ރައްޔިތުންގެ މަޖިލީހުގައި މަރުތަޅު އެޅުވި މަސައްކަތް ހުއްޓިފައި އޮތް އޮތުން ނައްތާލެވޭނީ އެ މަޖިލީހުގެ ރައީސް މުހައްމަދު ނަޝީދަށް އެކަނި ކަމަށް މޯލްޑިވިއަން ޑިމޮކްރެޓިކް ޕާޓީގެ ޕާލަމެންޓްރީ ގްރޫޕުގެ ލީޑަރު މުހައްމަދު އަސްލަމް މިއަދު ވިދާޅުވެއްޖެ އެވެ.
އެމަނިކުފާނުގެ މައްޗަށް އިތުބާރު ނެތްކަމުގެ މައްސަލައެއް ހުށަހަޅާފައި އޮތުމުން ނަޝީދު ވަނީ ރިޔާސަތު ބެލެހެއްޓެވުމަށް އުޒުރުވެރިވެވަޑައިގަންނަވާކަން އަންގަވައިފަ އެވެ. އޭގެ ފަހުން ރިޔާސަތު ބެލެހެއްޓެވި ވިލުފުށީ ދާއިރާގެ މެމްބަރު ހަސަން އަފީފު ވަނީ ވިދިވިދިގެން ތިން ދުވަހު ރިޔާސަތު ބަލަހައްޓަވައިފަ އެވެ. އެއީ ގަވާއިދުން އޭނާއަށް ރިޔާސަތު ބެލެހެއްޓޭނެ އެންމެ ދިގު މުއްދަތެވެ.
އެހެން އެކަން އޮއްވައި އިއްޔެ ޖަލްސާ އަފީފް ނިންމާލެއްވީ ދެން މަޖިލީހުގެ ޖަލްސާއެއް ބާއްވާނެ ތާރީހެއް އިއުލާނު ނުކުރައްވަ އެވެ. އަދި މިއަދު ޖަލްސާގެ އެޖެންޑާއެއް އަދި ނޯޓިހެއް ވެސް މެމްބަރުންނަށް ނުފޮނުވަ އެވެ. އެހެންކަމުން މިވަގުތު މަޖިލީހުގެ ޖަލްސާއެއް ބޭއްވޭނެ މަގެއް ނުފުނެ އެވެ.
"މީހަކު އޭނާގެ މަސްއޫލިއްޔަތު އަދާ ނުކުރީ. ދެން އޭނާ ހިފައި ހައްޔަރުކޮށްގެން ގެންގޮސްފަ އެތާ ބައިންދާކަށެއް އެއްވެސް ގާނޫނަކު ނެތް. ދެން ކީއްތޯ ކުރާނީ؟ މަސައްކަތް އަލުން ފެށޭނީ މަޖިލީހުގެ ރައީސް އެކަން ކުރީމަ،" "އަދަދު" އާ ވާހަކަ ދައްކަވަމުން އަސްލަމް ވިދާޅުވި އެވެ.
އެމްޑީޕީގެ ރައީސްގެ މަގާމުގައި ވެސް ހުންނެވި ނަޝީދު އިއްޔެ ދެއްވި ނޫސްވެރިންގެ ބައްދަލުވުމެއްގައި ވިދާޅުވީ ރިޔާސަތު ބަލަހައްޓަން ގަވާއިދުން އެމަނިކުފާނަށް ފުރުސަތު އޮތް ނަމަވެސް ގިނަ އެމަނިކުފާނު މަގާމުން ވަކި ކުރަން ގިނަ މެމްބަރުންތަކެއް ސޮއި ކުރައްވާފައި އޮތުމުން ރިޔާސަތުގައި އިންނެވުމަކީ ރަނގަޅު ގޮތެއް ނޫން ކަމަށެވެ.
"އެގޮތަށް ބަލާއިރުގައި އަޅުގަނޑު ރިޔާސަތުގައި އިތުރަށް އިނުމަކީ އެއްގޮތަކަށް ވެސް، އެއް ގޮތަކަށް ވެސް ކަމުދާ ގޮތެއް ނޫން،" ނަޝީދު ވިދާޅުވި އެވެ.
ރައްޔިތުންގެ މަޖިލީހުގެ ގަވާއިދުގައި ބުނެފައިވާ ގޮތުން މަޖިލިސްގެ ރައީސްގެ އިތުބާރު ނެތްކަމުގެ މައްސަލައެއްގެ ބަލަމުންދާ ޖަލްސާއެއްގެ ރިޔާސަތު ބަލަހައްޓަންޖެހޭނީ ނައިބު ރައީސް އެވެ. އަދި ނައިބު ރައީސްގެ އިތުބާރު ނެތްކަމުގެ މައްސަލައެއްގެ ރިޔާސަތު ބަލަހައްޓަންޖެހެނީ ރައީސްއަށެވެ. އެކަމަކު، ރައީސް އާއި ނައިބު ރައީސްގެ އިތުބާރު ނެތްކަމުގެ މައްސަލަ އެއްފަހަރާ ހުށަހެޅުމުން، ރިޔާސަތު އިންނާނެ މީހަކު ނެތި މަޖިލިސް ހުއްޓޭނެ ކަމަށް ނަޝީދު ދެކެވަޑައިގަންނަވަ އެވެ.
ފުރަތަމަ އެހަށް ނައިބު ރައީސްގެ އިތުބާރު ނެތްކަމުގެ މައްސަލަ ނަންގަވާށޭ. ނެންގެވުމަށްފަހު އަޅުގަނޑުގެ އިތުބާރު ނެތްކަމުގެ މައްސަލަ ހުށަހަޅުއްވާ."
ނަމަވެސް މި ނޫހާ މިއަދު ވާހަކަ ދައްކަވަމުން އަސްލަމް ވިދާޅުވީ މަޖިލީހުގެ ނައިބު ރައީސް އީވާ އަބްދުﷲގެ އިތުބާރު ނެތްކަމުގެ މައްސަލައިގެ ރިޔާސަތުގައި ނަޝީދަށް އިންނެވޭނެ ކަމަށާއި އެކަމާ ދެކޮޅު ހައްދަވަން ނަޝީދު ދައްކަވަނީ "ކުޑަކުދިން ދައްކާ ކަހަލަ ވާހަކައެއް" ކަމަށެވެ.
"މަޖިލީހުގެ ރައީސަކަށް ހުރެ ތިމަންނާ މިކަން ކުރާނީ އެކަން ކުރީމައޭ ބުނުމަކީ ކުޑަކުދިން ދައްކާ ކަހަލަ ވާހަކަ ނޫންތޯ؟ އެކަހަލަ ކަމެއް ނޫންތޯ؟ ތަންކޮޅެއް ހެއްވާ ވާހަކައެއް އެއީ އަޅުގަނޑަށް،" މަޖިލީހުގެ މެޖޯރިޓީ ލީޑަރުގެ މަގާމުގަިއ ވެސް ހުންނެވި އަސްލަމް ވިދާޅުވި އެވެ.
ރައްޔިތުންގެ މަޖިލީހުގައި މިއަދު ބޭއްވެވި މީޑިއާ ބްރީފިންއެއްގައި ނަޝީދު ވިދާޅުވީ މަޖިލީހުގެ ޖަލްސާތަކުގެ ރިޔާސަތު މިހާރު ބަލަހައްޓަވަމުން ގެންދަވާ ވިލުފުށި ދާއިރާގެ މެމްބަރު ހަސަން އަފީފަށް، ވިދިވިދިގެން ރިޔާސަތު ބެލެހެއްޓެވޭނީ ތިން ޖަލްސާގައި ކަމަށެވެ. ރައްޔިތުންގެ މަޖިލީހުގެ ގަވައިދާ ހަވާލާދެއްވައި އެމަނިކުފާނު ވިދާޅުވީ އެހެންވީމާ މަޖިލިސް ޗުއްޓީއަށް ދިއުމުގެ ކުރިން ދެން ބާއްވަން ޖެހޭ ޖަލްސާތަކުގެ ރިޔާސަތު އަފީފަށް ނުބެލެހެއްޓެވޭނެ ކަމަށެވެ.
