ދިވެހިރާއްޖޭގެ ހުރިހާ ކޮންކަޅެއް ހިމެނޭ ގޮތަށް 300 އަށް ވުރެ ގިނަ ރަށުގެ ގޮނޑުދޮށް ސާފުކުރުމުގެ ބޮޑު ހަރާކެއް މާދަމާ ހިންގުމަށް ހަމަޖެހިފައިވާ ކަމަށް ޕާލޭ މޯލްޑިވްސް އިން ބުނެފި އެވެ.
ގޮނޑުދޮށް ސާފުކުރުމުގެ ހަރަކާތުގައި މީހުން ދިރިއުޅޭ ރަށްތަކުގެ އިތުރުން ރިސޯޓުތައް ވެސް ހިމެނެ އެވެ. ޕާލޭއިން ބުނީ ސާފު ކުރުމުގެ ހަރަކާތް ކުރިއަށްދާނީ މާދަމާ ހެނދުނު 7:00 ފެށިގެން 9:00 އާ ހަމައަށް އަދި ހަވީރު 4:00 އިން ފެށިގެން 6:00 އާ ހަމައަށް ކަމަށެވެ.
އެ ހަރަކާތުގައި ގޮނޑުދޮށްތަކުގެ އިތުރުން މޫދު ވެސް ސާފު ކުރާނެ ކަމަށް ޕާލޭއިން ބުނެ އެވެ. އަދި ހަމަ އެ ހަރަކާތުގެ ބައެއްގެ ގޮތުގައި ކަނޑުތަކާ ބެހޭ ގޮތުން ތައްޔާރުކޮށްފައިވާ ވީޑިއޯއެއް މާދަމާ 2:30 ގައި ޔޫޓިއުބުން ދައްކާނެ ކަމަށް ވެސް ޕާލޭއިން ބުނެ އެވެ.
އޭގެ އިތުރުން، އެ ހަރަކާތުގެ މިއަދު ކުރިއަށްގެންދާ ބައެއްގެ ގޮތުގައި، މޫދަށް އަޅާ ކުނި މަދު ކުރަން މަސައްކަތް ކުރަން އަހަދުވެ ސޮއި ކުރުމުގެ ފުރުސަތު ވެސް ޕާލޭއިން ވަނީ ހުޅުވާލައިފަ އެވެ. މާދަމާ ހަވީރު 6:00 ގެ ނިޔަލަށް އެ އަހަދުގައި ސޮއި ކުރެވޭނެ ކަމަށް ޕާލޭއިން ބުނެ އެވެ.
ޕާލޭއަކީ ދިވެހިރާއްޖެއިން ޕްލާސްޓިކު ކުނި މަދުކޮށް، ނަގާ ކުނި އިގްތިސާދު ކުރަން މަސައްކަތް ކުރާ އަމިއްލަ ޖަމިއްޔާއެކެވެ. ރާއްޖެއިން ނެގި 2.1 މިލިއަން ކިލޯގެ ކުނި މިހާތަނަށް ބޭރުކޮށްފައިވާ ކަމަށް އެ ޖަމިއްޔާއިން ބުނެ އެވެ.
