އަންނަ ހަފުތާގައި ބޭންކުތައް ހުޅުވާނީ ހަމައެކަނި ހޯމަ ދުވަހު ކަމަށް ރާއްޖޭގައި އެންމެ ފުޅާ ދާއިރާއެއްގައި ބޭންކިންގެ ހިދުމަތް ދެމުން އަންނަ ބީއެމްއެލް އާއި އިސްލާމިކް ބޭންކުން ބުނެފި އެވެ.
މި ހަފުތާގެ ހުކުރު ދުވަހުން ފެށިގެން އަންނަ މަހުގެ އެއްވަނަ ދުވަހާ ހަމައަށް ސަރުކާރު ބަންދު ކުރުމަށް ސަރުކާރުން ނިންމީ އަޟްހާ އީދުގެ މުނާސަބަތުގަ އެވެ. އެ ހަފުތާގެ ހޯމަ ދުވަހު އިސްލާމިކް ބޭންކު ހުޅުވުމަށް ހަމަޖެހިފައި ވަނީ ހެނދުނު 8:00 އިން މެންދުރުފަހު 2:00 އަށެވެ. ބީއެމްއެލް ހުޅުވާނީ އެދުވަހުގެ ހެނދުނު 8:30 އިން މެންދުރުފަހު 2:00 އަށެވެ.
އީދު ބަންދާ ގުޅިގެން އަންނަ ހަފުތާގެ އަށް ދުވަހު ބޭންކުތައް ބަންދު ކުރަން ނިންމާފައި ވީނަމަވެސް އެ ދުވަސްތަކުގައި ކޯލް ސެންޓަރުގެ ހިދުމަތާއި ޑިޖިޓަލް ބޭންކިންގެ ހިދުމަތް ލިބޭނެ ކަމަށް އެ ދެ ބޭންކުން ވެސް ބުނެ އެވެ.
އެހެންކަމުން, އެ ދެ ބޭންކުން ވެސް ވަނީ ބަންދު ދުވަސްތަކުގައި ޑިޖިޓަލް ބޭންކިންގެ ހިދުމަތް ހޯދުމަށް އިލްތިމާސް ކޮށްފަ އެވެ. އެގޮތުން, އިސްލާމިކް ބޭންކު އަދި ބީއެމްއެލްގެ އޭޓީއެމްތަކުގެ ހިދުމަތް ވެސް މެދުނުކެނޑި 24 ގަޑިއިރު ލިބޭނެ ކަމަށް އެ ބޭންކުތަކުން ބުނެ އެވެ.
ކަސްޓަމަރުންނަށް ހިދުމަތް ހޯދުމުގައި ލުއިފަސޭހަ ގޮތްތަކެއް ހޯދައިދިނުމުގެ މަގުސަދުގައި ބީއެމްއެލްއިން ވެސް އަދި އިސްލާމިކް ބޭންކުން ވެސް ވަނީ ދެ ޗެޓު ބޮޓު ތައާރަފުކޮށްފަ އެވެ. އެ ބޮޓުތައް މެދުވެރިކޮށް އަންނަ އީދު ބަންދުގައި ކަސްޓަމަރުން ބޭނުންވާ ހުރިހާ މައުލޫމާތެއް ސާފު ކުރެވޭނެ ކަމަށް އެ ދެ ބޭންކުން ވެސް ބުނެ އެވެ.
މިއަހަރުގެ އަޟްހާ އީދު ދުވަސް ދިމާވަނީ އަންނަ ހަފުތާގެ ބުދަ ދުވަހާ އެވެ. ބީއެމްއެލް އަދި އިސްލާމިކް ބޭންކުން އަންނަ ހަފުތާގައި ހިދުމަތް ދޭނެ ދުވަސްތަކުގެ މައުލޫމާތާ އެކު އެ ދެ ބޭންކުގެ ކަސްޓަމަރުންނަށް ވެސް އީދުގެ ތަހުނިޔާއާއި މުބާރަކްބާދީ ފޮނުވާފައިވެ އެވެ.
