ސެޕްޓެމްބަރުގައި އޮންނަ ރިޔާސީ އިންތިހާބުގައި ވަކިން ވާދަކުރުމަށް ޖުމްހޫރީ ޕާޓީ (ޖޭޕީ) އިން ނިންމުމުން އެ ޕާޓީން ވަކިވި އިސް ބައެއް މެމްބަރުންތަކެއް ވެރިކަން ކުރާ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އާ ގުޅިއްޖެ އެވެ.
މިއަދު އެ ބޭފުޅުން އެމްޑީޕީއަށް ސޮއިކުރެއްވީ ރައީސް އިބްރާހިމް މުހައްމަދު ސޯލިހާއި އެ ޕާޓީގެ ޗެއާޕާސަން ފައްޔާޒް އިސްމާއިލްގެ ހާޒިރުގަ އެވެ. އޭގެ ތެރޭގައި, ރައީސް އޮފީހުގެ މިނިސްޓަރު އަހްމަދު ސަމީރު އާއި, ހެރިޓޭޖުގެ ޑެޕިއުޓީ މިނިސްޓަރު ވަލީދާ ވަލީދާއި އަދިވެސް އެހެނިހެން މަގާމުތަކުގައި ތިއްބެވި ބޭފުޅުން ހިމެނެ އެވެ.
އޭގެ ތެރެއިން, ރައީސް ސޯލިހުއާ އެކު ކޯލިޝަން ހެދުމުގެ ބަދަލުގައި ޖުމްހޫރީ ޕާޓީ އިސްވެ އޮވެ އުފައްދާ ކޯލިޝަނަކުން ރިޔާސީ އިންތިހާބުގައި ވާދަކުރަން އެ ޕާޓީގެ ކައުންސިލުން ނިންމި އިރު އެކަމާ ދެކޮޅަށް ވޯޓު ދެއްވި ހަމައެކަނި މެމްބަރަކީ ވެސް ސަމީރު އެވެ.
ސަމީރު ވަނީ މީގެކުރިން ވެސް އެމްޑީޕީގެ އިސް ސަފުގައި ހަރަކާތްތެރިވެފަ އެވެ. އޭނާ ޖޭޕީން ވަކިވެވަޑައިގަތީ އެ ޕާޓީގެ ލީޑަރު ގާސިމް އިބްރާހިމަށް ވެރިކަން ލިބޭ ތަން ނުފެންނަ ކަމަށް ވިދާޅުވުމަށް ފަހު އެވެ.
މި ބޭފުޅުން އެމްޑީޕީއާ ގުޅިވަޑައިގެންނެވިއިރު މިއަދަކީ އެ ޕާޓީގެ ރައީސްގެ މަގާމުގައި ހުންނެވި މަޖިލިސް ރައީސް މުހައްމަދު ނަޝީދު އެ ޕާޓީން ވަކިވި ދުވަހެވެ. ހިޔާލު ތަފާތުވުންތައް ގިނަވެ ނަޝީދު ގެންދަވަނީ އާ ސިޔާސީ ހަރަކާތެއް ލީޑު ކުރައްވަމުންނެވެ.
ރިޔާސީ އިންތިހާބަށް ވަގުތު ކުޑަތަންވަމުން އަންނައިރު ޕާޓީތަކުން ދަނީ މެމްބާޝިޕް އިތުުރު ކުރުމަށް އަމާޒުކޮށް ހާއްސަ ހަރަކާތްތަކެއް ހިންގަމުންނެވެ. ޖޭޕީގެ މެމްބަރުންތަކެއް އެމްޑީޕީއާ ގުޅުނުއިރު ޖޭޕީން ވެސް ދަނީ އެ ޕާޓީއަށް މެމްބަރުން ވެއްދުމަށް އަމާޒުކޮށް ރާއްޖޭގެ އެކި ކަންކޮޅުތަކުން ފޯމު ފުރަމުންނެވެ.
ރިޔާސީ އިންތިހާބަށް އެމްޑީޕީ ނުކުންނަނީ ދ. މީދޫ ދާއިރާގެ މެމްބަރު އަހްމަދު ސިޔާމް މުހައްމަދުގެ މޯލްޑިވްސް ޑެވެލޮޕްމެންޓު އެލަޔަންސް (އެމްޑީއޭ) އަދި އަދާލަތު ޕާޓީ (އޭޕީ) އާއެކު ކޯލިޝަނެއްގެ ގޮތުގަ އެވެ. ޖޭޕީން އަދި އެއްވެސް ޕާޓީއަކާ އެކު ރަސްމީކޮށް ކޯލިޝަން ހަދާފައި ނުވެ އެވެ.
