކިސްތާން ކުޅުނު މެޗުތަކަށް ބަލާއިރު، ޖުމްލަ އެކު ހަ މެޗުގައި ވެސް ޖެހުނީ އެންމެ ލަނޑެކެވެ. ދެ މުބާރާތުގައި އެއްކޮށް ޕާކިސްތާން ކޮޅަށް ވަނީ 16 ގޯލު ވަދެފަ އެވެ.
މެޗަށް ފަހު އޮތް ނޫސްވެރިންގެ ބައްދަލުވުންތަކުގައި ޕާކިސްތާނުން މީގެ ކުރިން ބައިވެރިވީ އެ ޓީމުގެ އެސިސްޓަންޓް ކޯޗު ޖަރުމަނުގެ ޓޯބެން ވިޓަޖެވްސްކީ އެވެ. އެކަމަކު، މިއަދުގެ މެޗަށް ފަހު ހެޑް ކޯޗު، ޝަހުޒާދު ބައިވެރިވެ، އެ ޓީމުގެ ހާލަތާ ބެހޭގޮތުން ވަނީ ވާހަކަ ދައްކައިފަ އެވެ.
ޝަހުޒާދު ބުނީ ޕާކިސްތާން ފުޓްބޯޅަ މިހާރު އޮތީ "ރީބިލްޑިން ފޭސް" އެއްގައި ކަމަށާއި މި ވަގުތު ނަތީޖާތަކަށް ވުރެ އެ ޓީމަށް މުހިންމުވާނެ އަނެއް ކަމަކީ ޓީމެއްގެ ގޮތުގައި ކުރިއަރަން ބޭނުންވާނެ ތަޖުރިބާ ހާސިލްކުރުން ކަމަށެވެ.
"ތަޖުރިބާހުރި ކުޅުންތެރިން ވެސް އެބަތިބި. އާ ކުޅުންތެރިން ވެސް އެބަތިބި މީގެ، ދެން މިއީ ޖުމްލަކޮށް ބަލާއިރު ޓީމެއްގެ ގޮތުގައި އާ ޓީމެއް. އެހެންވީމަ ޓީމެއްގެ ގޮތުގައި ކުރިއަަރަން ތަޖުރިބާ ބޭނުންވާނެ، މި މުބާރާތުގެ ކުރިން ފޯ ނޭޝަންސް ކަޕެއް ވެސް ކުޅެފިން، މިހާރު މި ކުޅުނީ ސާފް އެހެންވީމަ މި ދެ މުބާރާތުން ވެސް މި ލިބުނީ މި ޓީމުގެ ރަނގަޅުކުރަން ހުރި ކަންކަން ދެނެގަންނަން ފުރުސަތެއް،" ޝަހުޒާދު ބުންޏެވެ.
"އަހަރެމެން މި އޮތް ގްރޫޕް ވެސް ވަރުގަދަ، އިންޑިއާ އާއި ކުވެެއިތު ފުރަތަމަ މި އޮތީ، ފަސޭހަ ދެ ޓީމެއް ނޫން. ދެން މިއަދު ނޭޕާލާ ދެކޮޅަށް ރަނގަޅަށް ކުޅެވުނަސް ނަތީޖާ ނުނެރެވި މިދިޔައީ،"
މި ފަހަރުގެ ސާފް ޗެމްޕިއަންޝިޕަށް ޕާކިސްތާން ޓީމު އިންޑިއާ އަށް އައުމުގައި ގިނަ ގޮންޖެހުންތަކާ ކުރިމަތިލާން ޖެހުނެވެ. އެ ގޮތުން ވިސާ ހޯދުމާއި ދަތުރުފަތުރުގެ ދަތިތަކުން އަރައިގަނެ، ޕާކިސްތާން ޓީމު އިންޑިއާ މެޗަށް ހަމަވިއިރު، މެޗު ފަށަން އޮތީ ހަ ގަޑިއިރަށް ވުރެ ކުޑަވެފަ އެވެ. ޕާކިސްތާނުން އެ މެޗު ފަސްކުރަން އެދުނު ނަމަވެސް އެކަން އެ ގޮތަށް ކޮށްނުދިނެވެ.
އިންޑިއާގައި އައިސް މި މުބާރާތް ކުޅެންޖެހުނު ހާލަތާ ގުޅޭގޮތުން ސުވާލުކުރުމުން، ޝަހުޒާދު ބުނީ އިންޑިއާގެ ފުޓްބޯޅަ ފެޑެރޭޝަނުން ހަމަޖައްސާފައިވާ އިންތިޒާމުތައް ރަނގަޅުކަމަށާއި ކަންކަން ހަމަޖައްސައިދިނީތީވެ، އެކަމަށް ޝުކުރު އަދާކުރާ ކަމަށެވެ.
