އެމްއެމްޕީއާރްސީގެ ކޮރަޕްޝަންގެ މައްސަލައިގައި މޯލްޑިވްސް ނޭޝަނަލް ޕާޓީގެ ރިޔާސީ ކެންޑިޑޭޓު މުހައްމަދު ނާޒިމްއާ އިއްޔެ އެންޓި ކޮރަޕްޝަން ކޮމިޝަން (އޭސީސީ)އިން ސުވާލުކުރުމުން، އެއީ ސިޔާސީ ބައެއްގެ ބާރުން ރިޔާސީ އިންތިހާބަށް ނުފޫޒު ފޯރުވުމަށް ކުރި ކަމެއް ކަމަށް ނާޒިމް ތުހުމަތުކުރައްވައިފި އެވެ.
އެމްއެމްޕީއާރްސީ ކޮރަޕްޝަން ހިންގި އިރު ޑިފެންސް މިނިސްޓަރަކަށް ހުންނެވި ނާޒިމް އިއްޔެ އޭސީސީއަށް ހާޒިރުރުމާ ގުޅޭގޮތުން އޭނާ ނެރުއްވި ބަޔާނެއްގައި ވިދާޅުވީ، އެ ކޮރަޕްޝަންގެ މައްސަލައިގައި އޭނާއާ ސުވާލުކުރަން މިދިޔަ އަންގާރަ ދުވަހާއި ބުދަ ދުވަހު އޭނާ އޭސީސީއަށް ހާޒިރުކޮށްފައިވާ ކަމަށެވެ.
އެ ބަޔާނުގައި ނާޒިމް ވިދާޅުވީ، ރިޔާސީ އިންތިހާބަށް ކުޑަތަންވެފައި ވަނިކޮށް، މީގެ ނުވަ އަހަރު ކުރިން ހިންގި ކަމަށް ބުނާ ކޮރަޕްޝަންގެ މައްސަލައެއްގައި އޭނާ އޭސީސީއަށް ހާޒިރުވާން އެންގީ، ސިޔާސީ ގޮތުން އޭނާ ކުރަމުން އަންނަ މަސައްކަތް ރައްޔިތުން ބަލައިގަންނަމުންދާތީ، އޭނާގެ އަގުވައްޓާލައި އޭނާއަށް ކުރަމުންދާ ތާއީދު ކަނޑުވާލުމުގެ ނިޔަތުގައި ސިޔާސީ ބައެއްގެ ނުފޫޒުން ކަމަށެވެ.
"މިއީ ސިދާ ގޮތުން މިއަހަރުގެ ރިޔާސީ އިންތިހާބަށް ނުފޫޒު ފޯރުވުވުމަށް ސަރުކާރު ފަހަތުގައި އޮވެގެން ކުރައްވާ ކަމެއް ކަމުގައި ވެސް އަޅުގަނޑު ދެކެމެވެ." ނާޒިމްގެ ބަޔާނުގައިވެ އެވެ.
ތަހުގީގަށް އެއްބާރުލުން ދެއްވާނެ ކަމަށް ވިދާޅުވި ނަމަވެސް، ނާޒިމް ވިދާޅުވީ، މިނިވަން މުއައްސަސާތައް ބޭނުންކޮށްގެން ސަރުކާރު އަޑީގައި އޮވެގެން ރިޔާސީ ކެންޑިޑޭޓުންނަށް ކުރާ ފިނޑި އަމަލުތައް ބަލައިނުގަންނަ ކަމަށެވެ.
ނާޒިމް ވިދާޅުވީ، އޭނާ ދައުލަތަށް ހިދުމަތްކުރި 30 އަހަރުގެ ތެރޭގައި އޭނާ ދުވަހަކު ވެސް ފައިސާގެ ނުވަތަ ހިޔާނާތުގެ މައްސަލައެއްގައި ޖެހިފައިނުވާއިރު، މިނިވަން މުއައްސަސާއެއް މެދުވެރިކޮށް ސަރުކާރުން ހިންގާ އެފަދަ އަމަލުތަކަކީ ރައްޔިތުން ގަބޫލުކުރާނެ ކަންތައްތަކެއް ނޫން ކަމަށެވެ. އަދި ދައުލަތް ހިންގަމުންދާ ގޮތުން، މިނިވަން މުއައްސަސާއަކަށް މިނިވަންކަމާއެކު މަސައްކަތް ކުރުމުގެ ފުރުސަތު ގެއްލި، އެފަދަ މުއައްސަސާތަކަށް ނުފޫޒު ފޯރުވުމަކީ ވަރަށް ކަންބޮޑުވާ ކަމެއް ކަމަށް ވިދާޅުވި އެވެ.
ރިޔާސީ އިންތިހާބަށް ނުފޫޒު ފޯރުވުން ހުއްޓާލައި، މިނިވަން އިންތިހާބަކަށް ފުރުސަތު ދެއްވުމަށް ވެސް ނާޒިމް ގޮވާލެއްވި އެވެ. އަދި އޭސީސީ ފަދަ މިނިވަން މުއައްސަސާތަކުން ސިޔާސީ ނުފޫޒުގައި ނުޖެހި، މިނިވަންކަމާއެކު މަސައްކަތް ކުރުމަށް ގޮވާލެއްވި އެވެ.
ރިޔާސީ އިންތިހާބަށް އެމްއެންޕީއިން ކުރާ "އުޖާލާ ޒަމާން" ކެމްޕެއިން އިފްތިތާހުކޮށް، ނާޒިމަށް ރިޔާސީ ޓިކެޓް ދިނީ މެއި 27 ވަނަ ދުވަހުގެ ރޭ ބޭއްވި ޖަލްސާއެއްގަ އެވެ.
