އެފްއޭއެމް 13 އަހަރުން ދަށުގެ އިންޓަ ސްކޫލް ފުޓްބޯޅަ މުބާރާތުގެ ފައިނަލުގައި އަހުމަދިއްޔާ އިންޓަނޭޝަނަލް ސްކޫލް އަތުން 3-0 އިން މޮޅުވެ، ކަލާފާނު ސްކޫލުން މުބާރާތުގެ ޗެމްޕިއަންކަން ހޯދައިފި އެވެ.
ގަލޮޅު ދަނޑުގައި މިރޭ ގިނަ އަދަދެއްގެ ސަޕޯޓަރުން ކުރިމަތީގައި ކުޅުނު ފައިނަލް މެޗު ފަށައިގެން ހަތް ސިކުންތު ތެރޭގައި ކަލާފާނުން ވަނީ ލީޑުނަގައިފަ އެވެ. އެ ގޮތުން، މެޗު ކިކޮފް ކުރުމަށް ފަހު، ކަލާފާނު ކުޅުންތެރިން މަތިމަތިން ފޮނުވާލި ބޯޅައެއް ފެނުގައި ޖެހިފައި އަހުމަދިއްޔާ ކީޕަރު މުހައްމަދު އަރާން ޝަމީމް އަތްމަތިން ދިޔަ ވަގުތު އެ ބޯޅަ ހޯދައި، ކަލާފާނުގެ ކެޕްޓަން، ހުސެއިން އިލްހާމް އިބްރާހިމް ވަނީ ގޯލަށް ފޮނުފާލައިފަ އެވެ.
އަހުމަދިއްޔާ އިން ނަތީޖާ ހަަމަހަމަކުރަން ކުރި މަސައްކަތުގައި، މާ ނުރައްކާތެރި ހަމަލާތަކެއް ފޮނުވާލެވޭ ގޮތެއް ނުވި އެވެ. އަނެއްކޮޅުން ފުރަތަމަ ހާފުގައި ކަލާފާނަށް ދެ ވަނަ ލަނޑެއް ޖަހައިދޭން މުހައްމަދު ވިފާގު ޖާދުﷲ ޖެހި ބޯޅައެއް ވަނީ ދަނޑިއަށް އަމާޒުވެފަ އެވެ.
ހާފެއްގައި 25 މިނިޓް ކުޅޭ ގޮތަށް މި މުބާރާތް ކުރިއަށްދާއިރު، ކަލާފާނުން ފަހު ދެ ގޯލު ޖެހީ މެޗުގެ ފަހު ކޮޅުގަ އެވެ. އެ ގޮތުން ކަލާފާނުގެ ދެ ވަނަ ގޯލު ޖެހީ އިލްހާމް އެވެ. ހާފުގެ މެދެއްހާ ހިސާބުން އިލްހާމް އަށް ލިބުނު ބޯޅަ ހިފައިގެން އޭރިއާތެރެއަށް ވަދެ އޭނާ މި ގޯލު ޖެހީ ކީޕަރު އަރާން ކައިރިން ނައްޓައިފަ އެވެ. ދެ ވަނަ ގޯލު ޖެހިތާ އިރުކޮޅެއްގެ ތެެރޭގައި ކަލާފާނުގެ ތިން ވަނަ ގޯލު ޖެހީ ކޯނަރެއްގައި ލިބުނު ފުރުސަތުން މުހައްމަދު ނަޝަމް ނިޔާޒް ބޮލުންނެވެ.
މުބާރާތުގެ އެންމެ ގިނަ ގޯލު ޖެހި ކުޅުންތެރިޔާގެ މަގާމާއި އެންމެ މޮޅު ކުޅުންތެރިއަކީ ކަލާފާނުގެ ކެޕްޓަން، އިލްހާމް އެވެ. އެންމެ މޮޅު ކޯޗަކަށް ކަލާފާނުގެ ފަރީދު މުހައްމަދު (ފަރިއްޓެ) ހޮވުުނުއިރު، ފެއާޕްލޭ ޓީމަކީ މަޖީދިއްޔާ ސްކޫލް އެވެ. މި ފަހަރުގެ އިންޓަ ސްކޫލް މުބާރާތުގައި ޖުމްލަ އެކު، 36 ސްކޫލަކުން ވަނީ ވާދަކޮށްފަ އެވެ.
