ރާއްޖޭގެ ކަނޑުގެ ސަރަހައްދުން ބައެއް ވިއްކާލި ކަމަށް ބުނާ މައްސަލާގައި ޖަވާބުދާރީވުމަށް ރައީސުލްޖުމްހޫރިއްޔާ އިބްރާހިމްް މުހައްމަދު ސޯލިހް ރައްޔިތުންގެ މަޖިލީހަށް ހާޒިރުކުރުމަށް އިދިކޮޅު ކޯލިޝަނުން ހުށަހަޅައިފި އެވެ.
މިއަދު މަޖިލީހުގައި އިދިކޮޅު ޕާލަމެންްޓްރީ ގްރޫޕުން ބޭއްވި ނޫސްވެރިންގެ ބައްދަލުވުމެއްގައި މަޖިލީހުގެ މައިނޯރިޓީ ލީޑަރު އަދި އޭދަފުށި ދާއިރާގެ މެމްބަރު އަހުމަދު ސަލީމް (ރެޑްވޭވް ސަލީމް) ވިދާޅުވީ، މި މައްސަލައާ ގުޅިގެން އެޓާނީ ޖެނެރަލް އިބްރާހިމް ރިފްއަތު މަޖިލީހަށް ހާޒިރުކޮށް ކުރި ސުވާލުތަކަށް ޖަވާބުދާރީ ވެފައި ނުވާކަމަށެވެ.
އެހެން ކަމުން އެކަން އިތުރަށް ސާފުކުރުމަށް ރައީސް ސޯލިހު މަޖިލީހަށް ހާޒިރުކުރުމަށް މިއަދު ހުށަހަޅާފައިވާނެ ކަމަށް ސަލީމް ވިދާޅުވި އެވެ.
"އެ މައްސަލަ ސާފުކުރުމަށް އަޅުގަނޑުމެން މިއަދު މަޖިލީހަށް ހުށަހަޅާފައި ވާނެ ރައީސް ސޯލިހު ހާޒިރުކޮށްގެން ވިޔަސް އެކަން ސާފުކުރުމަށްް," ސަލީމް ވިދާޅުވި އެވެ.
ސަލީމް ވިދާޅުވީ ރިފްްއަތު މަޖިލީހަށް ހާޒިރުކުރުމުން ކުރި ސުވާލުތަކަށް ޖަވާބު ނުދީ ދެއްކެވީ އަމިއްލަ ވާހަކަތަކެއް ކަމަށާއި، އެގޮތަށް އަމަލުކޮށްްފައި ވަނީ ކަނޑު މައްސަލަ ސިއްރުކުރުމަށް ކަމަށް އޭނާ ވިދާޅުވި އެވެ.
ޗާގޯސް އަކީ މޮރިޝަސްގެ ބައެއް ކަމަށް ބަލައިގެން، އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީސް (އިޓްލޮސް) އިން ރާއްޖެއާ އެގައުމާ ދެމެދު ކަނޑުގެ ހާއްސަ އިގުތިސާދީ ސަރަހައްދުގެ އިން ކަނޑައެޅި އިރު ރާއްޖޭގެ ކަނޑުގެ ސަރަހައްދުން ބައެއް ގެއްލުނު ކަމަށް އިދިކޮޅު ފަރާތްތަކުން ތުހުމަތުކުރެ އެވެ.
އެކަމުގައި އިދިކޮޅުން ކަންބޮޑުވުން ފާޅުކުރާ އެއް ކަމަކީ ޗާގޯސްއަކީ މޮރިޝަސްގެ ބައެއް ކަމަށް ރާއްޖޭން ގަބޫލުކުރާ ކަމަށް ވިދާޅުވެ، ރައީސް އިބްރާހީމް މުހައްމަދު ސޯލިހު މޮރިޝަސްގެ ބޮޑުވަޒީރަށް ސިޓީފުޅެއް ފޮނުއްވާފައި ވުމެވެ.
ރާއްޖޭގެ ކަނޑުގެ ސަރަހައްދުން ބައެއް ގެއްލުނީ އެހެންވެ ކަމަށް، އެ މައްސަލާގައި ކަންބޮޑުވުން ފާޅުކުރާ ފަރާތްތަކުން ތުހުމަތު ކުރެ އެވެ.
ނަމަވެސް ސަރުކާރުން ބުނަމުން އަންނަނީ އިންވަކިކުރުމުގެ މައްސަލަ އިޓްލޮސް އިން ނިމުނީ ރާއްޖެއަށް ކާމިޔާބު ވެގެން ކަމަށެވެ. އެއީ އިން ވަކިކުރި އިރު މޮރިޝަސްގެ ސަރަހައްދު ކަނޑައެޅީ އެގައުމުން ބުނި ބޭސްޕޮއިންޓުން ފަށައިގެން ކަމަށް ނުވާތީ އެވެ.
