މިއަހަރުގެ މިހާތަނަށް އަލިފާނުގެ ހާދިސާތަކުގައި ހާލުގައި ޖެހުނު މީހުންނަށް އެހީގެ ގޮތުގައި އެއް މިލިއަނަށްވުރެ ގިނަ ފައިސާ ހޭދަވެފައިވާ ކަމަށް ނެޝަނަލް ޑިޒާސްޓާ މެނޭޖްމެންޓު އޮތޯރިޓީ (އެންޑީއެމްއޭ) އިން ބުނެފި އެވެ.
އަހަރުގެ މިހާތަނަށް ހިނގި އަލިފާނުގެ ހާދިސާތަކުގެ އަދާހަމަ އެންޑީއެމްއޭއިން އާންމުކުރީ މިއަދެވެ. އެ އޮތޯރިޓީއިން ބުނީ މިހާތަނަށް އަތޮޅު ތެރޭގެ އަށް ރަށެއްގެ އަށް ގެއެއްގައި އަލިފާނުގެ ބޮޑެތި ހާދިސާތަކެއް ހިނގާފައިވާ ކަމަށެވެ. އަދި އެ ގެތަކުގައި ދިރިއުޅޭ މީހުންނަށް ލިބުނު ގެއްލުމުން އަރައިގަތުމަށް ޖުމްލަ 1،125940ރ. އެހީގެ ގޮތުގައި ހޭދަކޮށްފައިވާ ކަމަށް އެ އޮތޯރިޓީން ބުނެ އެވެ.
އަލިފާނުގެ ހާދިސާ ހިނގި ރަށްތަކާއި ފޯރުކޮށްދިން އެހީތެރިކަން
- ރ. އުނގޫފާރު -- 86630ރ.
- ސ. ފޭދޫ -- 179400ރ.
- ހދ. މަކުނުދޫ -- 160441ރ.
- ހދ. ނެއްލައިދޫ -- 35655ރ.
- ސ. ހިތަދޫ -- 191640ރ.
- ހއ. ފިއްލަދޫ -- 227872ރ.
- ގދ. ގައްދޫ -- 81281ރ.
- އއ. ތޮއްޑޫ -- 163020ރ.
ފާއިތުވި ފަސް އަހަރުގެ ތެރޭގައި އަލިފާނުގެ ހާދިސާތަކުގައި ގެދޮރަށް ގެއްލުންވެގެން ރިޕޯޓުކުރި އަދަދު އިތުރު ކަމަށް އެ އޮތޯރިޓީ އިން ބުނެ އެވެ.
މިހާތަނަށް އެންމެ ގިނަ އަލިފާނުގެ ހާދިސާ ރިޕޯޓުކޮށްފައި ވަނީ 2022 ގަ އެވެ. އެ އަހަރު ޖުމްލަ 65 ހާދިސާއެއް ހިނގި އެވެ. އޭގެ އިތުރުން 2019 ގައި 14 ހާދިސާއެއް، 2020 ގައި އަށް ހާދިސާއެއް އަދި 2021 ގައި 16 ހާދިސާއެއް ހިނގާފައި ވެއެވެ.
މިއަހަރުގެ ޖޫން މަހާއި ހަމައަށް އެކަނިވެސް 31 ހާދިސާއެއް ރިޕޯޓުކޮށްފައިވާ ކަމަށް އެންޑީއެމްއޭއިން އާންމުކުރި ތަފާސްހިސާބުން ދައްކަ އެވެ.
މިދިޔަ ފަސް އަހަރުގެ ތެރޭގައި ހިނގި އަލިފާނުގެ ހާދިސާތަކުގައި ގެއްލުން ލިބުނު މީހުންނަށް އެހީގެ ގޮތުގައި 19.23 މިލިއަން ރުފިޔާ ވަނީ ފޯރުކޮށްދީފަ އެވެ.
އަލިފާނުގެ ހާދިސާތަކުން ރައްކާތެރިވުމަށް އަޅަން ޖެހޭ ފިޔަވަޅުތައް އެޅުމާއި އަގުބޮޑެތި މުދަލާއި ގޯތި ގެދޮރު އިންޝުއަރެންސް ކުރުމަށް އެންޑީއެމްއޭއިން އިލްތިމާސްކުރެ އެވެ.
