އެމްޑީޕީއާއި އެޕާޓީގެ މެމްބަރުން އަބަދުވެސް ދާނީ ކުރިއަށް ކަަމަށް އެޕާޓީގެ އިސްލީޑަރު އަދި ރާއްޖޭގެ ރައީސް އިބްރާހީމް މުހައްމަދު ސޯލިހު މިއަދު ވިދާޅުވެއްޖެ އެވެ.
އެމްޑީޕީއަށް 18 އަހަރު ފުރިން ފާހަގަކުރެއްވުމުގެ ގޮތުން ކުރެއްވި ޓްވީޓެއްގައި އެމަނިކުފާނު މިހެން ވިދާޅުވި އިރު އެ ޕާޓީއަށް މިއަހަރު ގިނަ ގޮންޖެހުންތަކެއް ކުރިމަތިވި އެވެ. އެފަދަ އެއް ގޮންޖެހުމަކީ އެޕާޓީގައި ކުރިން އިސްކޮށް އުޅުއްވި އެތައް ބޭފުޅުންނެއް ޕާޓީ ދޫކުރައްވައި ނުކުމެވަޑައިގެންނެވުމުވެ.
އެމްޑީޕީއަށް 18 އަހަރު ފުރުން ފާހަގަކުރައްވަން ރޭ ދެއްވި ހިތާބެއްގައި އެޕާޓީގެ ޗެއާޕާސަން ފައްޔާޒު އިސްމާއީލް ސިފަކުރެއްވި ގޮތުގައި އެއީ އެތެރޭގެ ގޮންޖެހުންތަކަކީ އެ ޕާޓީއަށް މިހާތަނަށް ކުރިމަތިވި އެންމެ ބޮޑު ގޮންޖެހުން ކަމަށެވެ.
"އެތެރޭގެ ގޮންޖެހުންތަކުން ކުރިމަތިވިި ތަކުލީފުތަކަކީ ސިޔާސީ ޕާޓީއަކުން ތަހައްމަލުކުރާނެ އެންމެ އުނދަގޫ މަރުހަލާ. ކެތްތެރިކަމާއެކު ޕާޓީގެ މަސްލަހަތު ހިފެހެއްޓި، އެމްޑީޕީގެ އަސާސްކަމުގައިވާ ޑިމޮކްރަސީގެ ހަމަތަކަށް އެންމެ ކުރިއަށް ނެރެ، ހިތި ހަގީގަތްތަކާއެކު ހިތުގެ އެއް ފަޅީގައި އެ ހިތާމަ ބަނދެގެން އެމްޑީޕީ ބަރުދާސްތު ކުރި ކުރުން،" އެމްޑީޕީގެ ފޭސްބުކް ޕޭޖުން ބްރޯޑްކާސްޓު ކުރި ވީޑިއޯ މެސެޖެއްގައި ފައްޔާޒް ވިދާޅުވި އެވެ.
އެހެން ނަމަވެސް ރައީސް ސޯލިހު މިއަދު ކުރެއްވި ޓްވީޓްގައި އެކަމާ ބެހޭ ގޮތުން އެއްޗެއް ވިދާޅެއް ނުވެ އެވެ. އެމަނިކުފާނު ކުރެއްވި ޓްވީޓްގައި ޕާޓީގެ މެމްބަރުންނަށް ތަހުނިޔާ ފޮނުއްވުމަށް ފަހު ވިދާޅުވީ ޕާޓީ ދާނީ ކުރިއަށް ކަމަށެވެ.
އެމްޑީޕީގެ 18 ވަނަ އަހަރީ ދުވަހުގެ ހެޔޮއެދުމާއި ތަހުނިޔާ ޕާޓީގެ ހުރިހާ މެންބަރުންނަށް އަރިސްކުރަން. މާތް للهގެ ހެޔޮ ރަޙްމަތްފުޅާއެކު މި ޕާޓީ އާއި ޕާޓީގެ މެންބަރުން އަބަދުވެސް ދާނީ ކުރިއަށް،" ރައީސް ވިދާޅުވި އެވެ.
އެމްޑީޕީއަށް މިއަދު 18 އަހަރު ވީއިރު އެޕާޓީން ވަނީ ރިޔާސީ އިންތިހާބު ދެފަހަރު ކާމިޔާބުކޮށްފަ އެވެ. އެންމެ ފަހުން ބޭއްވި ރައްޔިތުންގެ މަޖިލީހުގެ އިންތިހާބު ބޮޑު ތަފާތަކުން ކާމިޔާބުކުރުމުގެ އިތުރުން އޭގެ ފަހުން ބޭއްވި ބައިއިލެކްޝަންތައް ވެސް އެޕާޓީން ކާމިޔާބުކުރި އެވެ.
