ރައްޔިތުންގެ މަޖިލީހުގެ މިއަހަރުގެ ދެވަނަ ދައުރު ނިމެން އެންމެ ދެ ޖަލްސާއަށް ވެފައި ވަނިކޮށް، ޖަލްސާތައް ބޭއްވުން ހުއްޓައިލި ނަމަވެސް މަޖިލީހުގެ މެޖޯރިޓީ އޮންނަ އެމްޑީޕީގެ ޕާލަމެންޓްރީ ގްރޫޕުން އެކަމާ އަޅައި ނުލައި ދޫކޮށްލައިފި އެވެ.
ރައްޔިތުންގެ މަޖިލީހުގެ އިދާރާގައި އިއްޔެ ބޭއްވި މީޑިއާބްރީފިން އެއްގައި މަޖިލީހުގެ ރައީސް މުހައްމަދު ނަޝީދު ވިދާޅުވީ ޖަލްސާތަކުގެ ރިޔާސަތު ބަލަހައްޓަވަން އުޒުރުވެރިވެވަޑައިގަންނަވާތީ ރިޔާސަތު ބަލަހައްޓަވަން ކަނޑައެެޅުއްވި، ވިލުފުށި ދާއިރާގެ މެމްބަރު ވިދިވިދިގެން ތިން ޖަލްސާގެ ރިޔާސަތު ބަލަހައްޓަވާފައި ވާތީ އިތުރު ޖަލްސާއެއްގެ ރިޔާސަތު އޭނާއަށް މިވަގުތު ނުބެލެހެއްޓެވޭނެ ކަަމަށެވެ. އެހެންވެ މި ދައުރުގައި އިތުރު ޖަލްސާއެއް ދެން ނުބޭއްވިދާނެ ކަމަށް އެމަނިކުފާނު ވިދާޅުވި އެވެ.
އެހެން ނަމަވެސް މަޖިލީހުގެ މެޖޯރިޓީ އޮންނަ އެމްޑީޕީގެ ޕާލަމެންޓްރީ ގްރޫޕްގެ ލީޑަރު މުހައްމަދު އަސްލަމް ވިދާޅުވީ ޖަލްސާ ނުބޭއްވޭނެ ހާލަތެއް ނެތްކަމަށާއި ޖަލްސާ ބާއްވަން ޖެހޭނެ ކަމަށެވެ. އެމްޑީޕީން އެގޮތަށް ދެކޭ އިރު ޖަލްސާ ނުބާއްވައިފިއްޔާ އަމަލުކުރައްވާނެ ގޮތަކީ ކޮބައިތޯ "އަދަދު"ން ސުވާލުކުރުމުން އަަސްލަމް ސާފު ޖަވާބެއް ނުދެއްވަ އެވެ.
"އެހެން ދެން ވަކިކަމެއް ކުރާނަމެކޭ ކުރިއާލައި ނުދަނަންނަވާނަން. ދެން އަޅުގަނޑުމެން ވެސް [އެހިސާބަށް ދިޔައިމާ] ކިހިނެތްތޯ ހަދާނީ ނިންމާނަން،" އަސްލަމް އިއްޔެ ވިދާޅުވި އެވެ.
އަސްލަމް މިހެން ވިދާޅުވެފައި ވާއިރު މަޖިލީހުގައި މިއަދު އެއްވެސް މަސައްކަތެއް ކުރިއަކަށް ނުދެ އެވެ. މިއަދު މަޖިލިސް ޖަލްސާ ބޭއްވުމަށް އެޖެންޑާ ނުކުރުމުގެ އިތުރުން ޖަލްސާ ބާއްވަން ފޮނުވަންޖެހޭ ނޯޓިހެއް ވެސް ނުފޮނުވަ އެވެ.
ޖަލްސާ ނުބާއްވާ އިރު އެމްޑީޕީގެ މެމްބަރަކު މަޖިލީހުގެ އިދާރާއަށް އަދި ވަޑައިގެންނެވިކަމެއް ނުވަތަ ނޫންކަމެއް ނޭނގެ އެވެ. މަޖިލީހުގެ އިދާރާގައި މިވަގުތު ހުރި ނޫސްވެރިއަކު ބުނި ގޮތުގައި އެމްޑީޕީގެ އެއްވެސް މެމްބަރަކު އެތަނަކުން އަދި ނުފެނެ އެވެ.
