އެފްއޭއެމް 17 އަަހަރުން ދަށުގެ އިންޓަ ސްކޫލް ފުޓްބޯޅަ މުބާރާތުގައި ކ. ގުރައިދޫ ސްކޫލް އަތުން ކަލާފާނު ސްކޫލް 2-1 އިން މޮޅުވި މެޗަށް ފަހު ގުރައިދޫ ޓީމުގެ ކުޅުންތެރިންގެ ބެލެނިވެރިންނާއި ކުޅުންތެރިން ހިމެނޭ ގޮތަށް މާރާމާރީ ހިންގައި, ރެފްރީ އަށް ހަމަލާދިން ވަގުތު ރެފްރީގެ ދިފާއުގައި ނުކުމެ އޭނާ އަށް އަނިޔާއެއް ލިބުނަ ނުދޭން ގައުމީ ޓީމުގެ ޑިފެންޑަރު، އަހުމަދު ނޫމާން (ހެލްމެޓު) ނުކުމެ ދެއްކި ހިތްވަރަށް ގިނަ ބަޔަކު ތައުރީފުކޮށްފި އެވެ.
އިންޓަ ސްކޫލް ފުޓްބޯޅަ މުބާރާތުގެ ސެމީ ފައިނަލް މެޗަށް ފަހު، ގުރައިދޫގެ ކުޅުންތެރިންގެ ބެލެނިވެރިންގެ ތެރެއިން ބަޔަކާއި ކުޅުންތެރިން ރެފްރީއާ ދިމާކޮށްލީ މި މެޗުގައި ރެފްރީ ނިންމި ނިންމުންތައް ގޯސްކަމަށް ބުނެ އެވެ. އެންމެން ރެފްރީ ފަހައި ވަނީ ދުވެފަ އޭނާ އަށް ހަމާލާ ދިން ވަގުތު ރެފްރީގެ ކުރިމައްޗަށް އަރައި އޭނާ ދިފާއުކުރަން ނިކުތީ ނޫމާން އެވެ.
ކ.ގުރައިދޫ އަށް އުފަން ނޫމާން، "އަދަދު" އަށް ބުނީ އަމިއްލަ ރަށުގެ މީހުންނާ ދެކޮޅަށް ނުކުމެ ރެފްރީ ސަލަމާތްކުރަން ނިންމީ މިއީ އެއްވެސް ގޮތަކަށް ހިނގަންޖެހޭނެ ވަރުގެ ކަމެއް ނޫން ކަމަށްވާތީ އެވެ. އޭނާ ބުނާ ގޮތުން ސްކޫލް މުބާރާތެއްގައި ވިޔަސް އެހެން މުބާރާތެއްގައި ވިޔަސް ރެފްރީންނަށް ހަމަލާ ދިނުމަކީ މައްސަލައިގެ ހައްލު ކަމުގައި ގަބޫލުކުރެވިގެން ނުވާނެ އެވެ.
"މެޗު ނިންމާފައި ރެފްރީ އަށް ހަމަލާ ދިނުމަކީ ހައްލެއް ނޫން. ރެފްރީގައި ޖެހިޔަސް މެޗަކުން އެ ސްކޫލް (ގުރައިދޫ) މޮޅެއް ނުވޭ. އެހެންވީމާ، އެކަންކޮށްގެން ހަމަ ރަށަށް ހުތުރު ނަން ލިބޭނީވެސް" މި ސީޒަނުގައި ރާއްޖޭގެ ޗެމްޕިއަން، މާޒިޔާ ސްޕޯޓްސް އެންޑް ރެކްރިއޭޝަނަށް ބަދަލުވި ނޫމާން ބުންޏެވެ.
ނޫމާން ބުނީ ސްކޫލް މުބާރާތެއްގައި މިކަހަލަ ކަމެއް ރަށުގެ ގިނަ ބަޔަކު ހިއްސާވާ ގޮތަށް ކުރުމަކީ ވަރަށް ގޯސްކަމެއް ކަމަށާއި، އޭނާ އެކަން ކުށްވެރިކުރާ ކަމަށެވެ. ރެފްރީގެ ދިފާއުގައި އޭނާ ނުކުތީ ފުޓްބޯޅައިގެ މަސްލަހަތަށް ބަލާފައި ކަމަށާއި، އެ ވަގުތު ރަށު މީހުން ގާތު ރެފްރީއަށް ހަމަލާ ނުދޭން އޭނާ ބުނި ކަމަށެވެ. ނަމަވެސް އެންމެން ދުއްވައިގަތުމުން ރެފްރީ އާއި އެ އެންމެންގެ ދެމެދަށް ވަނުން ނޫން ގޮތެއް ނެތް ކަމަށް ނޫމާން ބުނެފައިވެ އެވެ.
ރެފްރީ ކުރިމަތީގައި ހުރި ވަގުތު ނޫމާންގެ ގައިގައިވެސް ބައެއް މީހުން ރެފްރީއަށް އަމާޒުކުރި ހަމަލާތައް އެރި އެވެ. އެ ވަގުތު ވިސްނުންތެރިކަމާ އެކު ރެފްރީ ދިފާއުކޮށް ސިޑި ދަށަށް ވަދެވެން އެންމެ ގާތުގައި ހުރި ދޮރުން ވަދެ ނޫމާން ރެފްރީ ވެއްދީ ރެފްރީސް ރޫމަށެވެ. ރެފްރީ ރޫމަށް މެޗުގެ ރެފްރީ ލުމަށް ފަހު ދޮރު ބޭރުގައި އެހެން މީހުންނަށް އެހިސާބަށް ނާދެވޭ ގޮތަށް މަޑުކޮށްލައިގެން ވެސް ނޫމާން ހުއްޓެވެ.
އަމިއްލަ ރަށުގެ މީހުން ކުރިކަމެއް ވިޔަސް އެފަދަ ކަމަކާ ދެކޮޅަށް ނުކުމެ ނޫމާން ދެއްކި ނަމޫނާ އަށް ސޯޝަލް މީޑިއާގައި ވެސް ގިނަ ބަޔަކު އަންނަނީ ފާހަގަ ކުރަމުންނެވެ. ނޫމާން ނެތް ނަމަ ރެފްރީއަށް ބޮޑު އަނިޔާއެއް ލިބުން ގާތްކަމަށް ވެސް ގިނަ ބަޔަކު ޕޯސްޓް ތަކުގައި ލިޔެފައިވެ އެވެ.
ގައުމީ ޓީމް ކުޅޭ މެޗުތަކާއި، ކުލަބު ލެވެލްގެ އެކި މެޗުތަކުގައި ރެފްރީންގެ ދިދާއުގައި ދަނޑު ބޭރުގައި ފުލުހުން ތިބެ އެވެ. ސަޕޯޓަރުން ކޮންޓްރޯލް ކުރުމުގައި ފުލުހުން ހަރަކާތްތެރިވެ އެވެ. އެކަމަކު، އިންޓަ ސްކޫލްގެ ފޯރިގަދަ މި މެޗުގައި ފުލުހުން އެ ވަގުތު އެތަނުގައި ނެތުމުން ރެފްރީއަށް ލިބެން ޖެހޭ އެންމެ ރަނގަޅު ރައްކާތެރި ކަމެއް ނުލިބެ އެވެ.
މިދިޔަ ހޯމަ ދުވަހު ހިނގައިދިޔަ ހަމަނުޖެހުމާއި ގުޅިގެން އެ މައްސަލަ ބަލާނެކަމަށް އެފްއޭއެމުން ވަނީ ހާމަކޮށްފަ އެވެ. އަދި އެ މައްސަލަ ސީރިއަސް ކަމެއްގެ ގޮތުގައި ބަލައިދިނުމަށް ޔޫތު މިނިސްޓަރު އަހުމަދު މަހުލޫފުވެސް ވަނީ އެދިވަޑައިގެންފަ އެވެ. އެޑިއުކޭޝަން މިނިސްޓްރީން ވެސް ވަނީ ހިނގާދިޔަ އެ ހަމަނުޖެހުން ކުށްވެރިކޮށްފަ އެވެ.
