ރައްޔިތުންގެ މަޖިލީހުގައި ސިޔާސީ ޕާޓީތައް ތަމްސީލުކުރާ މެމްބަރުންގެ އަދަދަށް އައި ބަދަލާއި ގުޅިގެން ހުއްޓިފައި އޮތް ކޮމިޓީތަކުގެ މަސައްކަތް އަލުން ފެށުމަށް ގަސްތުކޮށް ކޮމިޓީތަކުގައި މެމްބަރުން ނިސްބަތްވާނެ މިންވަރު ކަނޑައެޅުމަށް ބަހުސް ކުރުމަށް މާދަމާ ރައްޔިތުންގެ މަޖިލީހުގެ ޖަލްސާއެއް ބާއްވަން އެޖެންޑާ ކޮށްފި އެވެ.
ރައްޔިތުންގެ މަޖިލީހުގެ މިއަހަރުގެ ދެވަނަ ދައުރު ނިމެން 10 ވަރަކަށް ދުވަހަށް ވެފައި ވަނިކޮށް، މަޖިލީހުގެ މަސައްކަތް މުޅިން ހުއްޓުނީ މަޖިލީހުގެ ރައީސް މުހައްމަދު ނަޝީދާއި ނައިބުރައީސް އީވާ ވަކިކުރުމުގެ މައްސަލަ އެމްޑީޕީން ހުށަހެޅުމާ ގުޅިގެން ނަޝީދު ނިންމެވި ނިންމެވުމެއްގެ ސަބަބުންނެވެ.
އެމަނިކުފާނު ނިންމެވީ މަޖިލީހުގެ ރިޔާސަތު ބެލަހައްޓަވަން އުޒުރުވެރިވެވަޑައިގަންނަވާ ކަމަށެވެ. މަޖިލީހުގައި އެންމެ ފަހުން ބޭއްވި ތިން ޖަލްސާގެ ރިޔާސަތު ބެލެހެއްޓެވީ ނަޝީދު ކަނޑައެޅުއްވި ގޮތަށް، ވިލުފުށި ދާއިރާގެ މެމްބަރު ހަސަން އަފީފެވެ.
އެހެން ނަމަވެސް, އެގޮތަށް ރިޔާސަތު ހަވާލުކުރާ މެމްބަރަކަށް ވިދިވިދިގެން ތިން ޖަލްްސާއަށް ވުރެ އިތުރަށް ރިޔާސަތު ނުބެލެހެއްޓޭނެ ކަމަށް މަޖިލީހުގެ ގަވައިދުގައި އޮވެ އެވެ. އެކަން އެހެން އޮތް އިރު ރިޔާސަތު ބަލަހައްޓަވާނެ މެމްބަރަކާ ގުޅޭ ގޮތުން ނަަޝީދު އާ ނިންމެވުމެއް ނުނިންމަވަ އެވެ. އެހެންވެ މަޖިލީހުގައި މިދިޔަ ދެ ދުވަހު އެއްވެސް މަސައްކަތެއް ނުހިނގަ އެވެ.
އީވާގެ މައްސަލަ ކުރިއަށް ނުގޮސް އޮތީ އެމްޑީޕީން 14 މެމްބަރަކު މިހާރު ވަކިވުމުން ކޮމިޓީތަކުގެ ނިސްބަތަށް ބަދަލު އަންނާތީ އާންމު ކޮމިޓީ އަލުން އެކުލަވާނުލެވިގެންނެވެ. އެކަމާ ގުޅިގެން ސިޔާސީ ޕާޓީތަކުގެ މަޝްވަރާއިން ވެސް ހައްލެއް މިހާތަނަށް ހޯދިފައި ނުވެ އެވެ.
މާދަމާ އޮންނަ މަޖިލިސް ޖަލްސާގެ އެޖެންޑާ މިހާރު ވަނީ މަޖިލިސް ސައިޓުގައި އާންމުކޮށްފަ އެވެ. އޭގައިވާ ގޮތުން މާދަމާގެ ޖަލްސާގައި އޮންނާނީ ކޮމިޓީތަކުގައި ޕާޓީތަކާއި ވަކި ޕާޓީއަކަށް ނިސްބަތް ނުވާ މެމްބަރުން ތަމްސީލުކުރާ ނިސްބަތަށް ގެނެވޭ ބަދަލާ ގުޅޭގޮތުން ބަހުސް ކުރުމެވެ.
އަދި, ބަހުސަށް ފަހު އިސްލާހުތައް ހުށަހެޅުމަށް މުއްދަތެއް ދިނުމަށް ފަހު, ހުށަހަޅާ އިސްލާހަށް އިސްލާހު ހުށަހެޅުމުގެ ފުރުސަތު ދީ, އެ އިސްލާހުތަކަށް ވޯޓަށް އެހުމާއި, ކޮމިޓީތަކުގައި މެމްބަރުން ތަމްސީލު ކުރާނެ ނިސްބަތާ މެދު ގޮތެއް ނިންމުން އޮންނާނީ ދެން އޮންނަ ޖަލްސާއެއްގައި ކަމަށް ވެސް އެޖެންޑާގައި ބަޔާންކޮށްފައިވެ އެވެ.
ސަރުކާރުން ހިންގާ މައި ޕާޓީ, އެމްޑީޕީން ތުހުމަތު ކުރާ ގޮތުގައި މަޖިލިސް ހުއްޓުވާފައި ވަނީ ނަޝީދަށް ލިބިވަޑައިގެންފައިވާ ބާރުގެ ތެރެެއިންނެވެ. އެމަނިކުފާނު ވިދާޅުވާ ގޮތުން މަޖިލިސް ހުއްޓުވާފައި ވަނީ ސީދާ ރައީސް އިބްރާހިމް މުހައްމަދު ސޯލިހުގެ އޯޑަރަށް, އެމްޑީޕީންނެވެ.
މަޖިލީހުގައި އެޅުވިފައިވާ މަރުތަޅު ނެއްޓުމަށް ނަޝީދު ހުށަހެޅުއްވި ހައްލަކީ އިތުބާރުގެ މައްސަލަތަކުގެ ތެރެއިން އެއް މައްސަލައެއް ނެގުމެވެ. އެއަށްފަހު އަނެއް މައްސަލަ ކުރިއަށްގެންގޮސް ގޮތެއް ނިންމައިގެން މެނުވީ މަޖިލީހުގެ މަސައްކަތްތައް ކުރިއަށްނުގެންދެވޭނެ ކަމަށް އެމަނިކުފާނު ވިދާޅުވި އެވެ.
