ރައްޔިތުންގެ މަޖިލީހުގެ މަސައްކަތްތައް ހުއްޓި މަޖިލީހުގައި މަރުތަޅު އެޅުވުމުގެ ޒިންމާ ރައީސް އިބްރާހިމް މުހައްމަދު ސޯލިހު ނަންގަވަން ޖެހޭނެ ކަމަށާއި އެމަނިކުފާނަށް ރައްޔިތުންގެ އިތުބާރު ނެތް ކަމަށް ވިދާޅުވެ ޖުމްހޫރީ ޕާޓީގެ ލީޑަރު ގާސިމް އިބްރާހިމް ބަހުގެ ހޫނު ހަމަލާތަކެއް އަމާޒު ކުރައްވައިފި އެވެ.
މަޖިލީހުގެ ދެވަނަ ދައުރު ނިމެން އުޅެނިކޮށް ވެއްދި އިތުބާރުގެ މައްސަލަތަކާ އެކު މުޅި މަޖިލިސް އޮތީ ހުއްޓިފަ އެވެ. އެއީ, ރިޔާސަތު ބަލަހައްޓަން މަޖިލިސް ރައީސް މުހައްމަދު ނަޝީދު އުޒުރުވެރިވެވަޑައިގަންނަވާތީ އެވެ. ދެވަނަ ދައުރު ނިންމައި މަޖިލިސް ޗުއްޓީއަށް ދިޔައިރު މުހިންމު ގިނަ މަސައްކަތްތަކެއް އޮތީ ކުރިއަށް ނުގޮހެވެ.
މިއަދު ބޭއްވި ޖޭޕީގެ 158 ވަނަ ކައުންސިލު ބައްދަލުވުމުގައި ގާސިމް ވަނީ މަޖިލީހުގެ މަސައްކަތްތައް ހުއްޓުވާފައި ވަނީ ސީދާ ވެރިކަން ހިންގާ މައި ޕާޓީ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ކަމަށް ވިދާޅުވެފަ އެވެ.
"ބަލަ ސަރުކާރު ހިންގަން އޮތް ޕާޓީން މިކަންކަން ކުރީމާ ދެން ކީކޭތޯ ބުނާނީ. އެމީހުންނަށް ނޭނގޭތަ ރައީސް އާއި ނައިބު ރައީސްގެ ނޯ ކޮންފިޑެންސް ވޯޓު ލީމާ ރައްޔިތުންގެ މަޖިލިސް ޑެޑްލޮކަށް ދާނެކަން. ގާނޫނު އަސާސީ ނުބަލައިތަ [މައްސަލަ] ލީ. ގާނޫނު އަސާސީއާ އެއްގޮތަށް ގަވާއިދުތައް ނުބެލިތޯ ހުރީ. ބަލަ އެހެން އޮތަސް ދައުލަތުގެ ތިން ބާރުން ކުރެ އެއްބާރު ޑެޑްލޮކަށް ނުގެންދެވޭނެ," އަޑަށް ބާރު ލައްވައި ގާސިމް މިއަދު ވިދާޅުވި އެވެ.
ރައްޔިތުންގެ މަޖިލީހުގެ ގަވާއިދުގެ މާއްދާއަކުން ލޫޕްހޯލެއް ދެއްކުމަށް ފަހު ބޭނުން އެއްޗެއް ނެހެދޭނެ ކަމަށާއި އެއަށްވުރެ ގާނޫނު އަސާސީ ވަރުގަދަވާނެ ކަމަށް ގާސިމް ވިދާޅުވި އެވެ. ބާރުގައި ހުންނަވަން އެފަދަ ކަންކަން ކުރުމުގެ ނަތީޖާ ރަނގަޅު ނުވާނެ ކަމަށާއި ރައީސް ގެންދަވަނީ މަތި މައްޗަށް ގޯސް ހައްދަވަމުން ކަމަށް ގާސިމްް ވިދާޅުވި އެވެ.
"ރައްޔިތުންގެ ފަރާތުން މަންދޫބުން ތިބޭ ތަން މިއަދު އެ ހުރީ ތަޅުލެވިފައި. ގާނޫނީ ހުސްކަމެއްގެ ތެރެއަށް ކޮންތަނެއްތޯ ނުވަދެ އޮތީ. ވިސްނާވަޑައިން ބައްލަވާ. ކޮބާތޯ ދައުލަތުގެ ވެރިޔާ ކުރެއްވި ކަން. ކޮބައިތޯ ސަރުކާރުގެ ވެރިޔާ ކުރެއްވި ކަންތައްތައް. ބަލާބަލަ," މަޖިލިސް ހުއްޓިފައިވާ މައްސަލާގައި މާމިގިލީ ދާއިރާގެ މެމްބަރުކަން ވެސް ކުރައްވާ ގާސިމް ވިދާޅުވި އެވެ.
ރައްޔިތުންގެ މަޖިލީހުގައި މިވަގުތު ތިއްބަވަނީ ޖޭޕީގެ ދެ މެމްބަރުންނެވެ. އެއީ ގާސިމްގެ އިތުރުން ކެންދޫ ދާއިރާގެ މެމްބަރު އަލީ ހުސައިން އެވެ. އާންމު ގޮތެއްގައި ގާސިމް ޖަލްސާތަކަށް ހާޒިރުވަނީ ވަރަށް މަދުންނެވެ.
ސަރުކާރާއި އެމްޑީޕީއަށް ގާސިމް ވަރަށް ބޮޑަށް ފާޑު ވިދާޅުވިއިރު މި ސަރުކާރުގެ ކޯލިޝަން ޕާޓްނަރެއްގެ ގޮތުގައި އެ ޕާޓީ އަދިވެސް ދެމިއެބައޮތެވެ. ގާސިމްގެ އަނބިކަނބަލުން އައިޝަތު ނަހުލާ ހިމެނޭހެން އެ ޕާޓީގެ ތިން ވަޒީރަކު ވެސް ރައީސް ސޯލިހުގެ ކެބިނެޓުގައި އެބަތިއްބެވި އެވެ.
އަދި, އެމްޑީޕީއާ އެކު ކޯލިޝަން ހަދައިގެން 2023 ގައި ވާދަކުރުމުގެ ދައުވަތު ވެސް ރައީސް ސޯލިހު ގާސިމަށް ދެއްވި އެވެ. އެކަމަކު ޖޭޕީގެ ކޮންގްރެސްއިން ނިންމީ އިންތިހާބުގައި ވަކިން ވާދަކުރާށެވެ. ޖޭޕީގެ ރިޔާސީ ޓިކެޓާއި ހަވާލުވެވަޑައިގެން ގާސިމް ވެސް ވަނީ ކެމްޕޭން ފައްޓަވާފަ އެވެ.
