ރައްޔިތުންގެ މަޖިލިސް މަރުތަޅު އެޅުވި, ޖަލްސާތައް ހުއްޓިފައި އޮއްވާ މަޖިލިސް ތަޅުމަށް ނުވަދެވުމުން އިދިކޮޅު ޕީޕީއެމް/ ޕީއެންސީގެ މެންބަރުން, މަޖިލީހުގެ ޗެމްބަރުގައި ހުރި ގޮނޑިތައް ގޯތި ތެރެއަށް ނެރެފި އެވެ.
ޕީޕީއެމް މެންބަރުން މިއަދު މަޖިލީހަށް ދިޔައީ މަޖިލިސް ކުރިއަށް ގެންދިއުމަށް ގޮވާލައި، ތަޅުމަށް ވަދެ އިހުތިޖާޖު ކުރުމަށެވެ. ނަމަވެސް, ތަޅުމަށް ވަދެވޭގޮތް ނުވުމުން އެ މެންބަރުން މިހާރު ވަނީ މަޖިލީހުގައި ހުރި ގޮނޑިތައް ބޭރަށް ނެރުމަށްފަހު ރައީސް އޮފީހަށް ވަޑައިގެންފަ އެވެ.
ސޯޝަލް މީޑިއާގައި ދައުރުވަމުންދާ ވީޑިއޯއަކުން ފެންނަ ގޮތުގައި ގޮނޑިތައް މަޖިލިސް ޗެމްބަރުން ނެރުމުގައި އިސްކޮށް ހަރަކާތްތެރިވީ ނައިފަރު ދާއިރާގެ މެމްބަރު އަހްމަދު ޝިޔާމް އަދި ފަރެސްމާތޮޑާ ދާއިރާގެ މެމްބަރު ހުސައިން މުހައްމަދު ލަތީފެވެ.
"ރައްޔިތުންގެ ފަރާތުން އަޑު އުފުލަފާނެތީ ސަރުކާރުން މިތަން ހިސޯރުކޮށްގެން މި އުޅެނީ. ރާއްޖޭގައި ހިނގަމުން މިދަނީ ތިން ބާރު ވަކިވެފައި އޮތް ދައުލަތެއް ނޫން," މަޖިލީހުގައި ހުންނަވައި ނޫސްވެރިންނާ ވާހަކަ ދައްކަވަމުން މަޑުއްވަރީ ދާއިރާގެ މެމްބަރު އާދަމް ޝަރީފް ވިދާޅުވި އެވެ.
މަޖިލީހުގެ ކަންބޮޑުވުންތަކާއެކު ރައީސް ސޯލިހާ ބައްދަލުކުރުމަށް އިދިކޮޅު މެންބަރުން ދަނީ މިފަހުން ކޮންމެ ދުވަހަކުހެން ރައީސް އޮފީހަށް ވަޑައިގަންނަވަމުންނެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި، މަޖިލީހުގެ ނައިބު ރައީސް އީވާ އަބްދުﷲގެ އިތުބާރު ނެތް ކަމުގެ މައްސަލަ ހުށަހަޅާފައި އޮންނަ ދަނޑިވަޅުގައި މަޖިލިސް ކުރިއަށް ނުގެންދެވޭނެ ކަމަށް އިދިކޮޅު ފަރާތްތަކުން ދެކެ އެވެ.
ނަޝީދުގެ އިތުބާރު ނެތް މައްސަލަ ހުށަހަޅާފައި އޮތުމުން އެމަނިކުފާނު ވަނީ ޖަލްސާތަކުގެ ރިޔާސަތުގައި އިންނަވަން އުޒުރުވެރިވާ ކަމަށް މަޖިލިހުގެ އިދާރާއަށް ވަނީ އަންގައިފަ އެވެ. އެ ފަހުން ރިޔާސަތު ބެލެހެއްޓެވީ ވިލުފުށި ދާއިރާގެ މެންބަރު ހަސަން އަފީފެވެ.
މަޖިލިހުގެ ގަވާއިދު ބުނާ ގޮތުން ރިޔާސަތު އެހެން މެންބަރަކަށް ބެލެހެއްޓެވެނީ ގިނަވެގެން ވެސް ޖެހިޖެހިގެން ތިން ޖަލްސާއަށެވެ. އަފީފު ތިން ދުވަހަށް އެ ގޮތަށް ޖަލްސާގެ ރިޔާސަތު ބަލަހައްޓަވާފައިވާތީ، މަޖިލިހުގެ ޖަލްސާތައް ދެން ނުބޭއްވޭނެ ކަމަށް މަޖިލީހުގެ ރައީސް ނަޝީދު ވަނީ ވިދާޅުވެފައިވެ އެވެ.
އެހެންކަމުން, އިއްޔެ އާއި މިއަދު މަޖިލީހުގެ ޖަލްސާއެއް ތާވަލުކޮށްފައެއް ނުވެ އެވެ.
މަޖިލިހުގެ ޖަލްސާތައް ދެން މި ދައުރަށް ނުބޭއްވޭނެ ކަމަށް ނަޝީދު ވިދާޅުވި ނަމަވެސް މެޖޯރިޓީ ލީޑަރު، ހިތަދޫ އުތުރު ދާއިރާގެ މެންބަރު މުހައްމަދު އަސްލަމް ވިދާޅުވެފައި ވަނީ މަޖިލިހުގެ ޖަލްސާ ނަޝީދު ފެއްޓެވުމަށް ފަހު ވެސް ރިޔާސަތު އެހެން ބޭފުޅަކަށް ހަވާލު ވެސް ކުރެވިދާނެ ކަމަށެވެ. އޭނާ ދެކެވަޑައިގަންނަވާ ގޮތުގައި ޖަލްސާ ބާއްވަން ނަޝީދު ބޭނުންފުޅުނުވެ އެވެ.
މަޖިލިހުގެ ގަވާއިދު ބުނާ ގޮތުން އަހަރުގެ ދެވަނަ ދައުރު ޖޫން މަހުގެ ނިޔަލަށް ނިމޭނެ އެވެ. ކުރިއަށް އޮތީ ސަރުކާރު ބަންދު ހަފުތާ ދުވަސްތަކަށް ވެފައި މިއީ މި ދައުރުގެ ޖަލްސާތައް ބާއްވާ ފަހު ހަފުތާ އެވެ. އަހަރުގެ ތިންވަނަ ދައުރަށް މަޖިލިހުގެ ޖަލްސާތައް ފަށާނީ އޮގަސްޓް 15 އިން ފެށިގެންނެވެ.
