ކޮންމެ ބޭފުޅަކު ކިތަންމެ ކޯފާވިޔަސް ވެރިކަން ކުރައްވަމުން ގެންދަވާނީ ގާނޫނީ އިމުގެ ތެރެއިން ކަމުގައި ވިދާޅުވެ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު, ޖުމްހޫރީ ޕާޓީގެ ލީޑަރު ގާސިމް އިބްރާހިމްއަށް އިއްޔެ ވަރުގަދަ ރައްދެއް ދެއްވި އެވެ.

ރައީސް ސޯލިހު ގާސިމަށް ރައްދު ދެއްވީ, އިއްޔެ ބޭއްވި ޖޭޕީގެ ކައުންސިލް ބައްދަލުވުމެއްގައި ގާސިމު އެމަނިކުފާނަށާއި ސަރުކާރަށް ވަރަށް ބޮޑަށް ފާޑު ވިދާޅުވެފައި ވަނިކޮށެވެ. ވެރިކަން ކުރާ ކޯލިޝަނުގައި ޖޭޕީ އޮތް ނަމަވެސް, އަންނަ ރިޔާސީ އިންތިހާބަށް ވަކިން ވާދަ ކުރެއްވުމަށް ގާސިމް ވަނީ ނިންމަވާފަ އެވެ.

އިއްޔެގެ ކައުންސިލް ބައްދަލުވުމުގައި ގާސިމް ރައީސަށް ފާޑު ވިދާޅުވި އެއް ސަބަބަކީ ވިލާ ގްރޫޕަށް ދީފައި އޮތް ކ. ވާވެއްދި ފަޅު ވިއްކުން އެންޓި ކޮރަޕްޝަން ކޮމިޝަން (އޭސީސީ) އިން ހުއްޓުވާފައި އޮތުމެވެެ.

އެކަމާ ގުޅޭގޮތުން އިއްޔެ ރައީސް ސޯލިހު ވިދާޅުވީ, އެމަނިކުފާނު މިހާތަނަށް ވެރިކަމުގައި ހޭދަކުރި ހަތަރު އަހަރާއި ގަތްގަނޑަކަށް ހަ މަސް ދުވަހުގެ ތެރޭގައި މަސައްމަތް ކުރަމުން އައީ ގާނޫނުއަސާސީއާއި, ގާނޫނީ އިމުގެ ތެރެއިން ކަމަށާއި ކުރިއަށް އޮތްތަނުގައި ވެސް މަސައްކަތް ކުރައްވާނީ އެގޮތަށް ކަމަށެވެ.

"ކިތަންމެ ގާތް މީހެއް ކަމުގައިވިޔަސް, އަދި ޕާޓީގެ މީހެއް ކަމަށްވިޔަސް, އާއިލާގެ މީހެއް ކަމަށްވިޔަސް އަޅުގަނޑަކަށެއް ގާނޫނުއަސާސީން ބޭރަކަށް ނުދެވޭނެ. ކޮންމެ ބޭފުޅަކު ކިތަންމެ ކޯފާވެގެން ވާހަކަ ދެއްކެވިޔަސް އެއީ އެ ބޭފުޅެއްގެ ކަމެއް،" ގާސިމަށް ރައްދު ދެއްވަމުން ރައީސް ވިދާޅުވި އެވެ.

ވާވެއްދި ފަޅު ވިއްކުން ހުއްޓުވާފައި ވަނީ ސީދާ ސަރުކާރުގެ ނުފޫޒުގެ ތެރެއިން ކަމަށް ގާސިމް ތުހުމަތު ކުރެއްވި އެވެ. އެގޮތުން, އެ މައްސަލައިގައި ރައީސް އޮފީހުގެ ޗީފް އޮފް ސްޓާފް އަލީ ޒާހިރު މިނިވަން މުއައްސަސާތަކަށް ނުފޫޒު ފޯރުވާ ކަމަށް ވެސް ގާސިމް ތުހުމަތު ކުރެއްވި އެވެ.

"ޗީފް އޮފް ސްޓާފް ކަމަށްވިޔަސް އެހެން ސްޓާފެއް ވިޔަސް މައްސަލައެއް ނެތޭ. ކުރަން ޖެހޭ ކަންކަމާއި ކުރަން ނުޖެހޭ ކަންކަން އެބަ ހުރި. ދުވާލަކު އެއް ފަހަރު ގުޅައޭ އެކަން ނުކުރާށޭ ކިޔާފަ މުއައްސަސާތަކުގެ ވެރިންނަށް," އަލީ ޒާހިރަށް ތުހުމަތު ކުރައްވައި އޭނާ ވިދާޅުވި އެވެ.

ކާށިދޫ ދާއިރާގެ މެމްބަރު އަބްދުﷲ ޖާބިރު އެމްޑީޕީއަށް ސޮއި ކުރި ހަފުލާއަށް ވަޑައިގެން ނޫސްވެރިންގެ ސުވާލުތަކަށް ޖަވާބު ދެއްވަމުން ރައީސް ސޯލިހު ވިދާޅުވީ، މިނިވަން މުއައްސަސާތަކުން ކުރާކަންތައްތައް އެގޮތުގައި ކުރިއަށް ދާނެ ކަމަށާއި އެ ކަންކަމަށް ނުފޫޒު ފޯރުވުމަކީ މީގެ ކުރިން ވެސް އެމަނިކުފާނު ކުރެއްވި ކަމެއް ނޫން ކަމަށެވެ.

ވިލާ ކުންފުންޏަށް ދިން ފަޅުގެ އިތުރުން ވެސް ގާސިމް ވަނީ އިއްޔެ ސަރުކާރަށް ވަރަށް ބޮޑަށް ފާޑު ވިދާޅުވެފަ އެވެ. އެގޮތުން, ރައީސް ސޯލިހު ގެންދަވަނީ "މަތިމައްޗަށް ގޯސް ހައްދަވަމުން" ކަމަށާއި އެމަނިކުފާނު "މިހާރު ގެއަށް ކަނޑާލަން" ޖެހޭ ކަމަށް ވެސް ގާސިމް ވިދާޅުވި އެވެ.

"ޅަ އިހަލުން ހަރު އެއްޗެހި އަޅަމުން އަޅަމުން ގޮސް މިހާރު ނެތް ގޮބޮޅިއެއްވެސް އަޅާކަށް. ދެން މަނިކުފާނު އެހެންވީމާ އިތުރަށް ކުރިމަތިލައްވައިގެން ތިމަންނާ ވެރިކަމަށް ވަޑައިގަންނަވަންށޭ ކިޔާފައި އުޅުއްވުމުގެ މާނައެއް ނެތް. ރައްޔިތުންނަށް މިއަދު ސާފުވޭ," ރައީސް ސޯލިހަށް ބަހުގެ ހޫނު ހަމަލާތަކެއް އަމާޒު ކުރައްވަމުން ގާސިމް ވިދާޅުވި އެވެ.

ރައީސް ސޯލިހަށް ގާސިމް ވަރަށް ބޮޑަށް ފާޑުވިދާޅުވި އިރު މިހާރު ހިނގަމުންދާ ސަރުކާރުގައި ޖޭޕީގެ ހިއްސާ އެބައޮތެވެ. އެ ޕާޓީގެ ސްލޮޓުތަކުގައި މިނިސްޓަރުން ވެސް އެބަ ތިއްބެވި އެވެ. އެގޮތުން, ޓްރާންސްޕޯޓު މިނިސްޓަރު އައިޝަތު ނަހުލާ އާއި ފިޝަރީޒް މިނިސްޓަރު ޑރ. ހުސައިން ރަޝީދު ހަސަނަކީ ވެސް ޖޭޕީގެ ކައުންސިލުގައި ހިމެނިވަޑައިގަންނަވާ ބޭފުޅުންނެވެ.

އެމްޑީޕީއާ އެކު ކޯލިޝަން ހަދައިގެން 2023 ގައި ވާދަކުރުމުގެ ދައުވަތު ވެސް ރައީސް ސޯލިހު ގާސިމަށް ދެއްވި އެވެ. އެކަމަކު ޖޭޕީގެ ކޮންގްރެސްއިން ނިންމީ އިންތިހާބުގައި ވަކިން ވާދަކުރާށެވެ. ޖޭޕީގެ ރިޔާސީ ޓިކެޓާއި ހަވާލުވެވަޑައިގެން ގާސިމް ވެސް ވަނީ ކެމްޕޭން ފައްޓަވާފަ އެވެ.

މުހިންމު ބައެއް ހަބަރު

ދުވަހުގެ ކޯޓޭޝަން

ޖުމްހޫރީ ޕާޓީގެ ލީޑަރު ގާސިމް އިބްރާހިމް، ރައީސް އިބްރާހިމް މުހައްމަދު ސޯލިހަށް ފާޑުވިދާޅުވެ ދެއްކެވި ވާހަކަތަކަށް ރައްދު ދެއްވައި އެ މަނިކުފާނު ވިދާޅުވީ؛

ކިތަންމެ ގާތް މީހެއް ކަމުގައިވިޔަސް, އަދި ޕާޓީގެ މީހެއް ކަމަށްވިޔަސް, އާއިލާގެ މީހެއް ކަމަށްވިޔަސް އަޅުގަނޑަކަށެއް ގާނޫނުއަސާސީން ބޭރަކަށް ނުދެވޭނެ. ކޮންމެ ބޭފުޅަކު ކިތަންމެ ކޯފާވެގެން ވާހަކަ ދެއްކެވިޔަސް އެއީ އެ ބޭފުޅެއްގެ ކަމެއް،"

ދުވަހުގެ ފޮޓޯ

ސަރަހައްދީ ފުޓްބޯޅަ މުބާރާތް، ސާފް ޗެމްޕިއަންޝިޕްގައި އިއްޔެ ރާއްޖެ އާއި ބަންގްލަދޭޝް ބައްދަލުކުރި މެޗްގެ ތެރެއިން.. ފަހަތުން އަރައި ބަންގްލަދޭޝް މެޗް ކާމިޔާބުކުރީ 3-1 އިން. -- ފޮޓޯ: މުހައްމަދު ޝާބިން./އަދަދު