ޖުމްލަ ފަސް މެމްބަރުން ތިބޭ އިލެކްޝަންސް ކޮމިޝަނުގެ ދެ މެމްބަރުންގެ ވޯޓު ލިބުމުން ވެސް ދި ޑިމޮކްރެޓްސް ރަޖިސްޓްރީ ކުރަން ހުށަހެޅި މައްސަލަ ފާސްވި ކަމަށް އެވަގުތު ނިންމެވީ އަރައިވަޑައިގެންނެވި އޮޅުމަކުން ކަމަށް އެ ކޮމިޝަނުގެ ރައީސް ފުއާދު ތައުފީގު މިއަދު ވިދާޅުވެއްޖެ އެވެ.
ވެރިކަން ހިންގާ މޯލްޑިވިއަން ޑިމޮކްރެޓިކް ޕާޓީގެ ރައީސް މުހައްމަދު ނަޝީދުގެ ސަޕޯޓަރުން އުފައްދަވާ ދި ޑިމޮކްރެޓްސް ރަޖިސްޓްރީ ކުރަން އިލެކްޝަންސްގެ ކުއްލި ޖަލްސާއެއް ބާއްވައި، ރޭ ވޯޓަށް އެހުމުން ޕާޓީ ރަޖިސްޓްރީ ކޮށްދޭން ލިބުނީ ދެ ވޯޓެވެ.
އެހެންނަމަވެސް، ޖުމްލަ ހަތަރު މެމްބަރުން ހާޒިރުވި އެ ޖަލްސާއަށް ފުއާދު ހުށަހެޅުއްވި އެ މައްސަލައަށް ދެ ވޯޓު ލިބުމުން ވެސް އޭނާ އެ ވަގުތު ނިންމެވީ މައްސަލަ ފާސްވި ކަމަށެވެ. އެކަމަކު، މެމްބަރުން ދެކޮޅު ހެދުމުން ފުއާދު ވަނީ އޭނާގެ ނިންމުން ބަދަލު ކުރައްވައިފަ އެވެ.
"އެވަގުތު އަޅުގަނޑަށް އައި ވިސްނުމެއް އެއީ. އެކަމަކު ރަނގަޅަށް ގާނޫނު ބަލާލިއިރު އިންނަނީ އަގުލަބިއްޔަތުންނޭ [ފާސްވާނީ]. އެހެންވީމަ ފާހެއް ނުވާނެ އެކަމެއް. ފަންސާސް ޕަސެންޓް، ދެބައިކުޅަ އެއްބައި ލިބިއްޖެޔާ ފާސްވާނެ ކަންކަން ހުރޭ ދުނިޔޭގެ އެކިއެކި ތަންތަނުގައި،" އެކަން ސާފުކޮށްދެއްވަމުން ފުއާދު ވިދާޅުވި އެވެ.
"އަޅުގަނޑު ވެސް މިގޮތަށް ޕްރެޝަރުގައި މަސައްކަތް ކުރާއިރު ހުރިހާ ގާނޫނުތަކެއް ވަގުތުން ހިތަކަށް ނާދޭ. އެކަމަކު [ދެ ވޯޓުން ފާސްވާނެ ކަމަށް ބެލުން] އެއީ ނުރަނގަޅު ވިސްނުމެއް. އެއީ އަޅުގަނޑަށް ހެދުނު ކުށެއް."
ރޭގެ ކުއްލި ޖަލްސާއަށް ހާޒިރުވެވަޑައިގެންނެވީ ފުއާދުގެ އިތުރުން ނައިބު ރައީސް އިސްމާއިލް ހަބީބާއި މެމްބަރު އަލީ ނަޝާތާއި މުހައްމަދު އާސިފެވެ. އެ ކޮމިޝަނުގެ މެމްބަރު ޑރ. މުހައްމަދު ޒާހިރު ހުންނެވީ ހައްޖުގެ އަޅުކަން އަދާކުރަން މައްކާއަށް ވަޑައިގެންނެވެ.
"ހަތަރު މެމްބަރު މިހާރު ތިބި. ދެ ވޯޓު، ދެ ވޯޓުން އެއްވަރުވީ ހުއްދަ ދިނުމަށާއި ހުއްދަ ނުދޭ ގޮތަށް. އެހެންވީމާ ހުއްދައެއް ނުދެވުނު. ދެ ވޯޓު ލިބުނީމާ އަޅުގަނޑު ނިންމިން ފާސްވެއްޖެ ކަމަށް. އެކަމަކު އަގުލަބިއްޔަތުންނޭ އޮންނާތީ ފާހެއްނުވާނެ ކަމަށް ވަނީ ދެ ވޯޓު، ދެ ވޯޓަކުން،" ޑިމޮކްރެޓްސް ރަޖިސްޓްރީ ނުކޮށްދީގެން ކޮމިޝަނުގެ އިދާރާއަށް ގޮސް ތިބި މެމްބަރުންނާ ވާހަކަ ދައްކަވަމުން ފުއާދު ރޭ ވިދާޅުވި އެވެ.
އިލެކްޝަންސް ކޮމިޝަނުގެ ގަވާއިދުގެ 3.1 އަދި 3.2 ގައި ބުނެފައި ވަނީ "ކޮމިޝަނުން ނިންމަންޖެހޭ ކަންކަން ނިންމަންވާނީ ކޮމިޝަނުގެ ޖަލްސާއަކުން ފާސްކޮށްގެން" ކަމަށާއި "ކޮމިޝަނުގެ ޖަލްސާއަކުން ކަމެއް ފާސްކުރަންވާނީ ޖަލްސާއަށް ހާޒިރުވެ ވޯޓުދިން މެމްބަރުން އަގުލަބިއްޔަތުން" ކަމަށެވެ. ކޮމިޝަނުގެ ޖަލްސާއެއްގެ ކޯރަމަކީ ތިން މެމްބަރުންނެވެ.
ޑިމޮކްރެޓްސް ރަޖިސްޓްރީ ނުކޮށްދޭން ވޯޓު ދިން ދެ މެމްބަރުން ބޭނުންވަނީ ފަސް މުވައްޒަފުންގެ ކޮމެޓީއެއް އެކުލަވާލުމަށްފަހު އަލުން ފޯމުތައް ޗެކް ކުރުމަށެވެ. އެއީ އެ ފޯމުތައް ޕްރޮސެސް ކުރަން ކޮމިޝަނުގެ ރައީސް ނުފޫޒެއްގެ ދަށުގައި ހުންނަވާ މަސައްކަތް ކުރައްވާ ކަމަށް ޝައްކު ކުރެވޭތީ ކަމަށް އެ މެމްބަރުން ބުނެ އެވެ. އެގޮތުން، ކަމާ ނުގުޅޭ މުވައްޒަފުން ލައްވައި ޑިމޮކްރެޓްސްގެ ފޯމުތައް ޕްރޮސެސް ކުރަން ފުއާދު މަސައްކަތް ކުރައްވާ ކަމަށް އެ ދެ މެމްބަރުން ތުހުމަތު ކުރެ އެވެ.
"އަޅުގަނޑުމެން ބޭނުންވީ ރައީސްގެ އަމަލުތައް ވެސް ހުރިގޮތުން ޕްރޮސެސްގެ އިތުބާރު ގެއްލިފައި އޮތީމައި އަލުން ބަލަން," މި ނޫހާ ރޭ ވާހަކަ ދައްކަވަމުން އެ ކޮމިޝަނުގެ މެމްބަރު ނަޝާތު ވިދާޅުވި އެވެ. "ރިޔާސީ އިންތިހާބަށް ނަގާފައި ތިބި ހުރިހާ މުވައްޒަފުން ލައްވާ [ފޯމުތައް ޗެކު ކުރުވަނީ]. މި ޕްރޮސެސް ތެރެއަށް ވަދެ, އެ ބޭފުޅުން އަންނަ އިރަށް އެންޓަޓެއިން ވެސް އެބަ ކޮށްދޭ މިއަދު ވެސް ރައީސްގެ ހުއްދައާ އެކު ކޮމިޝަން ހިސޯރުކޮށްގެން ތިބީ."
ރިޔާސީ އިންތިހާބު ސެޕްޓެމްބަރު 9، ގައި ބާއްވަން ނިންމާފައިވާރު އެ އިންތިހާބުގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވާދަ ކުރައްވާނެ އެވެ. ވެރިކަން ހިންގާ މޯލްޑިވިއަން ޑިމޮކްރެޓިކް ޕާޓީގެ ރައީސް މުހައްމަދު ނަޝީދު އުފައްދަވަން މަސައްކަތް ކުރާ ދި ޑިމޮކްރެޓްސްގެ ފަރާތުން ވެސް ކެންޑިޑޭޓެއް ނެރޭނެ ކަމަށް ވަނީ ބުނެފަ އެވެ.
އިލެކްޝަންސް ކޮމިޝަނުގައި މައްސަލަ ޖެހިގެން އުޅޭކަން މިރޭ ހާމަވިއިރު ރައްޔިތުންގެ މަޖިލިހުގެ މަސައްކަތް ވަނީ ހުއްޓިފަ އެވެ. މަޖިލިސް ހުއްޓުނީ އެ މަޖިލީހުގެ ކޮމެޓީތަކަށް މެމްބަރުން ބަހާނެ ގޮތަކާމެދު ޕާޓީތަކަށް އެއްބަސްނުވެވިގެންނެވެ. އޭގެ އިތުރުން، އެ މަޖިލީހުގެ ރައީސް ނަޝީދާއި ނައިބު ރައީސް އީވާ އަބްދުﷲގެ އިތުބާރު ނެތްކަމުގެ މައްސަލައެއް ވެސް ވަނީ ވައްދާފަ އެވެ. އެއާއެކު ނަޝީދު ވަނީ ރިޔާސަތުން ތަނާޒަލުވެވަޑައިގެންފަ އެވެ.
